«Давлат божхона хизмати тўғрисида»ги Ўзбекистон Республикаси Қонунига мувофиқ давлат божхона хизмати органлари ходимларининг ёки уларнинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш тартибини жорий этиш мақсадида Вазирлар Маҳкамаси қарор қилади:

1. Ўзбекистон Республикаси давлат божхона хизмати органи ходимининг ёки унинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш тартиби тўғрисидаги низом иловага мувофиқ тасдиқлансин.

2. Ўзбекистон Республикаси Давлат божхона қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

3. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари Э.М. Ғаниев ва Ўзбекистон Республикаси Давлат божхона қўмитаси раиси М.Б. Азимов зиммасига юклансин.

1. Мазкур Низом Ўзбекистон Республикаси давлат божхона хизмати органи ходимининг (кейинги ўринларда ходим деб аталади) ёки унинг яқин қариндошларининг (ота-оналар, ака-укалар, опа-сингиллар, эр-хотинлар, фарзандлар, шунингдек эр-хотинларнинг ота-оналари, ака-укалари ва опа-сингиллари) мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш тартибини белгилайди.

2. Ходимнинг ёки унинг яқин қариндошларининг мол-мулкига етказилган зарарнинг ўрни ходимнинг ўз хизмат мажбуриятларини бажариши вақтида етказилган тақдирдагина қопланади.

Мазкур Низом давлат божхона хизмати органларидан пенсияга чиқарилган шахсларга, агар зарар уларнинг ёки яқин қариндошларининг мол-мулкига давлат божхона хизмати органларидаги хизмат мажбуриятларини бажариши билан боғлиқ ҳолда етказилган бўлса, татбиқ этилади.

3. Мазкур Низомни амалга ошириш мақсадида ходимнинг ёки унинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш масаласини ўрганиш бўйича Ўзбекистон Республикаси Давлат божхона қўмитаси марказий аппаратида, Қорақалпоғистон Республикаси, вилоятлар ва Тошкент шаҳри бўйича божхона бошқармаларида, «Тошкент-АЭРО» ихтисослаштирилган божхона комплекси, Божхона институти ва Миллий кинология марказида (кейинги ўринларда божхона органлари деб аталади) қонун ҳужжатларида белгиланган тартибда доимий фаолият кўрсатувчи комиссиялар тузилади.

4. Комиссия таркиби божхона органининг тегишли хизматлари ходимларидан ташкил топади ва божхона органи раҳбари томонидан тасдиқланади.

5. Зарар ўрнини қоплаш бўйича тегишли ҳужжатларни йиғиш ва расмийлаштириш божхона органларининг Кадрлар бошқармаси ва жойлардаги кадрлар бўлимлари (кейинги ўринларда кадрлар хизматлари деб аталади) томонидан амалга оширилади.

6. Ўз мол-мулкига етказилган зарарнинг ўрнини қоплаш мақсадида ходим ёки унинг яқин қариндошлари божхона органи раҳбарига билдирги (ариза) билан мурожаат қилади.

Ариза у келиб тушган куннинг ўзида божхона органи раҳбари томонидан кадрлар хизматига йўналтирилади.

7. Мол-мулкка етказилган зарарнинг ўрнини қоплаш ҳақидаги билдирги (ариза) келиб тушган кундан бошлаб уч кун муддатда божхона органининг кадрлар хизмати томонидан тегишли комиссияга қуйидаги ҳужжатлар тақдим этилади:

мол-мулкига етказилган зарарнинг ўрнини қоплаш ҳақида ходимнинг билдиргиси ёки унинг яқин қариндошларининг аризаси;

мол-мулкига зарар етказилган ҳолатлар бўйича текширув хулосаси;

мол-мулкига етказилган зарар миқдорини тасдиқловчи ҳужжатлар.

8. Комиссия томонидан ҳужжатлар улар тақдим этилган кундан бошлаб ўн беш кун муддатда кўриб чиқилади.

9. Ҳужжатларни кўриб чиқиш натижаси бўйича мол-мулкка етказилган зарарнинг ўрни қопланиши ёки уни қоплаш рад этилиши тўғрисида комиссия қарори қабул қилинади ва божхона органи раҳбари томонидан тасдиқланадиган баён билан расмийлаштирилади.

10. Комиссия қарори уч кун муддатда манфаатдор шахсларга етказилади.

