Нархларнинг либераллашуви ва бозор муносабатлари ривожланиши шароитларида шахсий ёрдамчи хўжалик эгалари туман, вилоят уюшмаларининг моддий-техника негизини мустаҳкамлаш, шунингдек, шахсий ёрдамчи хўжалик эгаларини ижтимоий ҳимоя қилиш мақсадида Вазирлар Маҳкамаси қарор қилади:

1. Вазирлар Маҳкамасининг «Республика деҳқон (фермер) хўжаликларини янада ривожлантириш ва мустаҳкамлаш чоралари ҳақида» 1991 йил 30 декабрдаги 315-сон қарори 8-бандининг биринчи хатбошига қисман ўзгартириш киритган ҳолда: «Ўздеҳқончиликсаноатбанк»га туман ва қишлоқ (шаҳарча) уюшмаларининг тақдимномаси бўйича шахсий ёрдамчи хўжалик эгаларига чорва моллари, парранда, озуқа, уруғлик ва қурилиш материаллари сотиб олиш учун бир оилага 100 минг сўмгача нақд пул билан кредит беришга рухсат этилсин;

Вазирлар Маҳкамасининг «Ўзбекистон ССР Президентининг «Шахсий ёрдамчи хўжаликлари бўлган деҳқонларга молиявий ёрдам бериш ва улар уюшмасининг моддий-техника базасини мустаҳкамлаш тўғрисида»ги Фармонини амалга ошириш чора-тадбирлари ҳақида» 1991 йил 19 апрелдаги 107-сон қарорининг 13-бандига қисман ўзгартириш киритган ҳолда смета қиймати 500 минг сўмгача бўлган кичик цехлар ва ишлаб чиқариш аҳамиятига эга бўлган бошқа объектларни лойиҳалаш ва қуришнинг техникавий ҳужжатларини туман уюшмаси, смета қиймати 1 млн сўмгача бўлганини — вилоят уюшмаси ва 1 млн сўмдан ортиқ бўлганини — уюшманинг Республика кенгаши тасдиқлаши белгилансин.

Вазирлар Маҳкамасининг 1991 йил 19 апрелдаги 107-сон қарори билан тасдиқланган шахсий ёрдамчи хўжаликларни ривожлантиришга мадад жамғармаси ва ундан фойдаланиш мақоми тўғрисидаги Низомга тегишли ўзгартиришлар киритилсин.

2. Шахсий ёрдамчи хўжаликлар эгалари уюшмаси ҳузурида ташкил этилган кичик корхоналарга шахсий томорқаларнинг эгаларидан мева-сабзавот маҳсулотлари ва қишлоқ хўжалиги хом ашёсини қайта ишлаш, сотиш ва халқ истеъмоли молларига, ёғоч-қурилиш ҳамда бошқа материалларга алмаштириш учун нақд пул билан ҳисоб-китоб қилиб сотиб олишга рухсат берилсин.