«Ўзбекистон Республикаси Олий Мажлисининг Қонунчилик палатаси тўғрисида»ги Ўзбекистон Республикаси Конституциявий Қонунининг 12-моддасига ва «Парламент назорати тўғрисида»ги Ўзбекистон Республикаси Қонунининг 14-моддасига мувофиқ, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатаси Фуқароларнинг соғлиғини сақлаш масалалари қўмитасининг Ўзбекистон Республикаси соғлиқни сақлаш вазири А. Шадмановга «Тиббий хизматлар кўрсатиш сифатини яхшилаш ва уларнинг кўламини кенгайтириш мақсадида даволаш-профилактика муассасаларини жиҳозлаш юзасидан кўрилаётган чора-тадбирлар тўғрисида» Ўзбекистон Республикаси Олий Мажлиси Қонунчилик палатасининг парламент сўровини юбориш ҳақидаги таклифи қабул қилинсин.

2. Мазкур Қарор ва парламент сўрови Ўзбекистон Республикаси соғлиқни сақлаш вазири А. Шадмановга юборилсин.

3. Ушбу Қарор қабул қилинган кундан эътиборан кучга киради.

Мамлакатимизда тиббий хизматлар кўрсатиш сифати ва самарадорлигини ошириш ҳамда тиббиёт муассасаларининг моддий-техника базасини мустаҳкамлаш борасида муайян ишлар амалга оширилмоқда.

Давлат бюджетидан соғлиқни сақлаш тизимини молиялаштиришга ажратилаётган маблағлар ҳам йилдан-йилга кўпаймоқда. Жорий йилда соҳага 12,1 трлн. сўм йўналтирилди, бу ўтган йилдагига қараганда 1,3 баробар кўпдир. Давлат тиббиёт ташкилотларини дори воситалари ва тиббий буюмлар билан таъминлаш яхшиланаяпти. Жорий йилда 231 та тиббиёт объектида, жумладан 13 та республика, 44 та вилоят тасарруфидаги муассаса, 59 та туман ва шаҳар тиббиёт бирлашмаси, 99 та қишлоқ, шаҳар оилавий поликлиникаси ва қишлоқ врачлик пункти, 16 та бошқа тиббиёт муассасасида 972,3 млрд. сўмлик қурилиш-таъмирлаш ва жиҳозлаш ишлари олиб борилди.

Тиббиёт муассасаларини жиҳозлашга қаратилган халқаро молия институтлари иштирокидаги 8 та хорижий инвестициявий лойиҳа доирасида жорий йилнинг шу вақтига қадар 75,5 млн. АҚШ доллари миқдоридаги маблағ ўзлаштирилди.

Халқаро молия институтларининг кредитлари, давлат бюджети маблағлари ҳисобидан йил бошидан буён республикадаги тиббиёт муассасаларига 120 турдаги, қиймати 50,0 млн. АҚШ долларига тенг тиббий асбоб-ускуналар етказиб берилди.

Шунингдек, вилоятлардаги кўп тармоқли тиббиёт марказлари 14 та стационар ва мобиль рақамли рентген, 8 та МРТ (1,5 тесла), 6 та ҳудудий онкология муассасаси эса 6,5 млн. АҚШ долларига тенг 15 та 2 турдаги гамма терапия ускунаси билан жиҳозланди.

Шу билан бирга, депутатлар томонидан ҳудудларда аҳолига кўрсатилаётган тиббий хизматлар сифати ва самарадорлигини ўрганиш мобайнида даволаш-профилактика муассасаларини жиҳозлаш борасидаги ишлар етарли даражада ташкил этилмаганлиги маълум бўлди.

Жумладан, қишлоқ оилавий поликлиникаларининг ташкил этилганига икки йилдан ортиқ вақт ўтган бўлса-да, улар бугунги кунга қадар тиббий асбоб-ускуналар билан тўлиқ таъминланмаган. Бундан ташқари ушбу жиҳозларнинг аксарият қисми асосан марказий муассасаларга етказиб берилмоқда. Бу эса, ўз навбатида, қуйи бўғин ҳисобланган қишлоқ врачлик пунктлари, қишлоқ оилавий поликлиникаларида тиббий ёрдам сифати ва самарадорлиги пастлигича қолишига олиб келмоқда.

Тиббиёт муассасаларига етказиб берилган тиббий ускуналарни ўрнатиш, жиҳозлаш ва улардан самарали фойдаланиш билан боғлиқ муаммолар ҳам кўпайиб бормоқда.

Жойларда ўтказилган ўрганишлар шуни кўрсатмоқдаки, тиббий жиҳозларни етказиб беришда демографик омиллар ҳисобга олинмаганлиги тиббий жиҳозларни ўрнатиш ва улардан самарали фойдаланишда муаммоларни юзага келтирмоқда.

«Фаол инвестициялар ва ижтимоий ривожланиш йили» Давлат дастурида даволаш-профилактика муассасаларини жиҳозлаш масалаларини маҳаллий давлат ҳокимияти органлари билан биргаликда амалга ошириши назарда тутилган бўлса-да, Олий Мажлис Қонунчилик палатаси депутатларининг жойлардаги ўрганишлари уларнинг иштироки умуман сезилмаётганлигини кўрсатмоқда.

Хусусан, Тошкент, Жиззах ва Сирдарё вилоятларининг аксарият туманларида тақсимот бўйича ажратилган тиббий жиҳозларни ўрнатиш билан боғлиқ қатор муаммолар мавжудлиги кузатилди.

Юқоридагилардан келиб чиқиб ҳамда «Парламент назорати тўғрисида»ги Ўзбекистон Республикаси Қонунининг 14-моддасига мувофиқ Сиздан 10 кун муддатда қуйидаги масалалар юзасидан асослантирилган тушунтиришлар беришингизни сўраймиз:

аҳолига кўрсатилаётган тиббий хизматлар кўламини кенгайтириш мақсадида ажратилаётган тиббий жиҳозларнинг бирламчи тақсимоти;

йил давомида олинган тиббий жиҳозлардан, айниқса, халқаро молия институтлари кредит линиялари орқали олинган жиҳозлардан самарали фойдаланиш ҳолати;

«Фаол инвестициялар ва ижтимоий ривожланиш йили» Давлат дастурининг 148-бандида назарда тутилган 231 та тиббиёт объектида амалга оширилаётган қурилиш-таъмирлаш ва жиҳозлаш ишларининг бугунги ҳолати.