11. Комиссия раиси ва аъзолари зарарнинг ўрнини қоплаш ёки қоплашни рад этиш тўғрисидаги комиссия қарорининг қонунийлиги ва тўғри қабул қилинганлигига масъул ҳисобланади.

12. Мол-мулкка етказилган зарарнинг ҳақиқий миқдорини аниқлаш, божхона органи томонидан баҳолаш ташкилоти жалб қилинган ҳолда, мол-мулкига зарар етказилган шахснинг иштирокида амалга оширилади. Бунда зарар миқдори унинг ўрнини қоплаш вақтида амал қилаётган бозор нархларидан келиб чиққан ҳолда аниқланади.

13. Ҳисоб-китоблар нақд пул кўринишида ёки пул ўтказиш йўли билан амалга оширилади. Зарар натура шаклида, тенг қийматдаги мулкни бериш, уни таъмирлаш ёки бошқа кўринишларда ҳам қопланиши мумкин.

Мазкур Низомда назарда тутилган тўловлар божхона органларининг молия-иқтисодиёт хизматлари томонидан амалга оширилади.

14. Мол-мулкка етказилган зарарнинг ўрнини қоплаш бўйича тегишли қарор қабул қилинганидан сўнг, ушбу зарарнинг ўрни божхона органлари томонидан ўн кун муддатда манфаатдор шахсларга қоплаб берилиши лозим.

15. Мол-мулкка етказилган зарарнинг ўрнини қоплаш билан боғлиқ харажатлар Ўзбекистон Республикаси Давлат бюджети маблағлари ҳисобидан амалга оширилади ва кейинчалик айбдор шахслардан ундириб олинади.

16. Ходимнинг ёки унинг яқин қариндошларининг мол-мулкига етказилган зарарнинг ўрнини қоплаган божхона органи бу билан боғлиқ харажатларни зарар етказилиши учун айбдор бўлган юридик ва жисмоний шахслардан қонун ҳужжатларида белгиланган тартибда ундириш чораларини кўради.

Бунда айбдор шахсларни топиш мақсадида ваколатли органларга тегишли сўровномалар юборилиши ва қонун ҳужжатларида тақиқланмаган бошқа зарур тадбирлар амалга оширилиши мумкин.

17. Божхона органлари молия-иқтисодиёт хизматлари томонидан зарарнинг ўрни қопланган кундан бошлаб икки кун муддатда зарарнинг ўрни қопланганлигини тасдиқловчи ҳужжатлар (тўлов топшириқномаси, чиқим касса ордерлари, тўлов ведомстлари ҳисоб-фактура ва бошқалар) нусхалари тегишли божхона органининг юридик хизматига айбдор шахслардан зарар суммасини ундириш чораларини кўриш учун тақдим этилади.

18. Божхона органларининг юридик хизматлари зарарнинг ўрни қопланганлигини тасдиқловчи ҳужжатлар қабул қилинган кундан бошлаб ўн кун муддатда

айбдор шахсларга нисбатан даъво (қарши даъво) киритиш учун қонун ҳужжатларда белгиланган тартибда зарур ҳужжатларни расмийлаштиради ва уларга нисбатан даъво (қарши даъво) киритиш чораларини кўради;

судларда тегишли божхона органи вакили сифатида иштирок этади;

ундиришга қаратилган, лекин ундирилмай қолган маблағларни (айбдор жисмоний шахс вафот этган, I гуруҳ ногиронлик рўйхатига киритилган ҳолларда) маблағларни ҳисобдан чиқариш учун суд қарорлари ёки бошқа ҳужжатларни тегишли божхона органининг молия-иқтисодиёт хизматига тақдим этади;

ўз ваколати доирасида зарарнинг ўрнини қоплаш харажатларини ундириш билан боғлиқ бошқа тадбирларни амалга оширади.

19. Ходимнинг ёки унинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш мазкур Низомнинг иловасидаги схемага мувофиқ амалга оширилади.

20. Ходимнинг ёки унинг яқин қариндошларининг мол-мулкига хизмат мажбуриятларини бажариши билан боғлиқ ҳолда етказилган зарарнинг ўрнини қоплаш бўйича низо ва келишмовчиликлар қонун ҳужжатларида белгиланган тартибда ҳал этилади.

21. Мазкур Низом талаблари бузилишида айбдор бўлган шахслар қонун ҳужжатларига мувофиқ жавобгар бўладилар.