Ўзбекистон Республикаси Президентининг 2018 йил 5 сентябрдаги ПҚ-3930-сон «Корпоратив, лойиҳа бошқаруви ва давлат харидлари соҳасида кадрларни тайёрлаш, қайта тайёрлаш ва уларнинг малакасини ошириш тизимини такомиллаштириш бўйича қўшимча чора-тадбирлар тўғрисида»ги қарорига асосан буюраман:

1. Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Абу Райҳон Беруний номидаги Бизнес ва бошқарув республика олий мактабига ўқишга қабул қилиш ва ўқитишни ташкил этиш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Мазкур Низом Ўзбекистон Республикаси Президентининг 2018 йил 5 сентябрдаги ПҚ-3930-сон «Корпоратив, лойиҳа бошқаруви ва давлат харидлари соҳасида кадрларни тайёрлаш, қайта тайёрлаш ва уларнинг малакасини ошириш тизимини такомиллаштириш бўйича қўшимча чора-тадбирлар тўғрисида»ги қарорига мувофиқ Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Абу Райҳон Беруний номидаги Бизнес ва бошқарув республика олий мактабига (бундан буён матнда Олий мактаб деб юритилади) ўқишга қабул қилиш ва ўқитишни ташкил этиш тартибини белгилайди.

1. Олий мактаб магистратурасида бошқарув кадрларни тайёрлаш тўлов-контракт асосида, ишлаб чиқаришдан ажралган ва ажралмаган ҳолда, олий таълимнинг давлат таълим стандартларига мувофиқ меъёрий ва қисқартирилган муддатларда, ўқишни тамомлагандан кейин тегишли мутахассислик бўйича магистр даражасини берувчи давлат намунасидаги ҳужжат бериладиган тартибда амалга оширилади.

2. Олий мактаб магистратураси дастурлари бўйича ўқитиш етакчи хорижий таълим муассасаларининг ўқув режалари ва дастурлари асосида «икки диплом» (dоublе dеgrее) модели бўйича Ўзбекистон Республикасида тан олинган давлат намунасидаги дипломлар берилиши орқали амалга оширилиши мумкин.

3. Олий мактаб «Лойиҳа бошқаруви» («Prоjеct managеmеnt») мутахассислиги бўйича бир йиллик магистратура, «Бизнес бошқаруви» («Mastеr оf Businеss Administratiоn — MBA») мутахассислиги бўйича икки йиллик магистратурада ўқитишни амалга оширади.

Ўқитиш муддати ва шакллари Олий мактаб томонидан Ўзбекистон Республикаси Президенти ҳузуридаги Лойиҳа бошқаруви миллий агентлиги (бундан буён матнда Агентлик деб юритилади) билан келишилган ҳолда тасдиқланади.

4. Олий мактаб магистратурасига кириш тест синовлари ва суҳбат шаклида, номзодларнинг танловига кўра ўзбек, рус ёки инглиз тилида амалга оширилади.

5. Олий мактаб магистратурасига ўқишга барча учун тенг ҳуқуқлилик, ягона қабул қоидалари ва ягона танлов принциплари асосида қабул қилинади.

6. Олий мактаб магистратурасида ишлаб чиқаришдан ажралган ҳолда таълим олаётган тингловчиларнинг асосий иш жойи ва ўртача иш ҳақи миқдори ўқиш муддати мобайнида сақланади. Бунда иш берувчи тасдиқланган иш ҳақи фонди доирасида магистратурада таълим олаётган тингловчининг ўқишни тамомлаш даври якунига қадар муддатга тузилган шартнома асосида бошқа ходимларни тегишли иш жойига қабул қилиши мумкин.

7. Олий мактабнинг магистратурасига ўқишга қабул қилишнинг йиллик квотаси Агентлик томонидан қонун ҳужжатларида белгиланган тартибда тасдиқланади.

8. Олий мактаб магистратурасига олий маълумотга, шу жумладан хорижий мамлакатларда олинган олий маълумотга (дипломли мутахассис, бакалавр) ва олий таълим муассасасини тамомлагандан кейин қуйидаги зарур иш стажига эга бўлган фуқаролар қабул қилинади:

ишлаб чиқаришдан ажралган ҳолда таълим учун — уч йилдан кам бўлмаган;

ишлаб чиқаришдан ажралмаган ҳолда таълим учун — беш йилдан кам бўлмаган.

