Мева-сабзавот маҳсулотларини сақлаш бўйича замонавий технологияларни жорий этиш, шунингдек, Ўзбекистон Республикаси ва Корея Республикаси ўртасида қишлоқ хўжалиги соҳасидаги ҳамкорликни янада ривожлантириш мақсадида:

1. Корея Республикаси Ҳукумати томонидан Ўзбекистон Республикаси Ҳукуматига «Паст ҳароратли омборхоналарни жорий қилиш орқали Ўзбекистонда қишлоқ хўжалигини ривожлантиришни қўллаб-қувватлаш» лойиҳасини (бундан кейин — лойиҳа) амалга оширишни молиялаштириш учун 3,5 миллион АҚШ доллари миқдорида грант ажратилиши маъқулланганлиги маълумот учун қабул қилинсин. Мазкур лойиҳа қуйидагиларни назарда тутади:

Тошкент вилоятининг Юқори Чирчиқ туманида жойлашган Ўзбекистон Республикаси Қишлоқ ва сув хўжалиги вазирлигининг «Агроинновация» давлат унитар корхонаси ҳудудида махсус совутиш ускуналари, материаллар ва транспорт воситаларини етказиб бериш, шунингдек, умумий ҳажми 1000 тонна бўлган совутиш омборхоналарини қуриш ва улардан фойдаланиш;

Ўзбекистон Республикаси Қишлоқ ва сув хўжалиги вазирлигининг «Агроинновация» давлат унитар корхонаси томонидан ҳўл мева-сабзавот маҳсулотларини сақлашни ташкил этиш, шунингдек, совутиш камералари қувватларидан самарали фойдаланиш мақсадида Тошкент вилоятининг тадбиркорлик субъектлари, деҳқон ва фермер хўжаликларига мева-сабзавот маҳсулотларини сақлаш бўйича хизматлар кўрсатиш;

мева-сабзавот маҳсулотларини сақлаш бўйича замонавий технологик ускуналарни жорий этиш ва улардан янада самарали фойдаланиш доирасида Ўзбекистон мутахассисларига илғор тажрибани ўзлаштиришда, фермер хўжаликлари раҳбарлари ва мутахассисларини ўқитишда кўмаклашиш.

2. Ўзбекистон Республикаси Қишлоқ ва сув хўжалиги вазирлиги лойиҳани амалга ошириш, шунингдек, лойиҳа доирасида ташкил этиладиган паст ҳароратли омборхоналаридан самарали ва мақсадли фойдаланиш учун масъул ижро этувчи орган этиб белгилансин.

3. Ўзбекистон Республикаси Қишлоқ ва сув хўжалиги вазирлиги қуйидагиларни таъминласин:

Корея Республикаси билан келишилган муддатларда Корея Республикаси Ҳукуматининг грантини олиш учун барча зарур тартиб-қоидаларни бажариш;

лойиҳани 2016 йил 8 апрелдаги Корея Республикаси Қишлоқ аҳоли пунктларини ривожлантириш Корея корпорацияси ва Ўзбекистон Республикаси Қишлоқ ва сув хўжалиги вазирлиги ўртасидаги музокаралар баённомасига мувофиқ амалга ошириш;

маблағлардан самарали ва мақсадли фойдаланиш, шунингдек, Корея Республикаси Ҳукумати гранти ҳисобига лойиҳа доирасида етказиб бериладиган асбоб-ускуналар ва материалларнинг бус-бутун сақланишини таъминлаш.

4. Қуйидагилар:

Корея Республикаси Ҳукумати гранти ҳисобига лойиҳа доирасида харид қилинадиган товарлар (ишлар, хизматлар) ва транспорт воситалари божхона тўловлари (божхона расмийлаштируви йиғимларидан ташқари), қўшилган қиймат солиғи, давлат мақсадли жамғармаларига мажбурий ажратмалар ва йиғимлардан;

лойиҳа доирасида Ўзбекистон Республикаси Вазирлар Маҳкамаси ҳузуридаги Республика йўл жамғармасига мажбурий тўловлардан етказиб бериладиган транспорт воситалари;

лойиҳани Ўзбекистон Республикасида амалга оширишда иштирок этаётган Корея Республикаси фуқаролари жисмоний шахслардан олинадиган даромад солиғини тўлашдан озод қилинсин.

5. «Ўзбекистон ҳаво йўллари» миллий авиакомпанияси ва «Ўзбекистон темир йўллари» АЖ Корея Республикаси Ҳукумати гранти доирасида келиб тушган товарлар ва транспорт воситаларининг Ўзбекистон Республикаси аэропортлари ва темир йўл станцияларида юкларга ишлов бериш ва уларни сақлаш учун ҳақ ундирмасдан ортиш-тушириш ишларини ҳамда уларнинг сақланишини таъминласинлар.

6. Ўзбекистон Республикаси Ташқи ишлар вазирлиги Қишлоқ ва сув хўжалиги вазирлигининг буюртманомаларига биноан лойиҳани амалга оширишда қатнашувчи хорижий мутахассисларга кириш визалари консуллик ва бошқа йиғимлари ундирилмасдан расмийлаштирилишини таъминласин.

7. Ўзбекистон Республикаси Ички ишлар вазирлиги Қишлоқ ва сув хўжалиги вазирлигининг буюртманомаларига биноан лойиҳани амалга оширишда қатнашувчи хорижий мутахассислар учун давлат божи ундирилмасдан кўп марталик визалар берилишини ва уларнинг муддати узайтирилишини, шунингдек, Ўзбекистон Республикасида вақтинча рўйхатдан ўтказилишини ва вақтинча рўйхатдан ўтказиш муддати узайтирилишини таъминласин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Қишлоқ ва сув хўжалиги вазири З.Т. Мирзаев зиммасига юклансин.