Мамлакатда тегишли қурилиш ишлари билан биргаликда амалга оширилаётган кенг кўламли инвестиция ва инфратузилма лойиҳалари қурилиш материаллари, металл маҳсулотлари сифати ва хавфсизлигини таъминлаш вазифаларида замонавий ёндашувларни қўллашни талаб этади.

Ўзбекистон Республикаси Вазирлар Маҳкамасининг «Қурилиш учун мўлжалланган металл прокатининг сифати ва хавфсизлигини ошириш бўйича қўшимча чора-тадбирлар тўғрисида» 2019 йил 14 декабрдаги 999-сон қарорига мувофиқ ташкил этилган идоралараро ишчи гуруҳлар томонидан жойларга чиқиб қурилиш учун мўлжалланган металл прокати ишлаб чиқарувчи 117 та корхонанинг фаолияти ўрганиб чиқилди.

Ушбу корхоналар фаолиятини ўрганиш тайёр маҳсулот ва бевосита ишлаб чиқариш жараёнлари хавфсизлигига таъсир кўрсатувчи камчиликлар мавжудлигини, шу жумладан, техник регламентлар йўқлигини, ишлаб чиқаришнинг экологик экспертизаси ўтказилмаслигини, синовлар ўтказиб ишлаб чиқарилаётган маҳсулотларнинг сифати ва хавфсизлиги назорат қилинмаслигини аниқлади. Айрим ҳолларда корхоналар томонидан мувофиқлик сертификати мавжуд бўлмаган маҳсулотлар сотилмоқда, шунингдек, даврий давлат текширувидан ўтмаган ўлчаш воситаларидан фойдаланилмоқда.

Қурилиш меъёрлари ва қоидалари талабларига мувофиқ хўжалик ва саноат объектлари қурилишида хавфсизликни таъминлаш, улар қулашининг олдини олиш, қурилишда ишлатилаётган металл маҳсулотлари сифатини, шунингдек, металл прокати ишлаб чиқарувчи корхоналар фаолиятини назорат қилиш мақсадида Вазирлар Маҳкамаси қарор қилади:

1. Белгилансинки, 2020 йил 1 июндан бошлаб:

сотилаётган ва ишлаб чиқаришда фойдаланилаётган металл прокатининг ҳар бир тўпига ишлаб чиқарувчи (импорт қилувчи) томонидан техник жиҳатдан тартибга солиш соҳасидаги норматив ҳужжатлар талабларига мувофиқлик юзасидан синовларнинг ижобий натижалари асосида расмийлаштириладиган сифат тўғрисидаги ҳужжат илова қилиниши керак. Бунда ишлаб чиқарувчиларда тегишли ишлаб чиқариш лабораториялари мавжуд бўлмаган тақдирда, металл прокатини бошқа синов лабораторияларида (шу жумладан, тузилган шартномалар асосида) синовдан ўтказишга йўл қўйилади;

Қорақалпоғистон Республикаси Вазирлар Кенгаши, вилоятлар, Тошкент шаҳри ҳокимликлари, вазирликлар ва идоралар ҳузуридаги марказлаштирилган инвестициялар ҳисобига молиялаштириладиган объектларни қуриш, реконструкция қилиш, мукаммал ва жорий таъмирлаш бўйича буюртмачи хизматлари техник жиҳатдан тартибга солиш соҳасида норматив ҳужжатлар талабларига мувофиқлик юзасидан сертификатлаштирилган қурилиш учун мўлжалланган металл маҳсулотлари харид қилиниши ва қўлланилиши учун жавоб берадилар.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари қурилиш соҳасида ҳудудий назорат инспекциялари билан биргаликда 2020 йил 1 апрелгача бўлган муддатда сифати техник жиҳатдан тартибга солиш соҳасидаги норматив ҳужжатлар талабларига мувофиқ бўлган металл прокати ва қурилиш учун мўлжалланган маҳсулотлар ишлаб чиқарувчи ташкилотлар реестрини шакллантирсинлар ва эълон қилсинлар, шунингдек, реестр ҳар йили янгиланишини таъминласинлар.

3. Белгилансинки, 2020 йил 1 июндан бошлаб индукцион печлардан фойдаланган ҳолда тайёрланган қурилиш учун мўлжалланган металл прокатини ишлаб чиқариш ва қўллаш тақиқланади.

Бунда қурилишдан бошқа мақсадлар учун металл маҳсулотларини ишлаб чиқариш ва қўллашда индукцион печлардан фойдаланишга йўл қўйилади.

4. Ўзбекистон Республикаси Қурилиш вазирлиги ҳузуридаги Қурилиш соҳасида назорат инспекцияси ва ҳудудий инспекциялар металл прокати техник жиҳатдан тартибга солиш соҳасидаги норматив ҳужжатлар талабларига мувофиқ эмаслиги ҳамда объектларда бинолар ва иншоотларнинг зилзилага бардошлигига таъсир кўрсатувчи ҳамда инсоннинг ҳаёти ва соғлиғига хавф солувчи сифатсиз қурилиш материаллари ва буюмлар қўлланилиши аниқланган ҳолларда металл прокати ва ундан тайёрланган маҳсулотлар ишлаб чиқарилиши, сотилиши ва қўлланилишини тўхтатиш бўйича зарур чора-тадбирлар кўрсинлар.

