Ўзбекистон Республикаси Президентининг «Ўзбекистон Республикасининг Банк-молия академиясини ташкил этиш тўғрисида» 1996 йил 2 майдаги ПФ-1460-сон Фармонини бажариш юзасидан Вазирлар Маҳкамаси қарор қилади:

1. Банк-молия академиясининг тузилмаси ва устави 1, 1а, 1б ва 2-иловаларга мувофиқ тасдиқлансин.

2. Белгилаб қўйилсинки:

академиянинг банк иши ва молия факультетларига фақат олий маълумотли шахслар қабул қилинади;

тингловчилар бир йиллик курсда ўқийдилар, уни муваффақиятли тугатганлар республика ва хорижий мамлакатларнинг етакчи банк ва молия муассасаларига тажриба орттиришга юбориладилар, уларга магистр унвонини бериш учун танланган мутахассислиги бўйича диплом ишини ҳимоя қиладилар.

3. Белгилансинки:

банк ва молия раҳбар кадрлари малакасини ошириш факультетига пул-молия тизимининг амалиётчи раҳбар ходимлари қабул қилинади;

малака ошириш факультети тингловчиларининг ўқиш даври олти ойгачани ташкил қилади, бунга банк ва молия иши асосий курсларини ўтиш, шунингдек етакчи молия ва банк муассасаларида тажриба орттириш ва амалий машғулотлар ҳам киради;

малака ошириш факультетида олти ойлик ўқишни муваффақиятли тугатишган тингловчиларга белгиланган намунадаги гувоҳнома берилади.

4. Академия раҳбарияти:

1996-1997 ўқув йили учун 80 нафар, шу жумладан банк иши факультетига — 40, молия факультетига — 20, банк ва молия раҳбар кадрлари малакасини ошириш факультетига — 20 нафар тингловчи қабул қилсин;

чет тилларни ўқув дастурига мувофиқ ва факультатив асосда, ўқув курси тугалланган тингловчиларнинг чет тиллардан бирини амалий эгаллашини таъминлайдиган даражада пухта ўрганишни ташкил этсин.

5. Ўзбекистон банклар уюшмасининг Банк-молия академияси ҳузурида:

Ўзбекистон Республикасида пул-молия тизимини ва банк ишини ривожлантириш стратегиясини;

Ўзбекистон Республикасининг ягона ва минтақавий молия бозорларини комплекс ва уйғун ҳолда ривожлантириш ҳамда уларни халқаро молия бозорлари тизимига босқичма-босқич интеграциялаш дастурларини;

банкларни бошқаришнинг ҳуқуқий ва норматив базасини ҳамда молия механизмини такомиллаштиришга доир тавсияномаларни ишлаб чиқиш бўйича фундаментал ва амалий тадқиқотларни йўлга қўйиш мақсадида Банк-молия тизимини ривожлантириш тадқиқотлари марказини ташкил этиш тўғрисидаги таклифига розилик берилсин.

6. Академия раҳбарияти ректор ва уч нафар проректордан иборат таркибда белгилансин.

7. Қуйидагилар:

академиянинг профессор-ўқитувчилар ва илмий-тадқиқотчи ходимларига республиканинг олий ўқув юртлари ва илмий-тадқиқот муассасаларида амалда бўлган меҳнатга ҳақ тўлаш миқдорлари;

қолган ходимларига — давлат ҳокимияти ва бошқаруви органлари ходимлари меҳнатига ҳақ тўлашнинг амалдаги шартларига мувофиқ тариф ставкалари;

тингловчиларга аъло ва яхши ўқиганлик учун — Ўзбекистон банклари уюшмаси ажратадиган мақсадли маблағлар ҳисобидан асосий стипендиянинг 50 фоизигача миқдорда шахсий устамалар белгилансин.

8. Академияда профессор-ўқитувчиларни, илмий-тадқиқотчи ва маъмурият ходимларини моддий рағбатлантириш махсус жамғармасини ташкил этиш назарда тутилсин.