9. Олий мактаб магистратурасига қабул қилишни ташкил этиш учун қабул комиссияси (бундан буён матнда Комиссия деб юритилади) ташкил этилади. Комиссия аъзоларининг сони ва шахсий таркиби, шунингдек иш регламенти Олий мактаб директори томонидан Агентлик билан келишилган ҳолда тасдиқланади.

10. Олий мактаб магистратурасига кириш истагини билдирган номзодлар Олий мактабнинг расмий веб-сайти (бундан буён матнда веб-сайт деб юритилади) орқали Олий мактабнинг директори номига қуйидаги ҳужжатларнинг нусхаларини илова қилган ҳолда ариза билан мурожаат қилишади:

олий маълумоти тўғрисидаги ҳужжатнинг нусхаси;

иш стажини тасдиқлайдиган белгиланган намунадаги ҳужжат;

4х6 ўлчамдаги рангли фотосурат;

паспорт (имтиҳон вақтида асл нусхаси тақдим этилади).

Олий мактаб магистратурасига кириш имтиҳонларидан муваффақиятли ўтган тингловчилар юқорида кўрсатилган ҳужжатларнинг аслини ёки уларнинг белгиланган тартибда тасдиқланган нусхаларини Олий мактабга тақдим этади.

11. Шартнома шартлари, томонларнинг ҳуқуқлари ва мажбуриятлари, тўловларни амалга ошириш тартиби қонун ҳужжатларига мувофиқ белгиланади ва веб-сайтда эълон қилинади.

12. Олий мактаб магистратурасига қабул қилиш шартлари, ҳужжатларни қабул қилиш муддатлари, Олий мактаб магистратурасига ҳужжатларни қабул қилиш муддати тугашидан камида бир ой олдин веб-сайтда оммавий эълон қилинади.

13. Номзодлар мазкур Низомда белгиланган талабларга мувофиқ бўлган тақдирда магистратурага қабул қилиш учун ўтказиладиган тест синовларида иштирок этишига йўл қўйилади.

14. Олий мактаб магистратурасига қабул қилиш учун ўтказиладиган тест синовларида иштирок этишга йўл қўйилганлар рўйхати веб-сайтда эълон қилинади.

15. Тест ўтказиш тартиби, тест синовлари амалга ошириладиган фанлар рўйхати Комиссия томонидан белгиланади.

Тест синовларининг саволлари Комиссия томонидан тузилади.

Тест синовлари Олий мактаб томонидан қонун ҳужжатларида белгиланган тартибда ўтказилади.

Тест синовлари натижалари Комиссия томонидан тегишли баённома расмийлаштирилади. Номзодларнинг тестдан қайта ўтказилишига йўл қўйилмайди.

16. Тест синовларидан муваффақиятли ўтган номзодлар суҳбатга киришига рухсат этилади.

Номзодлар билан суҳбат шахсий мулоқот ўтказиш орқали уларда бошқарув қобилиятларига эга эканлик даражасини баҳолаш, тизимли ва аналитик фикрлаш қобилиятларини, етакчилик сифатларини аниқлаш юзасидан амалга оширилади.

Суҳбат ўтказиш тартиби, номзоднинг ўқитилиши режалаштирилаётган йўналиш бўйича зарур билим даражаси, шунингдек унинг натижаси бўйича номзоднинг билимини баҳолаш мезонлари Олий мактаб томонидан белгиланади.

Суҳбат натижаларига кўра Комиссия томонидан тегишли баённома расмийлаштирилади. Номзодларнинг суҳбатдан қайта ўтказилишига йўл қўйилмайди.

17. Олий мактаб магистратурасига кириш имтиҳонларини муваффақиятли топширган номзодлар белгиланган квоталар доирасида Комиссия томонидан Олий мактаб магистратурасига қабул қилиш учун тавсия этилади.

18. Олий мактаб магистратурасига кириш имтиҳонларини муваффақиятли топширган номзодлар рўйхати веб-сайтда эълон қилинади.

19. Комиссиянинг номзодларни Олий мактаб магистратурасига қабул қилиш ҳақидаги қарори асосида номзод (ташкилот) билан тўлов-контракт асосида ўқитиш тўғрисида тегишли шартнома тузилади.

20. Белгиланган намунадаги шартнома бланкалари Олий Мактаб томонидан магистратурага кириш имтиҳонлари натижалари эълон қилинганидан кейин берилади.

