Ўзбекистон Республикаси Вазирлар Маҳкамаси томонидан киритилган «Қўриқлаш фаолияти тўғрисида»ги ҚЛ-729-сонли Ўзбекистон Республикаси қонуни лойиҳаси юзасидан Ўзбекистон Республикаси Олий Мажлиси Қонунчилик палатаси Мудофаа ва хавфсизлик масалалари қўмитасининг хулосаси кўриб чиқилди.

Мазкур қонун лойиҳаси Қонунчилик палатасига келиб тушгандан сўнг Ўзбекистон Республикаси Президентининг 2021 йил 20 февралдаги «Ўзбекистон Республикаси Миллий гвардияси Қўриқлаш бош бошқармасининг фаолиятини сифат жиҳатидан янги босқичга кўтариш чора-тадбирлари тўғрисида»ги ПҚ-4997-сонли Қарори қабул қилинди. Унда Ўзбекистон Республикаси Миллий гвардияси қўриқлаш хизмати Қўриқлаш бош бошқармаси этиб қайта ташкил этилганлиги, бош бошқарманинг мақоми ва асосий вазифалари, шу жумладан қўриқлаш бўлимларининг яхлит тизимини шакллантириш, қўриқлаш хизматлари кўрсатиш соҳасида самарали бошқарувни амалга ошириш, бу соҳадаги ишларни сифат жиҳатдан янги босқичга кўтариш вазифалари белгиланганлиги қонун лойиҳасини концептуал жиҳатдан қайта кўриб чиқишни тақозо этади.

Юқоридагиларни инобатга олиб, «Ўзбекистон Республикаси Олий Мажлиси Қонунчилик палатасининг Регламенти тўғрисида»ги Ўзбекистон Республикаси Қонунининг 13-моддасига мувофиқ Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Вазирлар Маҳкамаси томонидан 2020 йил 10 декабрда киритилган «Қўриқлаш фаолияти тўғрисида»ги ҚЛ-729-сонли Ўзбекистон Республикаси қонуни лойиҳаси қонунчилик ташаббуси ҳуқуқи субъектига қайтарилсин.

2. Ушбу Қарор Ўзбекистон Республикаси Вазирлар Маҳкамасига юборилсин.

3. Ушбу Қарор қабул қилинган кундан эътиборан кучга киради.