5. Белгилансинки:

хавфли ишлаб чиқариш объектларини, шу жумладан, қора ва рангли металлар эритмалари ва ушбу эритмалар асосида қотишмалар олинадиган объектларни идентификациялаш фақат аккредитация қилинган эксперт ташкилоти томонидан амалга оширилади;

қора ва рангли металлар эритмалари ва ушбу эритмалар асосида қотишмалар олинадиган ишлаб чиқариш объектлари улар фойдаланишга топширилгунга қадар қонун ҳужжатларига мувофиқ хавфли ишлаб чиқариш объектлари сифатида мажбурий идентификациядан ўтказилиши керак.

Ўзбекистон Республикаси Саноат хавфсизлиги давлат қўмитаси:

металлургия маҳсулотларини тайёрлаш ва металлургия ишлаб чиқаришларини ишлатиш билан шуғулланувчи корхоналар ва ташкилотларга хавфли ишлаб чиқариш объектларини идентификациялашда белгиланган тартибда кўмаклашсин;

Вазирлар Маҳкамасининг 2008 йил 10 декабрдаги 271-сон қарори билан тасдиқланган Хавфли ишлаб чиқариш объектларини идентификациялаш тартиби тўғрисидаги низомга ушбу қарор талабларини ҳисобга олган ҳолда ўзгартириш ва қўшимчалар киритиш бўйича икки ой муддатда Ўзбекистон Республикаси Вазирлар Маҳкамасига таклифлар киритсин.

6. Ўзбекистон Республикаси Қурилиш вазирлиги «Ўзстандарт» агентлиги, «Ўзсаноатқурилишматериаллари» уюшмаси, манфаатдор вазирликлар ва идоралар билан биргаликда икки ой муддатда «Руҳли ва полимер қопламали совутиб ёйилган листдан ишлаб чиқариладиган қурилиш маҳсулотлари тўғрисида»ги махсус техник регламентни ишлаб чиқсин ва белгиланган тартибда тасдиқласин;

амалдаги стандартларни қайта кўриб чиқсин ҳамда улар руҳланган ва полимер қопламали совутиб ёйилган листдан ишлаб чиқариладиган қурилиш маҳсулотларига, шунингдек, қурилиш арматурасига қўлланиладиган эътироф этилган халқаро стандартларга мувофиқлаштирилишини таъминлайдиган чора-тадбирлар кўрсин.

7. «Ўзстандарт» агентлиги металл прокатини мажбурий сертификатлаш ва синашда иштирок этадиган объектлар фаолияти хавф-таҳлил асосида давлат назоратидан ўтказилишини белгиланган тартибда таъминласин.

8. Ўзбекистон Республикаси Саноат хавфсизлиги давлат қўмитаси, «Ўзстандарт» агентлиги, Қурилиш вазирлиги Бош прокуратура ва Адлия вазирлиги билан биргаликда икки ой муддатда Ўзбекистон Республикаси Вазирлар Маҳкамасига объектларнинг саноат хавфсизлиги, шаҳарсозлик тўғрисидаги қонунчилик талаблари бузилганлиги, техник регламентларга ва стандартларнинг мажбурий талабларига риоя қилинмаганлиги учун жавобгарликни кучайтиришни назарда тутадиган қонун лойиҳасини киритсинлар.

9. 2020 йил 1 июндан бошлаб Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов ва Ўзбекистон Республикаси қурилиш вазири Б.И. Закиров зиммасига юклансин.

1. Вазирлар Маҳкамасининг 2011 йил 28 апрелдаги 122-сон қарори билан тасдиқланган Мажбурий тартибда сертификатланадиган, Ўзбекистон Республикаси ҳудудида ишлаб чиқариладиган ва унга олиб кириладиган маҳсулотлар турлари рўйхатига (Ўзбекистон Республикаси ҚТ, 2011 й., 4-сон, 30-модда) қуйидаги мазмундаги 63¹ ва 63²-позициялар қўшилсин:

2. Вазирлар Маҳкамасининг «Қурилиш учун мўлжалланган металл прокатининг сифати ва хавфсизлигини ошириш бўйича қўшимча чора-тадбирлар тўғрисида» 2019 йил 14 декабрдаги 999-сон қарорининг 7-бандида:

а) учинчи хатбоши қуйидаги таҳрирда баён қилинсин:

«2020 йил 1 июлгача бўлган муддатда «Ўзбекистон» илмий синовлар ва металл прокати, шунингдек, руҳланган ва полимер қопламали совутиб ёйилган листнинг сифати ва хавфсизлигини назорат қилиш бўйича маркази» давлат корхонасининг синов лабораторияларини модернизация қилиш чора-тадбирларини кўрсин»;

б) тўртинчи хатбошига «вилоятларидаги» сўзидан кейин «Ўзбекистон» илмий синовлар ва сифат назорати» давлат корхонасининг» сўзлари қўшилсин.