Ўзбекистон Республикаси Президентининг «Ўзбекистон ахборот агентлиги (ЎзТАГ)ни Ўзбекистон Миллий ахборот агентлиги (ЎзА)га айлантириш тўғрисида» 1992 йил 5 февралдаги Фармонига мувофиқ ҳамда республиканинг ички ва ташқи сиёсати тўғрисида ишончли ахборотларни тўплаш ва таъминлашни ташкил этишни янада такомиллаштириш мақсадида Вазирлар Маҳкамаси қарор қилади:

1. Юклатилган вазифаларга мувофиқ Ўзбекистон Миллий ахборот агентлиги (ЎзА)га қуйидаги ҳуқуқлар берилади:

моддий-техника негизини мустаҳкамлаш ва ижтимоий масалаларни ҳал қилиш учун бюджетдан ташқари молиявий манбаларнинг маблағларидан мустақил фойдаланиш;

шартномалар юзасидан буюртмачиларга сотиладиган ахборот маҳсулоти (ишлар, хизматлар) нархлари ва тарифларини белгилаш;

раҳбарларни, ижодий ходимларни, юқори малакали мутахассислар ва хизматчиларни битим асосида ишга ёллаш;

ахборот маҳсулотини, тегишли техника ва асбоб-ускуналарни сотиб олиш, сотиш ва айирбошлаш, реклама хизмати ва бошқа турдаги хизматлар кўрсатиш юзасидан ташқи иқтисодий фаолиятни амалга ошириш.

2. Ўзбекистон Миллий ахборот агентлиги (ЎзА) тўғрисидаги илова этилаётган Низом тасдиқлансин.

3. Ўзбекистон Миллий ахборот агентлиги марказий аппарати ходимларининг энг кўп сони, хизмат кўрсатувчи ходимлардан ташқари, 150 кишидан иборат қилиб белгилансин.

Белгилаб қўйилсинки, ЎзА меҳнат ҳақи учун ажратиладиган маблағлар доирасида аппарат тузилишини, моддий рағбатлантириш шакллари ва шартларини (турли тоифадаги ходимлар сони нисбатини ҳисобга олмасдан) мустақил равишда тасдиқлайди.

ЎзА бош директорининг уч нафар ўринбосари, жумладан, бир нафар биринчи ўринбосари ва 9 кишидан иборат ҳайъат бўлишига рухсат берилсин, унинг шахсий таркиби Ўзбекистон Республикаси Президенти ҳузуридаги Вазирлар Маҳкамаси томонидан тасдиқланади.

ЎзА бош директорига, унинг ўринбосарларига ва ҳайъат аъзоларига Ўзбекистон Республикаси вазирлари, уларнинг ўринбосарлари ва ҳайъат аъзолари учун мос равишда белгиланган моддий таъминот, тиббий ва транспорт хизмати кўрсатиш шарт-шароитлари жорий қилинсин.

4. Ўзбекистон Миллий ахборот агентлиги белгиланган асосий вазифалардан ва фаолият йўналишларидан келиб чиққан ҳолда бир ой муддат ичида агентликни бошқаришнинг ташкилий тузилишини такомиллаштириш, республикада, МДҲ давлатларида ва чет элларда мухбирлик пунктлари шохобчаларини кенгайтириш юзасидан тадбирларни амалга оширсин.

5. Ўзбекистон Республикаси Алоқа вазирлиги:

чекланган нархлар ва тарифларда хизмат ҳақи тўлаш шарти билан ЎзАга, унинг бўлинмаларига ва мухбирлик пунктларига шартнома асосида зарур алоқа каналлари ва воситаларини берсин;

ЎзА ҳамда унга қарашли ташкилотларнинг хабарлари ва фототелеграммаларини Ҳукумат телеграммалари тоифасида узатишни, телефон сўзлашувларини эса иккинчи тоифа тезкорликда улашни таъминласин.

6. «Ўзшартномасавдо» уюшмаси асосланган буюртмаларга кўра Ўзбекистон Миллий ахборот агентлигига зарур моддий-техника ресурслари, асбоб-ускуналар ва жиҳозлар ажратишни назарда тутсин.

