Ўзбекистон Республикаси Олий Мажлисининг Қонунчилик палатаси Коррупцияга қарши курашиш ва суд-ҳуқуқ масалалари қўмитасининг «Фуқаролик ҳолати далолатномалари тўғрисида»ги қонун лойиҳасини рад қилиш ҳақидаги таклифини кўриб чиқиб таъкидлайдики, мазкур қонун лойиҳаси Қонунчилик палатасининг 2019 йил 22 июлдаги мажлисида биринчи ўқишда қабул қилиниб, депутатлар томонидан концептуал жиҳатдан маъқулланган бўлсада, лойиҳани иккинчи ўқишга тайёрлаш жараёнида бир қатор муаммолар вужудга келган.

Жумладан, қонун лойиҳасида мазкур қонунни қабул қилиниши муносабати билан Ўзбекистон Республикаси Оила кодексининг VII бўлимини (Фуқаролик ҳолати далолатномаларини қайд этиш) чиқариб ташлаш таклиф этилган. Бу эса Оила кодексидаги меъёрларнинг мантиқий давомийлигини бузиш билан бирга, унинг тузилишига путур етказилишига олиб келади.

Бундан ташқари, қонун лойиҳасидаги айрим қоидалар мазкур қонун лойиҳасининг ҳуқуқий жиҳатдан тартибга солиш предмети билан боғлиқ эмас, яъни лойиҳада ФҲДЁ органлари ходимларининг сонини белгилаш, уларга мартаба даражалари бериш, ушбу ходимларнинг малакасини ошириш тартиби ва шунга ўхшаган меъёрлар ҳам мавжуд.

Мазкур қонуннинг қабул қилиниши фуқаролик ҳолати далолатномаларини қайд этишнинг амалдаги тартибини ўзгартирмаслиги, яъни уни қонун шаклида қабул қилиш ижтимоий-иқтисодий, ҳуқуқий ва бошқа оқибатларни келтириб чиқармайди. Шунингдек қонун лойиҳасида мавжуд бўлган ички қарама-қаршиликлар ва ҳаволаки нормалар қонуннинг тўғридан-тўғри амал қилишини таъминлаш бўйича талабларга жавоб бермайди.

Юқорида баён этилганларидан келиб чиқиб ҳамда Ўзбекистон Республикаси Олий Мажлиси Қонунчилик палатаси Регламентининг 135¹ ва 135²-моддаларига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Вазирлар Маҳкамаси томонидан 2019 йил 11 июнда киритилган «Фуқаролик ҳолати далолатномалари тўғрисида»ги ҚЛ-509-сонли Ўзбекистон Республикаси қонуни лойиҳаси рад этилсин ва қонунчилик ташаббуси ҳуқуқи субъектига қайтарилсин.

2. Ушбу Қарор Ўзбекистон Республикаси Вазирлар Маҳкамасига юборилсин.

3. Ушбу Қарор эълон қилинган кунда эътиборан кучга киради.