Ўзбекистон Республикаси Конституциясининг 78-моддасига, «Ўзбекистон Республикасида маъмурий-ҳудудий тузилиш масалаларини ҳал этиш тартиби тўғрисида»ги Ўзбекистон Республикаси Қонунининг 5 ва 13-моддаларига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Вазирлар Маҳкамасининг таклифи қабул қилиниб, Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари чегаралари ўзгартирилсин.

2. Наманган вилояти Тўрақўрғон тумани ҳудудининг 183 гектар майдони, Косонсой тумани ҳудудининг 528 гектар майдони, Наманган тумани ҳудудининг 2592 гектар майдони, Янгиқўрғон тумани ҳудудининг 362 гектар майдони — жами 3665 гектар майдон Наманган вилоятининг Наманган шаҳри таркибига ўтказилсин.

3. Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари чегараларининг тавсифи ҳамда график чизмаси Ўзбекистон Республикаси Вазирлар Маҳкамаси томонидан тақдим этилган 1-2-иловаларга мувофиқ тасдиқлансин.

4. Ўзбекистон Республикаси Вазирлар Маҳкамаси ушбу Қарорни бажариш бўйича комплекс чора-тадбирлар амалга оширилишини таъминласин.

5. Мазкур Қарор Ўзбекистон Республикаси Олий Мажлисининг Сенатига юборилсин.

6. Ушбу Қарор қабул қилинган кундан эътиборан кучга киради.