1. Ўзбекистон Республикаси Марказий сайлов комиссиясининг 2019 йил 23 июлдаги 924-сон қарори билан тасдиқланган Ўзбекистон Республикаси Олий Мажлисининг Қонунчилик палатасига, Халқ депутатлари вилоят, туман ва шаҳар кенгашларига сайлов ўтказувчи участка сайлов комиссияларининг фаолияти тартиби тўғрисидаги низом қуйидаги мазмундаги 981-банд билан тўлдирилсин:
«981. Участка сайлов комиссиясининг овозларни санаб чиқиш натижалари тўғрисидаги қароридан норози бўлган Ўзбекистон Республикаси Олий Мажлисининг Қонунчилик палатаси депутатлигига ёки маҳаллий Кенгаш депутатлигига номзодлар ёҳуд сиёсий партияларнинг ваколатли вакиллари овозларни қайта санаб чиқилишини сўраб тегишли округ сайлов комиссиясига, округ сайлов комиссияси томонидан сайлов округи бўйича сайлов натижалари юзасидан қарор қабул қилингунига қадар асосларни келтирган ҳолда, мурожаат қилиш ҳуқуқига эга.
Тегишли округ сайлов комиссияси мурожаатни дарҳол кўриб чиқади. Агар мурожаатда келтирилган важлар асосли деб топилса, округ сайлов комиссияси участка сайлов комиссиясида овозларни қайта санаб чиқиш ҳақида қарор қабул қилади.
Бунда, участка сайлов комиссияси округ сайлов комиссиясининг камида бир нафар аъзоси иштирокида тегишли сайлов участкасида сайлов бюллетенларини қайта санаб чиқади. Овозларни дастлабки санаб чиқиш чоғида хатоликка йўл қўйилгани аниқланса, участка сайлов комиссияси аниқланган хатоликларни тузатади. Бу ҳақида мажлис ўтказиб, дастлабки баённомани бекор қилиш асосларини кўрсатган ҳолда қарор қабул қилади ҳамда янги қарор билан тузатилган баённомани тасдиқлайди. Ҳамма танишиб чиқиши учун осиб қўйилган дастлабки баённома дарҳол янгиси билан алмаштирилади.
Агар сайлов бюллетенларини қайта санаб чиқиш натижасига кўра дастлабки натижалар тўғри бўлганлиги аниқланса, бу ҳақда баённома тузилади ва ўқиб эшиттирилади.
Башарти, мурожаатда келтирилган важлар округ сайлов комиссияси томонидан асоссиз деб топилса, бу ҳақда мурожаатчи хабардор қилинади.
Участка сайлов комиссиясининг баённомаси ушбу Низомнинг 98-банди биринчи хатбошида белгиланган тартибда округ сайлов комиссиясига тақдим этилади.
Ўзбекистон Республикаси Олий Мажлис Қонунчилик палатаси депутатлигига ёки маҳаллий Кенгаш депутатлигига номзодлар ёхуд сиёсий партияларнинг ваколатли вакиллари қайта овозларни санаб чиқиш натижаларидан ҳам норози бўлган тақдирда, юқори турувчи сайлов комиссиясига ёки судга мурожаат қилиши мумкин.
Овозларни такроран қайта санаб чиқиш юқори турувчи сайлов комиссияси ёки суднинг қарорига асосан мазкур банднинг иккинчи хатбошисида белгиланган тартибда юқори турувчи сайлов комиссияси аъзоси иштирокида амалга оширилади».
2. Ушбу қарор Ўзбекистон Республикаси Марказий сайлов комиссиясининг расмий веб-сайтида эълон қилинсин.
Ўзбекистон Республикаси Сайлов кодексининг 14 ва 16-моддаларига мувофиқ, Ўзбекистон Республикаси Марказий сайлов комиссияси қарор қилади: