Фуқаролар ўзини ўзи бошқариш органлари раҳбарларининг ўтган йил ноябрь—декабрь ойларидаги сайлови якунларини кўриб чиқиб, Олий Мажлис Кенгаши шуни қайд этадики, сайлов ҳамма жойда Ўзбекистон Республикаси Конституцияси ва «Фуқароларнинг ўзини ўзи бошқариш органлари тўғрисида»ги Қонун талабларига тўла мувофиқ тарзда, демократизм ва ошкоралик шароитда, аҳолининг юксак фаоллигида ўтди. Фуқароларнинг сайлов ҳуқуқлари бузилганлиги тўғрисида Олий Мажлисга бирор-бир ариза ёки шикоят тушмади.

Йиғинларда 8,4 миллион киши ёки республикадаги катта ёшли аҳолининг 70 фоизи иштирок этди. 7574 раис ва 71034 маслаҳатчи сайланди.

Барча даражадаги депутатлар ва маҳаллий давлат ҳокимияти органларининг раҳбарлари иштирок этган йиғилишларда ўзини ўзи бошқариш органлари қонунчиликни таъминлаш, Ўзбекистон Республикаси Президентининг фармонларини, Ҳукуматнинг, ҳокимият вакиллик органлари ва ҳокимларнинг қарорларини ижро этиш борасида давлат ҳокимияти ва бошқарув органларига кўмаклашиш билан боғлиқ кенг кўламдаги ваколатларини қандай бажараётганликларига катта эътибор берилди.

Ҳудудларни ободонлаштириш кичик корхоналар, фермер ва деҳқон хўжаликлари ташкил этиш, томорқа участкаларидан самарали фойдаланиш масалалари кўриб чиқилди. Кам таъминланган оилаларга ёрдам кўрсатиш, қонунийлик ва ҳуқуқ-тартиботни мустаҳкамлаш, барқарорликни сақлаб туриш, диний мутаассиблик кайфиятидаги кўринишларнинг олдини олиш, оилавий тантаналар ва маросимларни ўтказишда дабдабабозлик ва манманликка йўл қўймасликка оид ишларни кучайтириш зарурлиги алоҳида таъкидланади.

Ўзбекистон Республикаси Олий Мажлисининг Кенгаши қарор қилади:

1. Фуқароларнинг ўзини ўзи бошқариш органлари раҳбарларининг сайлови Ўзбекистон Республикаси Конституцияси ва «Фуқароларнинг ўзини ўзи бошқариш органлари тўғрисида»ги Қонун талабларига тўла мувофиқ тарзда, демократизм ва ошкоралик шароитда, аҳолининг юксак фаоллигида ўтганлиги маълумот учун қабул қилинсин.

2. Фуқароларнинг ўзини ўзи бошқариш органлари Ўзбекистон Республикаси Президентининг «Аҳолини аниқ йўналтирилган ижтимоий мадад билан таъминлашда фуқароларнинг ўзини ўзи бошқариш органлари ролини ошириш тўғрисида»ги 1999 йил 13 январдаги Фармони талабларига қатъий амал қила бориб, аҳолининг кам таъминланган қатламларига ёрдам кўрсатиш ишида ижтимоий адолат ва ошкоралик принципларига риоя этсинлар, фуқаролар уй-жойлардан фойдаланиш харажатлари ва коммунал хизматлар ҳақини тўлиқ ва ўз вақтида тўлашини ташкил этиш ҳамда назорат қилиш борасидаги ваколатларидан самаралироқ фойдалансинлар.

3. Фуқароларнинг ўзини ўзи бошқариш органларига:

Ўзбекистон Республикаси қонун ҳужжатларига, маънавий ва ахлоқий нормаларга, шунингдек кўпмиллатли Ўзбекистон халқининг анъаналари ва расм-русумларига риоя этишни кўзлаб диний ташкилотлар (масжидлар, черковлар, синагогалар ва бошқалар) билан алоқаларни ривожлантиришга қаратилган фаолиятни жойларда кучайтириш;

ёшларнинг маънавий ва ахлоқий тарбиясига, уларда халқ ва Ватан олдидаги бурч, ватанпарварлик хислатларини, юксак маънавий фазилатларни шакллантиришга алоҳида эътибор бериш;

куч-ғайратни хотин-қизларнинг ижтимоий ҳаётидаги мавқеини янада оширишга, уларнинг тенг ҳуқуқлилигини таъминлашга, энг яхши оилавий анъаналарни оммалаштиришга йўналтириш;

фуқаролик жамияти турмуш нормаларидан ҳар қандай четга чиқиш, жойлардаги жамоат тартиби ва тотувликни бузиш ҳолларининг олдини олиш ҳамда бартараф этиш бўйича белгиланган тартибда чора-тадбирлар кўриш тавсия этилсин.

4. Олий Мажлис Қонунчилик ва суд-ҳуқуқ масалалари қўмитаси ҳамда Котибиятининг тегишли бўлимлари:

фуқаролар томонидан парламентнинг ўн учинчи сессиясида биринчи ўқишда маъқулланган «Фуқароларнинг ўзини ўзи бошқариш органлари тўғрисида»ги Қонун лойиҳасининг умумхалқ муҳокамаси пайтида тушган таклифларни ўрганишга кўпроқ эътибор берсинлар;

маҳаллий давлат ҳокимияти органлари билан биргаликда Қорақалпоғистон Республикаси, вилоятлар ва Тошкент шаҳрида янги таҳрирдаги «Фуқароларнинг ўзини ўзи бошқариш органлари тўғрисида»ги Қонуннинг мазмун-моҳиятини ўрганиш бўйича семинарлар ўтказсинлар;

ўзини ўзи бошқариш органлари ишидаги илғор тажрибани ўрганиб борсинлар ва оммалаштирсинлар, бу масалани Олий Мажлис Кенгаши муҳокамасига киритсинлар, оммавий ахборот воситаларида кенг ёритиб борсинлар.

5. Қорақалпоғистон Республикаси Жўқорғи Кенгеси, вилоятлар ва Тошкент шаҳар ҳокимликлари Олий Мажлисга ҳар йили 15 январдан кечиктирмай фуқароларнинг ўзини ўзи бошқариш органлари фаолияти тўғрисидаги ахборотни тасдиқланган шаклларга мувофиқ тақдим этсинлар.