Ўзбекистон Республикасининг «Ўзбекистон Республикасининг Марказий банки тўғрисида»ги ва «Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида»ги қонунларига мувофиқ Ўзбекистон Республикаси Марказий банки бошқаруви ва Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти қарор қилади:

1. Ўзбекистон Республикаси Марказий банки бошқаруви ва Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаментининг 2017 йил 17 апрелдаги 343-В ва 14-сон қарори (рўйхат рақами 2886, 2017 йил 23 май) (Ўзбекистон Республикаси қонун ҳужжатлари тўплами, 2017 й., 21-сон, 401-модда) билан тасдиқланган Тижорат банкларида жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича ички назорат қоидаларига иловага мувофиқ ўзгартириш ва қўшимчалар киритилсин.

2. Мазкур қарор расмий эълон қилинган кундан эътиборан кучга киради.

1. 1-бандда:

йигирма тўртинчи хатбоши қуйидаги таҳрирда баён этилсин:

«юқори мансабдор шахслар — чет давлатнинг қонун чиқарувчи, ижро этувчи, маъмурий ёки суд органида, шу жумладан ҳарбий тузилмаларида, ёхуд халқаро ташкилотда доимий, вақтинча ёки махсус ваколат бўйича тайинланадиган ёки сайланадиган, ташкилий-бошқарув вазифаларини бажарувчи ва юридик аҳамиятга эга бўлган ҳаракатларни содир этишга ваколатли шахслар, шунингдек чет давлат корхоналарининг юқори мартабали раҳбарлари, чет давлатнинг таниқли сиёсатчилари ва сиёсий партияларининг таниқли аъзолари (шу жумладан собиқ);»;

ўттизинчи хатбоши қуйидаги таҳрирда баён этилсин:

«учинчи томон — Ўзбекистон Республикасида рўйхатга олинган ва пул маблағлари ёки бошқа мол-мулк билан боғлиқ операцияларни амалга оширувчи Ўзбекистон Республикасининг «Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида»ги Қонунининг 12-моддасида кўрсатилган ташкилотлар;»;

қуйидаги мазмундаги ўттиз биринчи хатбоши билан тўлдирилсин:

«юридик шахсни ташкил этмаган чет эл тузилмаси — чет давлатнинг қонун ҳужжатларига мувофиқ юридик шахс ташкил этмаган ҳолда ташкил этилган ва ўз иштирокчиларининг (пайчиларнинг, ишонч билдирувчиларнинг ёки бошқа шахсларнинг) ёхуд бошқа бенефициарларнинг манфаатларини кўзлаб даромад (фойда) олишга қаратилган фаолиятни амалга ошириш ҳуқуқига эга бўлган ташкилий тузилмадир (фондлар, шерикликлар, ширкатлар, трастлар, жамоавий инвестициялар ва (ёки) ишончли бошқарувнинг бошқа шакллари).».

2. 3-банднинг биринчи хатбошиси қуйидаги таҳрирда баён этилсин:

«3. Тижорат банкларининг ички назорат тизимининг асосий вазифалари, улар тўғридан-тўғри ёки тўлов агентлари ва (ёки) тўлов субагентлари орқали ҳаракат қилишидан қатъи назар, қуйидагилардан иборат:».

3. 5-бандда:

биринчи хатбоши «кенгашида» деган сўз «кузатув кенгашида» деган сўзлар билан алмаштирилсин;

бешинчи хатбоши қуйидаги таҳрирда баён этилсин:

«унинг тижорат банкининг раҳбарияти, шу жумладан кузатув кенгаши ва унинг қўмиталари, бошқаруви, бошқа бўлинмалари, ички аудит хизмати ҳамда чет элдаги шуъба банклари, филиаллари ва ваколатхоналари, шунингдек тўлов агентлари ва тўлов субагентлари билан ўзаро муносабати;»;

олтинчи хатбоши қуйидаги таҳрирда баён этилсин:

«ўзининг функцияларини бажариш учун зарур бўлган маълумотларни олиш ҳуқуқига эга бўлиши, шунингдек мазкур маълумотларни тақдим этиш масалалари юзасидан ҳамкорлик қилиш бўйича тижорат банкининг бошқа бўлинмалари ва шуъба банклари, чет элдаги филиаллари ва ваколатхоналари, тўлов агентлари ва тўлов субагентлари ходимларининг мажбурияти;».