Академия ректорига қуйидаги ҳуқуқлар берилсин:

академиянинг штат жадвалини тасдиқлаш, шунингдек зарурат бўлганда тузилмага ходимларининг умумий сони ва меҳнатга ҳақ тўлаш фонди доирасида ўзгартиришлар киритиш;

юқори малакали профессор-ўқитувчиларга, илмий-тадқиқотчи ва маъмурият ходимларига моддий рағбатлантириш махсус жамғармаси ҳисобидан тариф ставкасининг 100 фоизигача миқдорда ҳар ойлик устама белгилаш;

академияда ўқув жараёнини, илмий ва амалий тадқиқотларни ташкил этиш учун, шу жумладан хорижий мутахассислар учун эркин алмаштириладиган валютада контрактлар бўйича ҳақ тўлаган ҳолда, консультантлар, экспертлар ва мутахассисларни, шу жумладан жаҳондаги етакчи халқаро молия ташкилотлари ва тижорат банклари мутахассисларини жалб этишнинг турли иқтисодий шаклларидан фойдаланиш.

9. Белгилаб қўйилсинки, академия тингловчилари учун ўқув муддати мобайнида асосий иш жойидаги ўртача иш ҳақи сақлаб қолинади. Бошқа шаҳарлик тингловчиларга, шунингдек асосий иш жойидан амалдаги қонунчиликка мувофиқ ўқиш даврида суткалик харажатлар ҳамда ўқиш жойига бориб-келиш йўл ҳақи тўланади. Бошқа шаҳарлик тингловчилар ўқиш даврида ётоқхона билан таъминланадилар.

10. Молия вазирлиги ва Ўзбекистон банклар уюшмаси тенг улушларда:

1996 йилда аудиторияларни халқаро стандартларга мувофиқ техника билан жиҳозлаш, асбоб-ускуналар, идора мебеллари, шахсий компьютер техникаси, халқаро ахборот тармоқларига интеграциялаш учун телекоммуникация алоқасининг замонавий воситаларини сотиб олиш учун академия буюртманомаларига биноан маблағлар ажратсинлар;

академияни маблағ билан таъминлашга, шу жумладан ушбу қарор шартларига мувофиқ иш ҳақига, ўқув-услубий қўлланмалар ва илмий ишларни нашр этишга, академиянинг бинолари ва иншоотларини қайта қуриш, асосли тузатиш ва жиҳозлашга тақдим қилинадиган ҳисоб-китобларга биноан ҳар йили зарур маблағлар ажратсинлар;

хорижий мутахассисларни ишга таклиф этиш, ўқитувчиларнинг, энг яхши тингловчиларнинг хорижий банкларда ва молия ташкилотларида тажриба орттириш, академия профессор-ўқитувчиларининг ва илмий-тадқиқотчи ходимларнинг халқаро конференцияларда қатнашишлари, шунингдек даврий нашрларга обуна бўлиш, хорижий мамлакатларда нашр этиладиган дарсликларни ва ўқув қўлланмаларини сотиб олиш учун 1996 йилдан бошлаб ҳар йили, академия буюртманомаларига биноан зарур маблағлар ажратишни назарда тутсинлар.

11. Банк-молия академияси Тошкент шаҳар, Якуб Колас кўчасидаги 16-уйга жойлаштирилсин.

12. Ўзбекистон банклар уюшмаси «Тошкентуйжойинвестқурилиш» корпорацияси билан биргаликда хорижий фирмаларни жалб этган ҳолда, ўқув ва илмий-тадқиқот жараёни хусусиятларини назарда тутиб, академия биносини мослаштириш, қайта қуриш ва асосли тузатишни 1996 йил 1 октябргача амалга оширсин.

13. Ўзбекистон Республикаси Давлат матбуот қўмитаси:

академияни кутубхонани тўлдириш учун махфий бўлмаган матбуот нашрлари ва китоб маҳсулотларининг назорат нусхаларини (2 нусха) бепул оладиган ташкилотлар рўйхатига киритсин;

академия буюртмалари бўйича ўқув-услубий ва илмий асарларни тезкорлик билан нашр этишни ташкил қилсин.

