«Ўзбекистон Республикаси Олий Мажлиси Қонунчилик палатасининг Регламенти тўғрисида»ги Ўзбекистон Республикаси Қонунининг 6-моддасига мувофиқ ҳамда Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси ишчи гуруҳи томонидан «Мобил қурилмаларнинг IMEI-кодларини рўйхатдан ўтказишни соддалаштириш ҳақида»ги электрон жамоавий мурожаат юзасидан тайёрланган маърузани эшитиб,у бўйича ўтказилган муҳокамалар асосида Ўзбекистон Республикаси Олий Мажлиси Қонунчилик палатаси Кенгаши қарор қилади:

1. Инновацион ривожланиш, ахборот сиёсати ва ахборот технологиялари масалалари қўмитаси ишчи гуруҳи томонидан «Мобил қурилмаларнинг IMEI-кодларини рўйхатдан ўтказишни соддалаштириш ҳақида»ги электрон жамоавий мурожаат юзасидан тайёрланган маъруза маълумот учун қабул қилинсин ҳамда Ўзбекистон Республикаси Вазирлар Маҳкамасига юборилсин.

2. Мобил қурилмаларнинг IMEI-кодларини рўйхатдан ўтказиш бўйича жорий этилган тизим:

а) ишлатиладиган миллий ахборот тизимлари ва ахборот ресурсларининг ахборот хавфсизлиги даражасини оширишга;

б) фуқаролар томонидан турли хил электрон хизматларни олиши учун хавфсиз платформани шакллантиришга;

в) фуқаролар томонидан йўқотилган ёки ўғирлатиб қўйилган мобил қурилмалардан фойдаланишнинг олдини олишга;

г) радиотехник ускуналарнинг импорт оқимини легаллаштириш ва уларни стандартлаштиришга кенг имкон яратиши эътиборга олинсин.

3. Мобил қурилмаларнинг IMEI-кодларини рўйхатдан ўтказиш амалиётини Вазирлар Маҳкамасининг 2018 йил 22 октябрдаги «Ўзбекистон Республикасида мобил қурилмаларни ҳисобга олиш тизимини тартибга солиш чора-тадбирлари тўғрисида» 847-сонли ҳамда 2019 йил 17 сентябрдаги «Ўзбекистон Республикаси ҳудудида фойдаланилаётган, сотиш ёки шахсий фойдаланиш учун олиб келинадиган ва ишлаб чиқариладиган мобил қурилмаларни рўйхатдан ўтказиш тартиби тўғрисида»ги 778-сонли қарорларида белгиланган Қоидаларга асосан давом эттириш мақсадга мувофиқ ва асосли эканлиги қайд этилсин.

4. Ўзбекистон Республикаси Вазирлар Маҳкамасига:

Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси ишчи гуруҳи томонидан «Мобил қурилмаларнинг IMEI-кодларини рўйхатдан ўтказишни соддалаштириш ҳақида»ги электрон жамоавий мурожаат юзасидан тайёрланган маърузасида тақдим этилган таклиф ва камчиликларни инобатга олган ҳолда мобил қурилмаларнинг IMEI-кодларини рўйхатдан ўтказиштизимини янада такомиллаштириш бўйича ишларни давом эттириш тавсия этилсин.