7. Ўзбекистон Миллий ахборот агентлиги, Ўзбекистоннинг тараққиёт истиқболини белгилаш қўмитаси, «Тошкентбошқурилиш» ЎзА лаборатория корпусининг иккинчи навбати қурилишини тугаллашни кўриб чиқсинлар ва икки ҳафта муддат ичида белгиланган тартибда таклиф киритсинлар.

8. Ўзбекистон ССР Министрлар Советининг 1972 йил 13 апрелдаги 155-сон, 1977 йил 22 декабрдаги 804-сон, 1981 йил 15 июндаги 507-сон, 1986 йил 9 апрелдаги 181-сон қарорлари ўз кучини йўқотган деб ҳисоблансин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари ўртоқ Э.С. Самандаров зиммасига юклатилсин.

1. Ўзбекистон Миллий ахборот агентлиги (бундан кейин матнда ЎзА деб аталади) Ўзбекистон Республикасининг марказий давлат ахборот агентлиги бўлиб, унинг ахборот соҳасидаги фаолияти республиканинг, МДҲга кирувчи мустақил давлатларнинг ва хорижий мамлакатларнинг кенг доирадаги ўқувчиларига мўлжалланган.

2. ЎзА ўз фаолиятида Ўзбекистон Республикаси Конституциясига, Ўзбекистон Республикаси Олий Кенгашининг қонунлари ва қарорларига, Президентнинг фармонларига, Ўзбекистон Республикаси Президенти ҳузуридаги Вазирлар Маҳкамасининг қарорлари ва фармойишларига, Ўзбекистон Республикаси иштирок этадиган оммавий ахборот воситаларига доир халқаро шартномаларга, шунингдек, ушбу Низомга амал қилади.

3. ЎзАнинг бош вазифаси ахборот тўплаш ва уларни оммавий ахборот воситаларига, давлат органларига, муассасаларга, корхоналарга ва ташкилотларга, жамоат бирлашмаларига, шунингдек, республикадаги ва унинг ташқарисидаги хусусий кишиларга етказиб беришдан иборат.

ЎзА Ўзбекистон Республикаси Олий Кенгаши ва Раёсатининг, Ўзбекистон Республикаси Президентининг, Ўзбекистон Республикаси Президенти ҳузуридаги Вазирлар Маҳкамасининг ижтимоий-сиёсий ва бошқа воқеаларга баҳо беришга, ички ва ташқи сиёсатнинг энг муҳим масалаларига тааллуқли расмий ҳужжатларини, баёнотларини ва ахборотларини тарқатади.

ЎзА ахборот тўплаш ва тарқатишга доир ўз фаолиятини сиёсий ташкилотлар ва жамоат ташкилотларидан мустақил равишда, Ўзбекистон Республикасининг давлат манфаатларини назарда тутиб ҳамда воқеаларни холис ва ҳар томонлама ёритиш принципларига, турмушни бутун чоралар билан демократиялаш ва одамий муносабатларни инсонпарварлаштириш негизида жамиятни жипслаштириш вазифаларига мувофиқ равишда амалга оширади.

ЎзА бутун фаолияти билан ҳар бир фуқаронинг ҳар қандай масала юзасидан, аввало, Ўзбекистон Республикаси давлат ҳокимияти олий органлари фаолияти, уларнинг ички ва ташқи сиёсати масалаларига доир ҳаққоний ва аниқ ахборот олишдан иборат қонуний ҳуқуқини амалга оширишни таъминлайди.