14. Ўзбекистон Республикаси Алоқа вазирлиги академияни замонавий алоқанинг зарур воситалари, шу жумладан алоқанинг ҳукумат, халқаро ва бошқа турлари билан белгиланган тартибда таъминласин.

15. Академияга ўқитиш ва тадқиқот ишлари учун таклиф этиладиган хорижий олимлар, ўқитувчилар ва мутахассисларнинг яшаш ҳамда транспорт харажатларини Ўзбекистон Республикаси фуқаролари учун назарда тутилган тарифлар бўйича сўмларда тўлашига рухсат берилсин.

16. Мазкур қарорнинг бажарилишини назорат қилиш Бош вазир ўринбосари Б.С. Ҳамидов зиммасига юклансин.

Илмий кенгаш

Кадрлар бўлими

Банк иши факультети

Молия факультети

Банк ва молия раҳбар ходимлари малакасини ошириш факультети

Ўқув бўлими

Амалиёт ва тажриба орттириш бўлими

Кафедралар

Банк-молия тизими ривожланишини тадқиқ қилиш маркази

Ўқув-ахборот компьютер маркази

Нашриёт бўлими

Кутубхона

Халқаро алоқалар бўлими

Режалаштириш бўлими

Бухгалтерия

Хўжалик бўлими

Умумий бўлим

Спорт комплекси

Меҳмонхона комплекси

Босмахона

Гараж

1. Ўзбекистон Республикаси Банк-молия академияси (кейинги ўринларда «Академия» деб аталади) Ўзбекистон Республикаси Президентининг «Ўзбекистон Республикасининг Банк-молия академиясини ташкил этиш тўғрисида» 1996 йил 2 майдаги ПФ-1460-сон Фармони билан ташкил этилган ҳамда ўз фаолиятини Ўзбекистон Республикаси Конституциясига, Ўзбекистон Республикаси қонун ҳужжатларига ва мазкур Уставга мувофиқ амалга оширувчи олий таълим муассасаси мақомига эга бўлган иккинчи босқич (магистратура) республика олий таълим муассасаси ва илмий-тадқиқот маркази ҳисобланади.

2. Академия Ўзбекистон Республикасининг банк-молия соҳасида ҳамда банк ва молия ходимларини тайёрлаш, қайта тайёрлаш ва уларнинг малакасини ошириш бошқаруви тизимида етакчи ўқув-услубий, илмий ва ахборот-таҳлилий марказ ҳисобланади.

3. Қуйидагилар Академиянинг асосий вазифалари ва фаолияти йўналишлари ҳисобланади:

а) қуйидаги йўналишлар бўйича юқори малакали банк иши мутахассислари тайёрлаш:

монетар сиёсат ва пул муомаласи;

молия менежменти, активлар ва пассивларни бошқариш;

инвестиция лойиҳаларини ҳар томонлама экспертиза қилиш ва маблағ билан таъминлаш;

халқаро молия бозорларидаги операциялар;

банк аудити;

б) халқаро банк ишидаги энг янги ютуқларга мунтазам равишда ўқитиш йўли билан банк раҳбар ходимларини қайта тайёрлаш ва уларнинг малакасини ошириш;

в) мамлакатда молия-пул тизимини ва банк ишини босқичма-босқич ривожлантириш стратегияси соҳасида фундаментал ва амалий тадқиқотларни ташкил этиш.

4. Академия юридик ва жисмоний шахслар билан тузиладиган шартномалар асосида банк ва молия соҳаси мутахассисларини тайёрлаш, қайта тайёрлаш ва уларнинг малакасини оширишни, шунингдек шартномалар ва давлат буюртмаси асосида илмий тадқиқотларни ва ахборот-таҳлилий ишларни амалга оширади.

