Ўзбекистон Республикаси Президентининг 2020 йил 2 мартдаги ПФ-5953-сонли Фармони билан тасдиқланган «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид Давлат дастурида ҳамда Ўзбекистон Республикаси Олий Мажлиси Қонунчилик палатаси Кенгашининг 2020 йил 28 январдаги 73-IV-сонли Қарори билан тасдиқланган «Ўзбекистон Республикаси Президенти Ш.М. Мирзиёевнинг 2020 йил 20 январда Олий Мажлис Қонунчилик палатаси ва Сенатининг биринчи ташкилий мажлисларида ҳамда 21 январда Олий Мажлис палаталарининг қўшма мажлисида сўзлаган нутқларида белгиланган устувор вазифаларни амалга ошириш бўйича чора-тадбирлар дастури»да назарда тутилган вазифалар бажарилишини таъминлаш мақсадида, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатасининг 2020 йил 16 апрелдаги № 224-IV-сонли Қарори билан тасдиқланган «Ўзбекистонда коронавирус инфекцияси (COVID-19) тарқалишига қарши курашиш даврида Ўзбекистон Республикаси Олий Мажлиси Қонунчилик палатаси мажлисларини видеоконференцалоқа режимида ўтказиш бўйича вақтинчалик Регламент» (Ўзбекистон Республикаси Олий Мажлиси палаталарининг Ахборотномаси, 2020 йил, № 4, 269-модда) 3-моддасининг иккинчи қисми қуйидаги таҳрирда баён этилсин:

«Видеоконференцалоқа режимида ўтказиладиган мажлисларда Ўзбекистон Республикасининг Конституциясини қабул қилишга, унга ўзгартишлар ва қўшимчалар киритишга йўл қўйилмайди».

2. Ушбу Қарор қабул қилинган кундан эътиборан кучга киради.