4. ЎзА ўз вазифаларига мувофиқ:

расмий ва ўзга ахборотларни тўплайди ҳамда уни тижорат асосида Ўзбекистон Республикасида ва чет элларда тарқатади;

Ўзбекистон Республикасида ва чет элларда ахборотномалар, рўзномалар, китоблар, ойномалар, бошқа матбаа маҳсулотларини, компьютер, фото ва аудиовизуал маҳсулотларни нашр этади ҳамда обуна йўли билан ва чакана савдо орқали тарқатади;

ўзининг мавжуд маблағлари доирасида Ўзбекистон Республикасида ва чет элларда ахборот марказларини, бўлимлари ва мухбирлик пунктларини мустақил равишда таъсис этади, қайта ташкил этади ва тугатади;

барча турдаги ахборотларни тўплаш ва тарқатиш масалалари юзасидан халқаро алоқаларни амалга оширади; хориждаги ахборот агентликлари иш тажрибасини ўрганади;

бошқа агентликлар, шу жумладан, хорижий агентликлар, оммавий ахборот органлари билан ахборотларни айирбошлаш шартлари ёки тижорат шартлари билан барча турдаги ахборотларни етказиб бериш (қабул қилиб олиш) тўғрисида, ишлаб чиқариш ва бошқа соҳаларда ҳамкорлик қилиш ҳақида шартномалар тузади;

ташқи иқтисодий алоқалар қатнашчиси сифатида рўйхатга олинган ташкилот сифатида турли шаклларда ташқи иқтисодий фаолиятни (жумладан, экспорт-импорт аъмолларини, ахборот соҳасида вакиллик ва воситачилик фаолиятини) амалга оширади;

чет элларда тижорат фаолиятини амалга ошириш учун зарур ишлаб чиқариш тузилмаларини барпо этади, ўз ходимларини хизмат сафарига ва хорижда ишлаш учун юборади, хорижий фуқароларни ёллайди ёки бу вазифаларни битимлар асосида хорижий агентликларга, фирмаларга ва бошқа ташкилотларга топширади.

5. ЎзА амалдаги қонунларга мувофиқ ижодий ва хўжалик соҳаларида мустақил бўлиб, ўз фаолиятининг режаларини ишлаб чиқади, ўзига бириктириб қўйилган мол-мулкка эгалик қилади, ундан фойдаланади ва тасарруф этади, тайёрланган маҳсулотни, олинган даромадларни, шунингдек, бошқа даромадларни агентлик олдида турган вазифаларга асосланиб, мустақил тасарруф этади.

Агентликнинг бўлимлари молия-хўжалик жиҳатидан ва кадрлар билан ишлаш масаласида мустақилдир. Улар билан муносабатлар шартномалар асосида амалга оширилади.

6. ЎзАнинг совет сўми ва хорижий валюта шаклидаги маблағлари:

агентлик ахборотлари учун Ўзбекистон Давлат телерадио компаниясидан, оммавий ахборот воситаларидан тушадиган обуна ҳақи маблағларидан;

агентликнинг тижорат фаолиятидан келадиган даромадлардан ва ўзига қарашли корхоналар ва ташкилотлар фойдасининг бир қисмидан;

чет эллардаги ва МДҲ мамлакатларидаги ташкилотлар, фирмалар, корхоналар, муассасалар ва айрим фуқароларнинг пул, моддий ва маданий бойликлар ва кўчмас мулк шаклидаги ихтиёрий бадаллари, совғаларидан, тушумлар ва ажратмалардан;

бошқа тушумлардан ташкил топади.

7. ЎзА агентликнинг моддий-техника базасини ривожлантириш ва унинг самарадорлигини ошириш мақсадида:

ўз ахборотларини, бошқа матбаа, компьютер, фото ва аудиовизуал маҳсулотларини ҳамда бошқа маҳсулотларни нашр этади ва уларни республикада, хорижда обуна асосида ва чакана савдо орқали тарқатади;

Ўзбекистон Республикаси, МДҲ ҳудудида ва чет элларда корхоналар, ташкилотлар ва фирмалар, шу жумладан, хорижий шериклар билан биргаликда барпо этади;

агентликнинг биноларини, ахборотни тайёрлаш ва узатишга тегишли техникавий ва дастурий воситаларни Ўзбекистон Республикаси ҳудудида ҳам, чет элларда ҳам бошқа ташкилотларга, фирмаларга, агентликларга ва фуқароларга тижорат асосида фойдаланиш учун беради.

