2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид Давлат дастурининг 53-бандини ижро этиш мақсадида Ўзбекистон Республикаси Бош прокуратураси томонидан манфаатдор вазирлик ва идоралар билан биргаликда Ўзбекистон Республикаси Президентининг «Ўзбекистон Республикасида коррупцияга қарши курашиш тизимини такомиллаштиришга доир қўшимча чора-тадбирлар тўғрисида»ги Фармони ва «Ўзбекистон Республикасининг Коррупцияга қарши курашиш агентлиги фаолиятини ташкил этиш тўғрисида»ги қарори лойиҳалари тайёрланди. Ушбу лойиҳаларда коррупцияга қарши курашиш органини тузиш назарда тутилган.

Мазкур органнинг ташкил этилиши:

мамлакатда коррупция ҳолатининг тизимли таҳлил қилинишини таъминлашга, коррупция хавфи остида қолаётган соҳаларни аниқлашга;

коррупциянинг олдини олиш ва унга қарши курашиш соҳасидаги давлат сиёсатини шакллантириш ҳамда амалга оширишга;

коррупцияга оид жиноятларни ўрганиш тизимини комплекс таҳлил ва мониторинг қилиш орқали коррупциянинг олдини олиш ҳамда унга қарши курашишнинг ҳуқуқий асосларини такомиллаштиришга;

коррупциянинг олдини олиш ва унга қарши курашиш фаолиятининг шаффофлиги ва очиқлигини таъминлашга, ушбу мақсадда оммавий ахборот воситалари ва фуқаролик жамиятининг бошқа институтлари билан самарали ҳамкорлик қилишга кўмаклашади.

Юқорида баён этилганларни инобатга олиб ҳамда «Ўзбекистон Республикаси Олий Мажлисининг Қонунчилик палатаси тўғрисида»ги Ўзбекистон Республикаси Конституциявий Қонунининг 9 ва 16-моддаларига ҳамда «Ўзбекистон Республикаси Олий Мажлисининг Сенати тўғрисида»ги Ўзбекистон Республикаси Конституциявий Қонунининг 9 ва 16-моддаларига мувофиқ Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. Коррупцияга қарши курашиш тизимини такомиллаштириш, коррупцияга оид ҳуқуқбузарликлар содир этиш сабаблари ва шароитларини аниқлаш ҳамда бартараф этиш, жамият ва давлат ҳаёти ҳамда фаолиятининг барча соҳаларида коррупциянинг олдини олишга ва унга қарши курашишга қаратилган давлат сиёсатини шакллантириш ҳамда рўёбга чиқариш самарадорлигини ошириш, шунингдек коррупцияга қарши курашиш соҳасидаги халқаро рейтингларда Ўзбекистон Республикаси тутган ўринларни яхшилаш мақсадида коррупцияга қарши курашиш органи — Ўзбекистон Республикасининг Коррупцияга қарши курашиш агентлигини тузиш ва Ўзбекистон Республикаси Президентининг тегишли қарорларини қабул қилиш мақсадга мувофиқ деб ҳисоблансин.

2. Ушбу Қўшма қарор Ўзбекистон Республикаси Президентига маълумот учун юборилсин.

3. Мазкур Қўшма қарор қабул қилинган кундан эътиборан кучга киради.