5. Академия юридик шахс ҳисобланади, мустақил балансга, банк муассасаларида миллий ва хорижий валютадаги ҳисоб-китоб счётларига, ўз номи давлат тилида ёзилган гербли муҳрга, думалоқ муҳрлар ва штампларга ҳамда унинг фаолияти учун зарур бўлган бошқа белгилар ва реквизитларга эга бўлади.

6. Академия ўқув ва таълим фаолиятини Ўзбекистон Республикаси иқтисодий ва ижтимоий-сиёсий ҳаётини ривожлантиришнинг замонавий талаблари ҳисобга олинган ҳолда ишлаб чиқилган ўқув режалари ва дастурлар, шунингдек молия ва банк иши соҳасидаги халқаро таълим стандартлари талаблари асосида амалга оширади.

Ўқитиш дастурлар бўйича олиб борилади, уларнинг хусусияти ўқитишнинг мақсадлари ва ихтисослашувига боғлиқ бўлади.

Ўқитиш муддатлари ва ҳажми турлича бўлган аниқ йўналишлар бўйича махсус ва факультатив курслар ташкил этилиши мумкин.

Ўқув, таълим ва касбга ўқитиш дастурлари буюртмачининг эҳтиёжларини, шунингдек, тегишли мутахассислик бўйича тайёрлаш даражасига давлат талабларини ҳисобга олган ҳолда Академия томонидан мустақил равишда ишлаб чиқилади, тасдиқланади ва амалга оширилади. Дастурларнинг бўлиши мажбурий ҳисобланади.

7. Мутахассислар тайёрлаш, кадрларни қайта тайёрлаш ва уларнинг малакасини ошириш кундузги ўқиш шаклида олиб борилади. Талабалар қабул қилиш тартиби, ўқитиш муддатлари ва шакллари Ўзбекистон Республикаси қонун ҳужжатларига, Ўзбекистон Республикаси Олий ва ўрта махсус таълим вазирлигининг низомларига мувофиқ белгиланади; кадрларни қайта тайёрлаш ва уларнинг малакасини ошириш Академия томонидан ўқитиш мақсадларига боғлиқ равишда белгиланади.

8. Банк-молия соҳаси ходимларини тайёрлаш, қайта тайёрлаш ва малакасини ошириш манфаатдор банклар ва молия муассасалари ҳамда алоҳида шахслар билан тузиладиган шартномалар асосида амалга оширилади.

Қайта тайёрлаш ва малака оширишга жалб қилинадиган банкларнинг раҳбар ходимлари учун ўқиш даврида асосий иш жойи бўйича ўртача иш ҳақи сақлаб қолинади. Бошқа шаҳарлик тингловчиларга шунингдек ўқиш даврида амалдаги қонун ҳужжатларига мувофиқ асосий иш жойи бўйича суткалик харажатлар тўланади ҳамда йўлловчи банк ёки молия органи ҳисобидан ўқиш жойига бориш-келиш йўл ҳақи тўланади. Бошқа шаҳарлик талабалар ва тингловчилар ўқиш даврида ётоқхона билан таъминланадилар.

9. Ўқитувчиликка республика илмий-тадқиқот институтлари, олий ўқув юртлари, вазирликлари ва идораларининг, банкларнинг етакчи мутахассислари, шунингдек, хорижий мамлакатларнинг олимлари ва мутахассислари ўриндошлик тарзида ишлаш ва соатбай ҳақ тўлаш шартлари билан жалб қилинади.

Хорижий мамлакатларнинг олимлари ва мутахассислари Академияда ишлаш учун контракт асосида жалб қилинади.

10. Академия талабалар ва тингловчиларни ўқитиш воситалари (ўқув адабиёти ва бошқа адабиётлар, аудиовизуал ва техник воситалар) билан таъминлайди. Ўзбекистонлик ва бошқа давлатларнинг талабалари ва тингловчилари контракт асосида ўқийдилар.

11. Академия талабалар ва тингловчилар билимларини текширишни, ўқиш натижаларини комплекс баҳолашни энг аввало тест синовлари асосида, шунингдек диплом ишлари, рефератлар ҳимоя қилиш, махсус ташкил этиладиган комиссиялар томонидан суҳбатлар ўтказиш асосида амалга оширади. Академияда таълим дастурларини ўзлаштириш мажбурий давлат якуний аттестацияси ўтказиш ва диплом лойиҳаларини тайёрлаш билан ниҳоясига етказилади.