4. Қуйидаги мазмундаги 5¹-банд билан тўлдирилсин:

«5¹. Ички назорат хизмати ўз функцияларини бажаришга тўсқинлик қилувчи ҳар қандай таъсирлардан қочиш мақсадида банкнинг фойда олишга қаратилган бўлинмалари раҳбарларидан мустақил ҳисобланади.

Ушбу мустақиллик қуйидаги жиҳатлар билан таъминланади:

Ички назорат хизмати раҳбари ва ходимларини тайинлаш, лавозимидан озод этиш, шунингдек уларнинг фаолиятини баҳолаш ва мукофот тўловлари миқдори (иш ҳақи, бонуслар ва бошқалар) тўғрисидаги қарорлар фақат кузатув кенгаши томонидан қабул қилинади;

Ички назорат хизмати раҳбари банкнинг фойда олишга қаратилган бўлинмаларини бошқариш ва операцияларни амалга ошириш бўйича ваколатга ва молиявий мажбуриятларга эга бўла олмайди, шунингдек бошқа лавозимларни қўшиб олиб боришга йўл қўйилмайди.».

5. 6-бандда:

қуйидаги мазмундаги олтинчи хатбоши билан тўлдирилсин:

«Ички назорат хизматининг тўлов агентлари ва тўлов субагентлари билан ўзаро ишлаш тартиби;»;

олтинчи — ўн саккизинчи хатбошилар тегишли равишда еттинчи — ўн тўққизинчи хатбошилар деб ҳисоблансин;

ўн саккизинчи хатбоши қуйидаги таҳрирда баён этилсин:

«Ички қоидалар тўлов агентлари ва тўлов субагентларига, шунингдек, тижорат банкининг барча бўлинмаларига ҳамда чет элдаги шуъба банкларига, филиалларига ва ваколатхоналарига ижро учун мажбурийдир.».

6. Қуйидаги мазмундаги 6²-банд билан тўлдирилсин:

«6². Банклар, улар ва уларнинг агентлари ва субагентлари фаолият кўрсатадиган мамлакатларнинг ваколатли органлари фойдаланиши мумкин бўлган тўлов агентлари ва тўлов субагентларининг янгиланган реестрини юритиши керак.».

7. 7-банд қуйидаги таҳрирда баён этилсин:

«7. Тижорат банкининг ички назорат тизими банк ишининг жиҳатлари, фаолиятининг асосий йўналишлари, агентлар, субагентлар, мижозлар базаси ва мижозлар ҳамда уларнинг операциялари билан боғлиқ таваккалчилик даражасини ҳисобга олган ҳолда ташкил этилади.».

8. 11-банднинг биринчи хатбошисидан «тижорат банки бошқаруви раисининг буйруғи билан лавозимига тайинланади ва озод этилади, улар» деган сўзлар чиқариб ташлансин.

9. 22-банднинг «б» кичик бандида:

еттинчи хатбоши қуйидаги таҳрирда баён этилсин:

«жисмоний шахслар томонидан эквиваленти 100 АҚШ долларидан ошган миқдорда чет эл валютасининг сотиб олиниши;»;

тўққизинчи хатбоши «тангаларини,» деган сўздан кейин «ўлчовли ёмбиларини,» деган сўзлар билан тўлдирилсин;

қуйидаги мазмундаги ўнинчи хатбоши билан тўлдирилсин:

«банк номидан тўлов агенти ёки тўлов субагенти томонидан базавий ҳисоблаш миқдорининг 50 бараварига тенг ёки ундан ортиқ миқдордаги нақд пул маблағларини банк карталарига, шу жумладан учинчи шахсларнинг банк карталарига ўтказиш учун қабул қилинишида;».

