«Чиқиндилар тўғрисида»ги Ўзбекистон Республикаси Қонунининг (Ўзбекистон Республикаси Олий Мажлисининг Ахборотномаси, 2002 й., 4-5-сон, 72-модда) 11-моддаси, Ўзбекистон Республикаси Президентининг «2017 — 2021 йилларда маиший чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш бўйича чора-тадбирлар тўғрисида» 2017 йил 21 апрелдаги ПҚ-2916-сонли, Ўзбекистон Республикаси Вазирлар Маҳкамасининг «Товарлар (ишлар, хизматлар)га тартибга солинадиган нархлар (тарифлар)ни декларация қилиш (тасдиқлаш) ва белгилаш тартибини янада такомиллаштириш чора-тадбирлари тўғрисида» 2010 йил 28 октябрдаги 239-сонли ва «Коммунал хизматлар кўрсатиш қоидаларини тасдиқлаш тўғрисида» 2014 йил 15 июлдаги 194-сонли қарорлари ижросини таъминлаш мақсадида, Ўзбекистон Республикаси Молия вазирлигининг 2017 йил 18 июлдаги ЁТ/15-04-34-11/115-1466-сонли кўсатмаси ҳамда вилоят экология ва атроф-муҳитни муҳофаза қилиш бошқармасининг 2017 йил 19 августдаги 01-07/116-сонли хатларини кўриб чиқиб, «Маҳаллий давлат ҳокимияти тўғрисида»ги Ўзбекистон Республикаси Қонунининг (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда) 6 ва 25-моддаларига асосан қарор қиламан:

1. Наманган вилоятида қаттиқ маиший чииқндиларни ташиб чиқариш бўйича санитар-тозалов хизматини чекланган тарифлари аҳоли учун бир кишига бир ойга 2 000 (икки минг) сўм ҳамда юридик истеъмолчиларга 30 000 (ўттиз минг) сўм этиб белгилансин.

2. Вилоят молия бош бошқармаси (Т. Юсупов) ва Хусусийлаштирилган корхоналарга кўмаклашиш ва рақобатни ривожлантириш давлат қўмитаси вилоят ҳудудий бошқармаси (З. Икрамов)га юқорида белгиланган тарифларнинг тўғри қўлланилиши устидан доимий назорат ўрнатиш топширилсин.

3. Наманган вилоят экология ва атроф-муҳитни муҳофаза қилиш бошқармаси (М. Апақов), вилоят «Тоза ҳудуд» давлат унитар корхонаси (Ф. Ибрагимов)ларга шаҳар ва туман ҳокимликлари билан биргаликда:

ушбу қарор талабларидан келиб чиқиб, ўн кун муддатда қонун ҳужжатларига мувофиқ жисмоний ва юридик шахслар билан тузилган шартномаларга тегишли ўзгартириш ва қўшимчалар киритиш;

вилоят ҳудудидаги уй-жой ва хонадонларда рўйхатда туриб ҳақиқатда яшамаётган ёки рўйхатдан ўтмасдан яшаётган шахсларга ҳамда вилоятда фаолият юритаётган юридик шахслар рўйхатига аниқлик киритиб, улар сонига мутаносиб равишда шаҳар ва туманлар ҳокимликлари томонидан берилган маълумотномалари асосида тўловлар ундирилишини ташкил этиш;

2017 йил 1 октябрдан бошлаб, бир ой муддатда хизмат кўрсатилаётган маҳалла фуқаролар йиғинлари ҳудудидаги жисмоний шахсларни қайта хатловдан ўтказиш ва абонентлар базасини шакллантириш, маҳалла фуқаролар йиғинлари раислари билан келишилган ҳолда аҳоли хонадонларидан қаттиқ маиший чиқиндиларни ташиб чиқариш бўйича «Сигнал» тизимини жорий этиш;

вилоят Статистика бошқармасининг вилоятда фаолият кўрсатиб келаётган юридик шахслар тўғрисидаги маълумотлар базаси асосида шаҳар ва туманлар кесимида уларнинг рўйхатини шакллантириш;

чиқинди ташиши транспортларини ҳаракатланиши бўйича замонавий ахборот-коммуникация технологияларини, шу жумладан транспортларнинг ҳаракатланиши устидан «онлайн» режими асосида масофавий назорат (GPS) тизимини жорий этиш вазифалари топширилсин.

4. Мазкур қарор «наманган ҳақиқати» ва «Наманганская правда» газеталарида расман эълон қилинган кундан бошлаб кучга киради.

5. Мазкур қарорнинг бажарилишини назорат қилиш вилоят ҳокимининг ўринбосари Р. Сулаймонов зиммасига юклансин.