21. Тингловчиларни Олий мактаб магистратурасига қабул қилиш Комиссия қарорига мувофиқ Олий мактаб директорининг буйруғи билан, шартномада белгиланган муддатларда тегишли таълим тўлови тўланганидан кейин амалга оширилади.

22. Номзод томонидан шартномада кўрсатилган муддатда таълим тўлови тўланмаган тақдирда, унинг ўрнига тўпланган баллар сони бўйича навбатдаги номзод қабул қилинади.

23. Тингловчилар Олий мактабнинг ички тартиб қоидаларини бузганлиги ёки академик қарздорлик сабабли тингловчилар сафидан чиқарилган тақдирда, мазкур тингловчи учун амалга оширилган таълим тўлови қайтарилмайди.

24. Олий мактаб магистратурасига кириш имтиҳонларини ташкил этиш ва ўтказиш билан боғлиқ харажатлар Олий мактаб маблағлари ҳисобига қопланади.

25. Олий мактаб магистратурасига кириш имтиҳонларидан ўта олмаган номзод имтиҳон натижалари эълон қилинган кундан бошлаб уч кун ичида Олий мактаб орқали апелляция комиссиясига апелляция бериш ҳуқуқига эга.

26. Апелляция комиссиясининг таркиби Агентлик директорининг буйруғи билан қабул комиссияси фаолиятида иштирок этмаган шахслар орасидан шакллантирилади.

Апелляция комиссияси апелляция шикоятини уч иш куни ичида кўриб чиқади ва қабул қилинган қарор тўғрисида номзодга шу куннинг ўзида ёзма равишда хабар беради.

27. Номзоднинг апелляциясини кўриб чиқишда номзод иштирок этиш ҳуқуқига эга.

28. Апелляция комиссияси номзоднинг шикоятини кўриб чиқиб, унинг натижаси бўйича тегишли қарор қабул қилади. Қарорда номзоднинг шикоятини қаноатлантириш ёки қаноатлантиришни рад этиш масаласи кўрсатилади.

29. Олий мактабда ўқув курслари ўқишни тамомлагандан кейин тегишли тасдиқловчи ҳужжатлар бериладиган махсус таълим дастурлари асосида ўтказилади.

30. Олий мактаб махсус таълим дастурлари асосида:

Бизнесни бошқариш ва корпоратив бошқарув йўналиши бўйича хўжалик бошқаруви органлари, акционерлик жамиятлари ва бошқа тадбиркорлик субъектларининг олий маълумотга эга бўлган (дипломли мутахассис, бакалавр) юқори ва ўрта бўғин раҳбарларининг малакасини ошириш ва қайта тайёрлаш;

лойиҳа бошқаруви ва давлат харидлари йўналиши бўйича, имтиҳонларни муваффақиятли топширган тақдирда, белгиланган намунадаги сертификат бериладиган, давлат органлари ва бошқа ташкилотларнинг ходимларини тайёрлаш, қайта тайёрлаш ва малакасини ошириш;

белгиланган намунадаги малака сертификати берилган ҳолда баҳоловчиларни тайёрлаш, қайта тайёрлаш ва уларнинг малакасини ошириш бўйича ўқув курсларини ташкил этади.

31. Ўқув курсларида ўқиш истагини билдирган номзодлар директор номига веб-сайт орқали ариза ёзиб, анкета тўлдирадилар ҳамда унга шахсий паспорт ва зарурат бўлганда таълим олганлиги тўғрисидаги ҳужжат нусхаларини илова қиладилар.

32. Ўқув курсларининг қиймати Агентлик билан келишилган ҳолда директор томонидан тасдиқланади.

Ўқув курсларини ўтказиш санаси, давомийлиги, таълим шакли, ариза топширишнинг тугаллаш муддатлари, шартнома шартлари, тарафларнинг ҳуқуқ ва мажбуриятлари, тўловларни амалга ошириш тартиби ва ўқув курслари бўйича бошқа маълумотлар директор томонидан тасдиқланади ва веб-сайтда эълон қилинади.

33. Тингловчиларни Олий мактаб ўқув курсларига қабул қилиш директорнинг буйруғи шартномада белгиланган муддатларда ва шаклда, ўқитиш учун тегишли миқдордаги тўлов тўланганидан кейин амалга оширилади.

34. Мазкур Низом талаблари бузилишида айбдор бўлган шахслар қонун ҳужжатларига мувофиқ жавобгар бўладилар.