Ўзбекистон Республикаси Давлат статистика қўмитаси раиси Б. Бегаловнинг «Ўзбекистонда статистика маълумотларининг ҳаққонийлиги, ишончлилиги ва очиқлиги тўғрисида»ги ахборотини эшитиб, Ўзбекистон Республикаси Олий Мажлиси Қонунчилик палатаси шуни таъкидлайдики, мазкур соҳани ислоҳ қилиш, халқаро стандартларни ҳамда илғор хорижий тажрибани амалиётга жорий этиш, статистика маълумотларининг ҳаққонийлиги, ишончлилиги ва очиқлигини таъминлашга доир ҳуқуқий асосларни яратиш ва уларга эришишнинг аниқ механизмларини қўллаш борасида кенг кўламли ишлар амалга оширилмоқда.

Хусусан, ахборотда халқаро талаблар ва стандартларга асосланган замонавий статистика услубиётларини амалиётга татбиқ этиш ва соҳани янада ривожлантириш бўйича устувор вазифаларни белгилаб олиш мақсадида беш йиллик комплекс чора-тадбирлар дастури тасдиқланиб, унда фаолиятни такомиллаштириш, умумэътироф этилган ҳаққонийлик, ишончлилик ва очиқлилик тамойилларига риоя этиш юзасидан аниқ вазифалар белгилаб олингани таъкидланди.

Шунингдек, мамлакатимиз статистика тизимида малакали кадрларга бўлган талаб ва эҳтиёжни қондириш ҳамда етук кадрларни тайёрлаш мақсадида Давлат статистика қўмитасида Кадрларни қайта тайёрлаш ва статистик тадқиқотлар маркази Кадрлар малакасини ошириш ва статистик тадқиқотлар институтига айлантирилганлиги эътироф этилди.

Жумладан, фойдаланувчиларнинг статистика маълумотларига бўлган эҳтиёжини қондириш мақсадида 8 та халқаро ташкилот ҳамда мамлакатимиздаги 11 та статистика идораларининг маълумотлар базалари таркиби ва тажрибалари яқиндан ўрганиб чиқилди.

Давлат статистика қўмитасининг сайтида фойдаланувчиларни статистика маълумотларига бўлган эҳтиёжини тўлиқ қондириш мақсадида бугунги кунда 20 та бўлимда, 279 та тўплам жадвал кўринишида 1 млн. дан зиёд макроиқтисодий кўрсаткичлар эълон қилиб берилмоқда.

Жаҳон банки томонидан 2004 йилдан буён мамлакатлар миллий статистикасининг салоҳиятини баҳолаш бўйича юритиб келинадиган «Статистика фаолияти самарадорлиги индекси»да Ўзбекистон тутган ўринни яхшилаш мақсадида ушбу рейтинг доирасида 29 та индикатор бўйича баҳо олинишига эришилди. Натижада, мамлакатимизда статистика фаолиятининг самарадорлиги индекси 2018 йил якуни бўйича 50,9 баллни ташкил этган бўлса, 2019 йил якуни бўйича бу кўрсаткич 67,5 баллга етказилди.

Шуни алоҳида таъкидлаш жоизки, мультииндикатор кластер кузатувларини ўтказиш, аҳолини рўйхатга олиш ва қишлоқ хўжалиги хатловлари натижасида халқаро таққослашлар 2020 йил раундида иштирок этиш ва статистика маълумотларини кенг тарқатиш хизматини йўлга қўйиш орқали 2024 йил якуни билан «Статистика фаолияти самарадорлиги индекси»да максимал баллга эришилади.

Шу билан бирга, босқичма-босқич давлат статистика ҳисоботи шакллари бўйича ҳисоботларни «web» технологияга асосланган ҳолда он-лайн режимда топшириш имкониятини берувчи махсус дастурий таъминотни жорий этиш ишлари ҳозирга қадар якунланмаганлиги таъкидланди.

Юқоридагилардан келиб чиқиб, «Парламент назорати тўғрисида»ги Ўзбекистон Республикаси Қонунининг 21-моддасига асосан Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат статистика қўмитаси раиси Б. Бегаловнинг «Ўзбекистонда статистика маълумотларининг ҳаққонийлиги, ишончлилиги ва очиқлиги масалалари тўғрисида»ги ахбороти маълумот учун қабул қилинсин.

2. Ўзбекистон Республикаси Давлат статистика қўмитаси раиси (Б. Бегалов):

статистика фаолияти самарадорлиги индекси кўрсаткичини янада ошириш;

босқичма-босқич давлат статистика ҳисоботи шакллари бўйича ҳисоботларни он-лайн режимида топшириш имкониятини берувчи махсус дастурий таъминотни амалиётга жорий этиш бўйича ишларни якунига етказиш;

Халқаро валюта жамғармасининг кенгайтирилган маълумотларни тарқатишнинг умумий тизимидан маълумотларни тарқатишнинг махсус стандартига ўтиш чораларини кўрсин.

3. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси:

мамлакатимизда статистика маълумотларининг ҳаққонийлиги, ишончлилиги ва очиқлиги масалалари юзасидан мунтазам мониторинг олиб борсин;

давлат статистика ҳисоботларини тайёрлаш, тарқатиш тизимига ахборот-коммуникация технологияларини жорий этиш, мазкур соҳага оид қонун ҳужжатларини такомиллаштириш мақсадида таклифлар тайёрласин.

4. Мазкур Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари Б. Алиханов зиммасига юклатилсин.

5. Ушбу Қарор қабул қилинган кундан эътиборан кучга киради.