Ўзбекистон Республикаси қишлоқ хўжалиги вазирининг Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясини (кейинги ўринларда — Стратегия) амалга ошириш бўйича биринчи ярим йилликда бажарилган ишлар ҳақидаги ахборотини эшитиш масаласини муҳокама қилиб, Ўзбекистон Республикаси Олий Мажлиси Қонунчилик палатаси таъкидлайдики, жорий йилнинг 5 август куни ўтказилган «ҳукумат соати»да депутатларнинг саволларига жавоб бериш давомида Стратегияни амалга оширишга қаратилган ишлар ҳақида атрофлича тўхталиб ўтди.

Стратегияни амалга ошириш доирасида республика ҳудудларини босқичма-босқич қишлоқ хўжалиги маҳсулотларининг муайян турларини етиштиришга ихтисослаштириш, маҳсулот ишлаб чиқарувчиларнинг моддий манфаатдорлигини ошириш мақсадида дастлаб Жиззах вилоятининг жами 116,3 минг гектар қўшимча ер майдонларини қишлоқ хўжалиги маҳсулотлари етиштиришга ихтисослаштириш ишлари бошлаб юборилди.

Депутатлар таъкидлаганидек, Стратегияда белгиланган вазифаларни 2020 йилда амалга ошириш бўйича чора-тадбирлар Дастурининг ижросини таъминлаш бўйича олиб борилаётган ишлар аҳолининг озиқ-овқат хавфсизлигини таъминлаш, соҳа бошқарувида давлат иштирокини камайтириш ва инвестициявий жозибадорликни ошириш, қулай агробизнес муҳитини яратиш, қишлоқ хўжалигида илм-фан, ахборот хизматлари тизимини ривожлантиришда муҳим аҳамият касб этмоқда.

Қайд этилганидек, пандемия шароитида аҳолининг сифатли ва арзон маҳсулотларга бўлган эҳтиёжини қондириш, қолаверса, маҳсулотлар экспорти барқарорлигини таъминлаш бўйича қатор ишлар амалга оширилмоқда. Хусусан, ўтган даврда 923,2 млрд. сўмлик инвестиция маблағлари ҳисобига 9 та агрологистика маркази ишга туширилди. Жорий йилнинг биринчи ярим йиллигида 481,2 млн. доллар қийматдаги 761,6 минг тонна мева-сабзавот маҳсулотлари экспорт қилинди.

Юқоридагилардан келиб чиқиб, шунингдек сиёсий партиялар фракцияларининг таклифларини инобатга олган ҳолда Ўзбекистон Республикаси Олий Мажлиси Қонунчилик палатаси қарор қилади:

1. Ўзбекистон Республикаси қишлоқ хўжалиги вазири Ж. Ходжаевнинг «Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясида белгиланган вазифаларни 2020 йилда амалга оширишга оид чора-тадбирлар дастурининг ижроси бўйича амалга оширилаётган ишлар тўғрисида»ги ахборотини жорий йилнинг тўққиз ойлик якунларига кўра эшитиш таклифи қўллаб-қувватлансин.

2. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси (Р. Мамутов):

Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясида белгиланган вазифаларни 2020 йилда амалга ошириш бўйича чора-тадбирлар Дастурида белгиланган тадбирларнинг амалга оширилиши ҳолатини доимий мониторинг қилиб борсин;

Ўзбекистон Республикаси қишлоқ хўжалиги вазирининг жорий йил тўққиз ойлик якунлари бўйича Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган Стратегиясини амалга ошириш бўйича бажарилган ишлар юзасидан ахборотини эшитишни ўз вақтида ва самарали ташкил этиш чораларини кўрсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Хаитов зиммасига юклансин.

4. Ушбу Қарор қабул қилинган кундан эътиборан кучга киради.