10. Қуйидаги мазмундаги 22¹-банд билан тўлдирилсин:

«22¹. Тўлов агентлари ва тўлов субагентлари, агар агентлик ва (ёки) субагентлик шартномасида кўрсатилган бўлса, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисидаги қонун ҳужжатлари талабларига риоя қилган ҳолда, мижозни лозим даражада текшириш бўйича чораларни кўриш мақсадида мижознинг шахсини текшириш ва идентификация қилишни мумкин.».

11. 23-банднинг ўн иккинчи хатбошиси қуйидаги таҳрирда баён этилсин:

«Мижозни лозим даражада текшириш имконияти мавжуд бўлмаган тақдирда тижорат банки, шу жумладан, у ўзининг тўлов агентлари ва (ёки) субагентлари орқали ҳаракат қилганда, бу ҳақда махсус ваколатли давлат органига хабар бериши ва бундай мижоз билан ҳамкорлик муносабатларига киришиш ёки бундай мижознинг операцияларини амалга оширишдан воз кечиши ёхуд у билан ҳар қандай амалий иш муносабатларини тўхтатиши лозим.».

12. 25-банддан «Тижорат банки томонидан» деган сўзлар чиқариб ташлансин.

13. Қуйидаги мазмундаги 29¹-банд билан тўлдирилсин:

«29¹. Юридик шахсни ташкил этмаган чет эл тузилмаларига нисбатан ушбу Қоидалар билан юридик шахслар учун ўрнатилган талаблар қўлланилади.».

14. 33-бандда:

қуйидаги мазмундаги еттинчи хатбоши билан тўлдирилсин:

«корреспондентлар ўртасида мажбуриятларнинг аниқ ва тўлиқ тақсимланишини таъминлаш.»;

еттинчи хатбоши саккизинчи хатбоши деб ҳисоблансин.

15. 38-бандда:

иккинчи хатбошидаги «(шохобча, бўлим ва шу кабилар)» деган сўзлар «(тўлов агентлари, тўлов субагентлари, шохобча, бўлим ва шу кабилар)» деган сўзлар билан алмаштирилсин;

тўртинчи хатбоши қуйидаги таҳрирда баён этилсин:

«жўнатиладиган пул ўтказмаларини мижоз-жўнатувчи ҳақидаги (жўнатувчининг номи; шахсни тасдиқловчи ҳужжат (паспорт ёки унинг ўрнини босадиган ҳужжат) серияси ва рақами — жисмоний шахслар учун; агар операция жараёнида ҳисобварақ ишлатилган бўлса, у ҳолда унинг рақами ёки операциянинг хос рақами; жўнатувчининг манзили ёки давлат идентификация рақами ёхуд мижознинг идентификация рақами, жисмоний шахслар учун эса — туғилган санаси ва жойи) ва олувчи ҳақидаги (олувчининг номи; агар операция жараёнида ҳисобварақ ишлатилган бўлса, у ҳолда унинг рақами ёки операциянинг хос рақами) аниқ маълумотлар билан бирга юборилишини таъминлашлари;»;

бешинчи хатбошидаги «фамилияси, исми, отасининг исми (агар мавжуд бўлса)» деган сўзлар «жўнатувчининг номи» деган сўзлар билан алмаштирилсин;

олтинчи хатбоши қуйидаги таҳрирда баён этилсин:

«норезидент-банклардан ва халқаро пул ўтказмалари тизимларидан базавий ҳисоблаш миқдорининг 50 бараварига тенг ёки ундан ошадиган суммадаги пул маблағларини жўнатувчилари ҳақидаги минимал маълумотларни (жўнатувчининг номи, шахсни тасдиқловчи ҳужжат (паспорт ёки унинг ўрнини босадиган ҳужжат) серияси ва рақами — жисмоний шахслар учун; жўнатувчининг манзили ёки давлат идентификация рақами ёхуд мижознинг идентификация рақами, жисмоний шахслар учун эса — туғилган санаси ва жойи; агар операция жараёнида ҳисобварақ ишлатилган бўлса, у ҳолда унинг рақами ёки операциянинг хос рақами) тақдим этилишини талаб қилишлари;».

