Ўзбекистон Республикаси Олий Мажлиси Қонунчилик палатасининг Кенгаши шуни қайд этадики, Аграр ва сув хўжалиги масалалари қўмитаси 2018 йилдаги ўз фаолиятини палата ва қўмита иш режаларига мувофиқ ташкил этиб, иш режаларида белгиланган вазифалар тўлиқ бажарилишига эришиш чораларини кўрган. Шу билан бирга қўмита Ўзбекистон Республикаси Президенти Ш.М. Мирзиёевнинг 2018 йил 28 декабрдаги Олий Мажлисга Мурожаатномасида белгиланган вазифалардан келиб чиқиб ҳамда Кенгаш мажлисида билдирилган таклифларни инобатга олган ҳолда келгусидаги ўз фаолиятини янада жонлантириши зарурлиги таъкидлаб ўтилди. Хусусан, қишлоқ хўжалиги соҳаси бошқарув тизимини ислоҳ қилиш, ер ва сув ресурсларидан оқилона фойдаланиш борасидаги илғор технологияларни жорий этиш, озиқ-овқат хавфсизлигини таъминлаш, уруғчиликда сара навларни яратиш мақсадида тажриба-селекция ишларини тубдан жонлантириш, уруғчилик ва селекция илмий-тадқиқот институтларининг моддий-техника базасини мустаҳкамлаш, давлат-хусусий шериклик асосида уруғчилик кластерларини ташкил этиш ва қишлоқ хўжалиги соҳасидаги ислоҳотларни амалга оширишга оид қонун ҳужжатларини такомиллаштириш қўмита фаолиятида устувор вазифа бўлиши лозим.

Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Аграр ва сув хўжалиги масалалари қўмитасининг 2018 йилдаги фаолияти тўғрисидаги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси белгиланган вазифалардан келиб чиққан ҳолда иш фаолиятини танқидий кўриб чиқсин ҳамда мамлакатимизда қишлоқ хўжалиги соҳасидаги ислоҳотларни амалга ошириш борасида бевосита иштирокини кучайтирсин.

3. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси (Т. Эшназаров) 2018 йил якунларини инобатга олган ҳолда 2019 йилга мўлжалланган иш режаларининг бажарилишини таъминласин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари Б. Алихонов зиммасига юклатилсин.