12. Ўқув курсини тугатган тингловчиларга белгиланган намунадаги ҳужжатлар берилади.

13. Аспирантурага, докторантурага қабул қилиш ва тадқиқотчиларни бириктириб қўйиш қоидалари Академия Илмий кенгаши томонидан белгиланади.

14. Академия:

Ўзбекистон Республикасида пул-молия тизимини ва банк ишини ривожлантириш стратегиясини;

Ўзбекистон Республикаси ягона ва минтақавий бозорларини комплекс ва уйғун ривожлантириш ҳамда уларнинг халқаро молиявий бозорлар тизимига босқичма-босқич интеграциялашуви дастурларини;

банкларни ва молиявий механизмни бошқаришнинг ҳуқуқий ва норматив базасини такомиллаштиришга оид тавсияларни ишлаб чиқиш бўйича фундаментал ва амалий тадқиқотларни ташкил этиш ишларини мақсадли ва мунтазам амалга оширади.

15. Кўрсатиб ўтилган мақсадларни амалга ошириш учун Академия тузилмасида Банк-молия тизимини ривожлантириш тадқиқотлари маркази ташкил этилади. Марказ банк-молия тизимининг турли жиҳатларини ривожлантириш муаммолари ва истиқболларини ўрганиш учун шартномалар ёки давлат буюртмаси асосида вақтинчалик илмий жамоалар ташкил этади.

16. Марказ қўйилган вазифаларни амалга ошириш учун Ўзбекистон Республикаси, шунингдек хорижий мамлакатларнинг олимлари ва амалиётчи ходимларини шартнома асосида жалб этади.

17. Тадқиқ этиладиган муаммолар тузилмаси, мавзуси ва олиб борилаётган фаолият тўғрисидаги ҳисоботлар Академия Илмий кенгаши томонидан эшитилади ва тасдиқланади.

18. Академияда профессор-ўқитувчилар ва илмий таркиб, муҳандис-техник, маъмурий, ишлаб чиқариш, ёрдамчи ва бошқа ходимлар лавозимлари назарда тутилади. Барча лавозимлар меҳнат шартномаси (контракт) бўйича эгалланади.

19. Академиянинг профессор-ўқитувчилар ва илмий таркиби қуйидагиларга мажбурдир:

ўқув жараёнининг юқори самарали бўлишини таъминлаш, талабалар ва тингловчиларда ташаббускорликни ва ижодий қобилиятни, илмий изланишга интилишни ривожлантириш;

таълим мазмунининг юқори савияда бўлишини таъминлайдиган илмий тадқиқотларни олиб бориш;

ички тартиб қоидаларига риоя қилиш.

20. Академияда сиёсий партиялар, ижтимоий-сиёсий ва диний ҳаракатлар ташкил этилишига ва уларнинг фаолият кўрсатишига йўл қўйилмайди.

21. Ўқув-ёрдамчи ва маъмурий-хўжалик ходимларининг ҳуқуқ ва мажбуриятлари ички тартиб қоидалари ҳамда лавозим йўриқномалари билан белгиланади.

22. Академия фаолиятига раҳбарликни ректор, у бўлмаган ҳолларда — ўқув ишлари бўйича проректор амалга оширади.

23. Академия ректори Ўзбекистон банклар уюшмаси Кенгашининг тақдимномасига биноан Ўзбекистон Республикаси Вазирлар Маҳкамаси томонидан лавозимга тайинланади ва лавозимдан озод этилади.

Академия проректорлари Академия ректорининг тақдимномасига биноан Ўзбекистон банклар уюшмаси Кенгаши томонидан тайинланадилар ва озод этиладилар.

24. Академия фаолиятининг асосий масалаларини кўриб чиқиш учун ректор бошчилик қиладиган ва тасдиқлайдиган Академия Илмий кенгаши ташкил этилади.