8. ЎзАнинг амалдаги қонунларга мувофиқ тижорат фаолияти натижасида вужудга келган валюта фондидан агентликни моддий-техникавий ва ижтимоий ривожлантириш учун, шу жумладан, ишга жалб этилган хорижий фуқаролар хизматига ҳақ тўлаш учун фойдаланилади.

9. ЎзА ахборот тарқатиш, топширилган иш соҳасидаги аҳвол ҳамда муайян вазифаларни бажариш учун шахсларнинг аниқ равшан масъулиятини аниқлаш билан боғлиқ барча масалаларни муҳокама этиш ва ҳал қилишда коллегиал ва яккабошчилик негизида ўз ишини ташкил этади.

10. ЎзАга Бош директор бошчилик қилади, уни Ўзбекистон Республикаси Президенти ҳузуридаги Вазирлар Маҳкамаси тайинлайди.

Бош директорнинг уч нафар ўринбосари (шу жумладан, бир нафар биринчи ўринбосари) бўлади, уларни бу лавозимларга Ўзбекистон Республикаси Президенти ҳузуридаги Вазирлар Маҳкамаси тайинлайди.

Бош директор агентлик фаолиятига умумий раҳбарлик қилади, жамоа олдида турган вазифаларнинг бажарилишини ташкил этади, ЎзАнинг барча хизматлари ва бўлинмалари ҳамда ўзига қарашли корхоналар ва ташкилотлар ижро этишлари шарт бўлган буйруқлар, фармойишлар, йўриқномалар чиқаради.

ЎзА Бош директори:

амалдаги қонунларга мувофиқ агентликнинг тузилма бирликларини, бўлимларини, мухбирлик пунктларини ва бошқа ўзига қарашли корхоналар ва ташкилотларни барпо этади, қайта ташкил қилади ва тугатади;

ходимларнинг сони ва иш ҳақи фонди доирасида штат жадвалини тасдиқлайди;

ходимларни ва хорижий мутахассисларни амалдаги қонунларда белгиланган тартибда ҳамда улар билан битим тузиш асосида Ўзбекистон Республикаси Меҳнат вазирлиги ва Адлия вазирлиги билан келишилган Низомга мувофиқ ишга қабул қилади.

11. Ҳайъат ЎзАни бошқаришнинг бамаслаҳат иш олиб борувчи органидир. Ҳайъат агентликнинг Бош директори (ҳайъат раиси), лавозимига кўра унинг ўринбосарлари ҳамда ЎзА хизматлари ва бўлинмаларининг бошқа раҳбарларидан иборат таркибда тузилади. Ҳайъат таркибига ахборот соҳасидаги фаолият билан боғлиқ бўлган давлат бошқаруви бошқа органларининг, ташкилотлар ва муассасаларнинг, жамоат бирлашмаларининг вакиллари ҳам киритилиши мумкин.

ЎзА ҳайъат аъзоларини Ўзбекистон Республикаси Президенти ҳузуридаги Вазирлар Маҳкамаси тасдиқлайди.

Ҳайъат ўз мажлисларида агентликнинг ахборот соҳасидаги сиёсатини, унинг жорий ва истиқболдаги вазифаларини белгилайди, республикада ва чет элларда ЎзА тузилмаларини ривожлантириш, молиявий-иқтисодий фаолиятнинг аҳволи, кадрлар билан ишлаш масалаларини кўриб чиқади, ЎзА хизматлари ва бўлинмалари, шунингдек, ўзига қарашли корхоналар, муассасалар ва ташкилотларнинг ҳисоботларини тинглайди.

Ҳайъат қабул қилган қарорлар, одатда, ЎзА Бош директорининг буйруқлари билан амалга оширилади. Агентликнинг барча хизматлари ва бўлинмалари ҳайъат қарорларини бажаришлари шарт.

12. ЎзА юридик шахс ҳисобланади, ўз номи ёзилган ва Ўзбекистон Республикаси герби тасвири туширилган муҳрга эга бўлади.