Ўзбекистон Республикаси ва Америка Қўшма Штатлари ҳукуматлари ўртасида 2001 йил 5 июнда имзоланган «Мудофаа соҳасидаги муносабатларни ривожлантириш ва оммавий қирғин қуролларининг тарқалишини олдини олиш бўйича ҳамкорлик тўғрисида»ги Битим (бундан кейин — Ҳукуматлараро битим) ҳамда Ўзбекистон Республикаси Мудофаа вазирлиги ва Америка Қўшма Штатлари Мудофаа вазирлиги ўртасида 2000 йил 2 июнда имзоланган «Оммавий қирғин қуролларини йўқ қилиш, уларнинг тарқалишини олдини олиш, мудофаа ва ҳарбий алоқаларни мустаҳкамлаш бўйича ҳамкорлик битими доирасида чегараларни ҳимоя қилишга кўмаклашиш тўғрисида»ги Ижро этувчи битим (бундан кейин — Ижро этувчи битим) бўйича олинган мажбуриятларни бажариш юзасидан:

1. Қуйидагилар маълумот учун қабул қилинсин:

ҳукуматлараро ва ижроия келишувлар доирасида Америка Қўшма Штатлари Ҳукумати томонидан Давлат чегараси орқали ўтказиш пунктларида радиоактив материалларни аниқлаш ускуналари ва алоқа тизимларини ўрнатиш шаклида Ўзбекистон Республикасига техник ёрдам кўрсатиш лойиҳасини ишлаб чиқилганлиги;

АҚШ Мудофаа вазирлигининг Таҳдидларни камайтириш агентлиги томонидан лойиҳанинг ижрочиси сифатида «Wашингтон Интернатионал, Инc.»га тегишли «Wашингтон Гроуп Интернатионал» (АҚШ) компанияси белгиланган.

2. Лойиҳани амалга ошириш бўйича ижро этувчи органлар этиб Давлат божхона қўмитаси (Б.А. Матлюбов) ва Ўзбекистон Республикаси Миллий хавфсизлик хизмати Давлат чегарасини қўриқлаш қўмитаси (И.И. Ибрагимов) белгилансин ҳамда уларга ўрнатиладиган ускуналардан самарали фойдаланишни таъминлаш, ҳисобга олиш ва улардан фойдаланишни назорат қилиш масъулияти юклатилсин.

3. Лойиҳани амалга ошириш доирасида Ҳукуматлараро келишув шартларига мувофиқ қуйидагилар тўловдан озод қилинади:

божхона ва бошқа мажбурий тўловлар, йиғимлардан — АҚШ ҳукумати маблағлари ҳисобидан олиб кириладиган товарлар (ишлар, хизматлар);

«Washington Group International» ва «Washington International, Inc.» компаниялари Ўзбекистон Республикаси ҳудудида ундириладиган солиқлар, йиғимлар ва бошқа мажбурий тўловлардан — пудрат ташкилотлари, шунингдек ушбу компаниялар ва пудрат ташкилотлари ходимлари;

Ўзбекистон Республикаси ҳудудида ундириладиган солиқлардан — «Washington Group International» ва «Washington International, Inc.» томонидан Ўзбекистон Республикаси ҳудудида сотиб олинадиган товарлар ва хизматлар.

4. «Washington International, Inc.» компаниясига АҚШ Ҳукумати томонидан ажратилган маблағлар доирасида лойиҳаларни амалга ошириш учун Ўзбекистон Республикаси ташкилотлари билан тузилган пудрат шартномалари (контрактлари) бўйича товарлар (ишлар ва хизматлар) ҳақини чет эл валютасида тўлашга рухсат берилсин.

5. Ўзбекистон Республикаси Ташқи ишлар вазирлиги (Э.М. Ғаниев) ва Ички ишлар вазирлиги (З.А. Алматов) Давлат божхона қўмитаси ҳамда Миллий хавфсизлик хизмати Давлат чегараларини қўриқлаш қўмитасининг сўровномалари асосида лойиҳани амалга ошириш доирасида ҳеч қандай йиғимлар ва бошқа тўловларни ундирмасдан қуйидагиларни таъминлаши лозим:

лойиҳада иштирок этаётган хорижий мутахассисларга лойиҳани амалга ошириш муддатига визаларни расмийлаштириш;

ушбу лойиҳани амалга оширишда қатнашаётган хорижий мутахассисларни вақтинчалик рўйхатдан ўтказиш ва рўйхатдан ўтиш муддатини узайтириш.

6. «Ўзстандарт» агентлиги (Р.А. Бўриев) лойиҳани амалга ошириш доирасида Ўзбекистон Республикаси ҳудудига олиб кирилаётган маҳсулотларнинг белгиланган тартибда сертификатланишини таъминласин.

7. Мазкур қарор ижросини назорат қилиш Ўзбекистон Республикаси Бош вазири Ш.М. Мирзиёев ва Ўзбекистон Республикаси Президенти ҳузуридаги Миллий хавфсизлик кенгаши котиби Р.Э. Мирзаевга юклатилсин.