«Ўзбекистон Республикаси Олий Мажлисининг Қонунчилик палатаси тўғрисида»ги Ўзбекистон Республикаси Конституциявий Қонунининг 12-моддасига ва «Парламент назорати тўғрисида»ги Ўзбекистон Республикаси Қонунининг 14-моддасига мувофиқ, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатаси Инновацион ривожланиш, ахборот сиёсати ва ахборот технологиялари масалалари қўмитасининг Ўзбекистон Республикаси ахборот технологиялари ва коммуникацияларини ривожлантириш вазири Ш.М. Садиковга «Эркин иқтисодий зоналарда замонавий ахборот-коммуникация технологияларини ишлаб чиқариш борасида амалга оширилаётган ишлар ва бу соҳадаги мавжуд муаммоларни бартараф этиш бўйича кўрилаётган чоралар тўғрисида» парламент сўровини юбориш ҳақидаги таклифи қабул қилинсин.

2. Мазкур Қарор ва парламент сўрови Ўзбекистон Республикаси ахборот технологиялари ва коммуникацияларини ривожлантириш вазири Ш.М. Садиковга юборилсин.

3. Ушбу Қарор қабул қилинган кундан эътиборан кучга киради.

Эркин иқтисодий зоналарни ташкил этиш дунёдаги кўплаб давлатлар сингари мамлакатимизда ҳам тўғридан-тўғри хорижий инвестицияларни жалб этишнинг, ташқи иқтисодий алоқаларни ривожлантиришнинг муҳим омилларидан бири ҳисобланади.

Президентимизнинг 2017 йил 25 октябрдаги «Эркин иқтисодий зоналар ва кичик саноат зоналари фаолияти самарадорлигини ошириш борасидаги қўшимча чора-тадбирлар тўғрисида»ги Қарори мамлакатимизда бу борада янада қулай инвестиция муҳитини яратишга, имконият ва имтиёзлар кўламини кенгайтиришга кенг йўл очиб берди.

Айни вақтда мамлакатимизнинг 12 та ҳудудида 21 та эркин иқтисодий зона ташкил қилинган.

«Ўзбектелеком» акциядорлик компанияси масъуллигида Жиззах эркин иқтисодий зонасида 2016 йилда амалга оширилиши лозим бўлган учта йирик лойиҳа бугунги кунга қадар охирига етказилмаган ва лойиҳадаги бу корхоналар ўз фаолиятларини тўхтатган. Унга кўра, «ZTЕ телеком» қўшма корхонаси пассив телекоммуникация ускуналарини ишлаб чиқариши, «Broadboad Solutions» қўшма корхонаси телекоммуникация ускуналарини ишлаб чиқариши, «Smart Vision» қўшма корхонаси IP ва видеотелефонлар ишлаб чиқариши лозим эди.

Маълум бўлишича, ушбу корхоналарда айланма маблағ тўлиқ шакллантирилмаганлиги, хорижий валюта курсининг ошиб кетиши маҳсулот таннархига таъсир кўрсатган ҳамда бутловчи қисмларни олиб келишда хорижий ҳамкорлар билан муаммолар юзага келган.

«Ўзбекистон Республикаси Олий Мажлисининг Қонунчилик палатаси тўғрисида»ги Ўзбекистон Республикаси Конституциявий Қонунининг 12-моддасига ва «Парламент назорати тўғрисида»ги Ўзбекистон Республикаси Қонунининг 14-моддасига мувофиқ Ўзбекистон Республикаси Ахборот технологиялари ва коммуникацияларини ривожлантириш вазирлиги юқоридаги масала юзасидан вазиятни яхшилаш, ўз тармоғидаги «Ўзбектелеком» акциядорлик компаниясининг масъулиятини ошириш ва лойиҳани кечиктириб бўлса ҳам бажариш бўйича, шунингдек, мамлакатимизда рақобатбардош ахборот коммуникация технологияларини ишлаб чиқариш, ялпи ички маҳсулотда уларнинг улушини ошириш юзасидан қандай чора-тадбирлар кўраётганлиги ҳақида ахборот беришингиз сўралади.

Парламент сўровига шу йилнинг 14 ноябрига қадар ёзма равишда жавоб тақдим этишингизни сўраймиз.