16. Қуйидаги мазмундаги 39¹-банд билан тўлдирилсин:

«39¹. Тижорат банклари, пул ўтказмаси бўйича ҳам жўнатувчи ва ҳам қабул қилувчи томонларга хизмат кўрсатган тақдирда, қуйидагиларга мажбурдирлар:

шубҳали операция тўғрисида хабар юбориш заруриятини аниқлаш мақсадида ҳам жўнатувчи томондан, ҳам қабул қилувчи томондан олинган барча маълумотларни ҳисобга олиш;

шубҳали пул ўтказмаси билан боғлиқ бўлган ҳар қандай мамлакатда шубҳали операция тўғрисидаги хабарни ваколатли органларга юбориш ва пул ўтказмаси тўғрисидаги тегишли маълумотларни тақдим этиш.».

17. 43-банднинг биринчи хатбоши қуйидаги таҳрирда баён этилсин:

«43. Мижоз ва мижознинг бенефициар мулкдорини идентификациялашда тижорат банки, шу жумладан, у ўзининг тўлов агентлари ва (ёки) тўлов субагентлари орқали ҳаракат қилганда, олинган маълумотларни қонун ҳужжатларида белгиланган тартибда махсус ваколатли давлат органи томонидан шакллантириладиган ва тижорат банкларига тақдим қилинадиган Рўйхат ҳамда жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатлар рўйхати билан солиштириб чиқиши шарт.».

18. 49-банднинг ўн бешинчи хатбошси «тангаларини» деган сўздан кейин «, ўлчовли ёмбиларини» деган сўзлар билан тўлдирилсин.

19. 52-банднинг биринчи хатбошиси қуйидаги таҳрирда баён этилсин:

«52. Тижорат банклар, шу жумладан, улар ўзининг тўлов агентлари ва (ёки) тўлов субагентлари орқали операцияларни амалга оширишда уларнинг иштирокчилари идентификация маълумотларини Рўйхат билан солиштиришлари шарт.».

20. 55-бандда:

«а» кичик банди қуйидаги таҳрирда баён этилсин:

«а) Рўйхатга киритилган шахслар ёхуд Рўйхатга киритилган шахснинг эгалиги ёки назоратидаги ташкилотлар, Рўйхатга киритилган ташкилотнинг бевосита ёхуд билвосита мулкдори ёки назорат қилувчи шахслар;»;

«ж» кичик банди чиқариб ташлансин.

21. 85-банд қуйидаги таҳрирда баён этилсин:

«85. Электрон шаклда тўлдирилган анкеталар тижорат банкининг мижозларнинг идентификациясини амалга оширувчи ходимларига, шунингдек тўлов агентлари ва тўлов субагентларига мижоз тўғрисидаги маълумотларни текшириш учун доимий режимда тезкор фойдаланиш имкониятини берувчи электрон базада сақланади.».

22. 89-банд «лозим даражада текширишга доир материалларни» деган сўзлардан кейин «, ҳисобрақамлар бўйича файлларни ва хизмат ёзишмаларини, ўтказилган ҳар қандай таҳлил натижаларини» деган сўзлар билан тўлдирилсин.

23. Қуйидаги мазмундаги 96¹-банд билан тўлдирилсин:

«96¹. Тижорат банклари тўлов агентлари ва субагентларини ушбу Қоидалар ва банкнинг ички қоидалари талабларига риоя қилишларини таъминлашлари шарт.

Тижорат банклари ўз тўлов агентлари ва тўлов субагентлари томонидан ушбу Қоидаларнинг талабларини бузганлик учун жавобгар ҳисобланади.».

24. 3-илова қуйидаги мазмундаги 1¹ ва 1²-бандлар билан тўлдирилсин::

«1¹. Мижознинг бенефициар мулкдори тўғрисидаги маълумотлар.

1². Мижознинг юқори мансабдор шахс (унинг оила аъзоси ёки унга яқин шахс) эканлиги тўғрисида белги.».