Давлат ва жамият ривожига, тараққиётига, халқнинг адолат ва қонунийликка бўлган ишончига жиддий путур етказиши мумкин бўлган коррупциянинг олдини олиш ва унга қарши кескин курашиш халқаро ва миллий миқёсдаги муҳим вазифалардан бири ҳисобланади.

Асримизнинг энг аянчли иллати деб эътироф этилган коорупцияга қарши курашиш учун халқаро ҳамжамият ўз кучларини бирлаштиргани ҳам бежиз эмас. Бирлашган Миллатлар Ташкилоти Коррупцияга қарши Конвенцияни қабул қилди ва Ўзбекистон Республикаси унга 2008 йил 7 июлда қўшилди. Шундан сўнг «Коррупцияга қарши курашиш тўғрисида»ги Қонун қабул қилинди. Қонун нормалари асосида коррупцияга қарши курашиш бўйича давлат дастури ишлаб чиқилди. Ўзбекистон Республикаси Президенти Ш. Мирзиёев Ўзбекистон Республикаси Конституцияси қабул қилинганининг 26 йиллигига бағишланган тантанали маросимдаги маърузасида бу борадаги илғор хорижий тажриба ва Конституциямиз талаблари асосида Ўзбекистон Республикаси Олий Мажлиси палаталарида Коррупцияга қарши курашиш бўйича алоҳида қўмиталар ташкил қилишни таклиф этган эди.

Олиб борилаётган кенг кўламли ишлар натижасида фуқароларда жиноятчиликка қарши курашишга ва ҳуқуқбузарликларнинг олдини олишга дахлдорлик ҳисси шаклланди. Айниқса, бу борада фуқаролик жамияти институтларининг тегишли давлат органлари билан ҳамкорлиги кучаймоқда. Давлат хизматларини кўрсатишда замонавий ахборот-коммуникация технологияларини жорий этиш коррупция ҳолатларининг олдини олишда муҳим механизм ролини бажармоқда.

Бироқ, коррупция жиноятларининг олдини олиш ва уларга қарши курашиш борасидаги фаолиятда ечимини кутаётган муаммолар ҳамда фойдаланилмаётган имкониятлар мавжуд.

Коррупцияга қарши курашишда ҳуқуқни муҳофаза қилувчи органлар қанчалик ҳаракат қилмасин, бу салбий иллатга муросасиз бўлиш, унга қарши курашиш устидан таъсирчан давлат ва жамоат назоратини ўрнатмасдан, айниқса бу ишларни мувофиқлаштириб, тизимли асосда изчил давом эттирмасдан самарали курашишни ташкил этиб бўлмайди.

Халқаро тажриба коррупцияга қарши курашишда тегишли ҳуқуқий асосларни янада такомиллаштириб бориш, жавобгарликнинг муқаррарлиги принципини амалда таъминлаш, норматив-ҳуқуқий ҳужжатлар лойиҳаларининг коррупцияга қарши экспертизасини ўтказиш амалиётини янада такомиллаштириш, давлат органларининг мансабдор шахслари фаолияти устидан кенг жамоатчилик назоратини ўрнатишда парламент ва унинг назорат институти кутилган самара беришини кўрсатди.

Илғор хорижий тажриба асосида ва парламентнинг барча бўғиндаги давлат органларида коррупцияга қарши курашишни янада кучайтиришга вакиллик органи сифатида муносиб ҳисса қўшишини таъминлаш, 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид Давлат дастурининг 4-банди ижросини таъминлаш ҳамда коррупцияга қарши курашиш соҳасидаги қонун ижодкорлиги, назорат-таҳлил фаолиятини тизимлаштириш ва фаоллаштириш мақсадида Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатасининг Коррупцияга қарши курашиш ва суд-ҳуқуқ масалалари қўмитаси ташкил этилсин.

2. Ўзбекистон Республикаси Олий Мажлиси Қонунчилик палатасининг Коррупцияга қарши курашиш ва суд-ҳуқуқ масалалари қўмитасининг асосий вазифалари этиб қуйидагилар белгилансин:

давлат ва жамият қурилиши, коррупцияга қарши курашиш, суд-ҳуқуқ масалалари бўйича қонун лойиҳаларини ишлаб чиқиш;

коррупцияга қарши курашиш ва суд-ҳуқуқ масалалари бўйича қонун ҳужжатларини такомиллаштириш юзасидан таклифлар тайёрлаш ҳамда амалдаги қонун ҳужжатларида коррупцияга олиб келувчи нормаларнинг мавжудлигини аниқлаш нуқтаи назаридан чуқур таҳлил қилиш;

давлат ва жамият қурилиши, коррупцияга қарши курашиш, суд-ҳуқуқ масалалари бўйича Ўзбекистон Республикаси қонунлари ҳамда Қонунчилик палатаси томонидан қабул қилинадиган қарорларнинг ижросини назорат қилиш;

давлат органлари ва ташкилотларида коррупцияга қарши курашиш бўйича ички дастурларни ишлаб чиқиш ва амалга ошириш жараёни устидан парламент назоратини амалга ошириш;

давлат органлари ва ташкилотларининг коррупцияга қарши курашиш ва суд-ҳуқуқ соҳасидаги ҳуқуқни қўллаш фаолиятини тизимли равишда ўрганиб бориш;

қўмита йиғилишларида давлат органлари ва ташкилотлари мансабдор шахсларининг коррупцияга қарши курашиш ва суд-ҳуқуқ соҳасидаги фаолияти юзасидан эшитувларини ўтказиш;

давлат ва жамият қурилиши, коррупцияга қарши курашиш, суд-ҳуқуқ масалалари бўйича жисмоний ва юридик шахсларнинг мурожаатлари, амалга оширилган ишлар юзасидан Қонунчилик палатасининг бошқа депутатларини хабардор қилиш.

3. Ўзбекистон Республикаси Олий Мажлиси Қонунчилик палатасининг Қонунчилик ва суд-ҳуқуқ масалалари қўмитаси тугатилсин.

4. Ушбу Қарор қабул қилинган кундан эътиборан кучга киради.