Академия Илмий кенгаши таркибига Академиянинг проректорлари, илмий котиби, кафедра мудирлари, илмий-тадқиқот ва ахборот-таҳлилий бўлинмалари раҳбарлари, Академиянинг етакчи олимлари ва ходимлари, шунингдек бошқа ўқув ва илмий муассасаларнинг етакчи олимлари, республиканинг етакчи молия ва банк муассасалари вакиллари кирадилар.

Академия Илмий кенгаши:

ўқув, илмий-тадқиқот ва ахборот-таҳлилий ишлар, кадрлар тайёрлаш, халқаро алоқаларни амалга ошириш масалаларини, шунингдек Академияга қарашли филиаллар, институтлар ва бошқа ташкилотларнинг фаолияти масалаларини ҳал қилади;

ўқув дастурларини, ўқув режаларини ва манфаатдор ташкилотлар иштирокида ишлаб чиқилган алоҳида курслар дастурларини тасдиқлайди;

Банк-молия тизимини ривожлантириш тадқиқотлари марказининг тузилмасини, тадқиқ этилаётган муаммолар мавзуларини ҳамда олиб борилаётган фаолият тўғрисидаги ҳисоботларни эшитади ва тасдиқлайди;

Академия, унинг бўлинмалари раҳбарларининг ҳисоботларини тинглайди;

ўқитувчилар таркибидаги Академия ходимларига доцент ва профессор илмий унвонлари бериш масалаларини белгиланган тартибда ҳал қилади;

Академиянинг фахрий доктори даражасини беради.

Илмий кенгаш қарори Академия ректори томонидан тасдиқлангандан кейин кучга киради.

25. Академия ректори:

давлат ҳокимияти ва бошқаруви барча органларида, муассасалар ва ташкилотларда Академия номидан вакиллик қилади;

Академия Илмий кенгаши тўғрисидаги низомни ва унинг таркибини, Академия бўлинмалари, унинг филиаллари, унга қарашли муассасалар ва ташкилотлар тўғрисидаги уставлар ва низомларни тасдиқлайди;

ўқув-илмий, илмий-тадқиқот, ахборот-таҳлилий бўлинмалар раҳбарларини, факультетларнинг деканларини ва кафедра мудирларини тасдиқлайди;

Академиянинг кафедралари, ўқув-илмий, илмий-тадқиқот, ахборот-таҳлилий ва бошқа бўлинмаларини ташкил этиш, қайта ташкил этиш ва тугатиш ҳақида қарорлар қабул қилади;

тингловчилар, аспирантлар, докторантларни қабул қилиш қоидаларини ва тадқиқотчилар билан ишлаш тартибини белгилайди;

Академиянинг молиявий фаолияти масалаларини ҳал қилади;

Академиянинг мулки ва маблағларини белгиланган тартибда тасарруф этади;

барча ходимлар ва Академияда ўқиётганлар бажаришлари мажбурий бўлган буйруқлар, йўриқномалар ва фармойишлар чиқаради;

Академия ва унинг бўлинмалари ходимларини ишга қабул қилади ва ишдан бўшатади, Академияда ёлланиб ишлаш бўйича контрактлар тузади;

Академияни маблағ билан таъминлаш харажатлари сметасини тасдиқлайди;

бўлинмалар учун лавозимлар рўйхатини белгилайди, лавозим маошлари схемаларини, ойлик тариф ставкалари ва меҳнатга соатбай ҳақ тўлаш миқдорларини мавжуд маблағлар доирасида тасдиқлайди;

профессор-ўқитувчилар таркибининг ўқув иш нормаларини, ўқитиш ва Академия кўрсатадиган бошқа хизмат турлари учун ҳақ тўлаш миқдорларини тасдиқлайди;

Академия ходимлари меҳнатига ҳақ тўлаш ва уларни мукофотлаш шаклларини белгилайди;

Ўзбекистон Республикасининг қонун ҳужжатларига ва мазкур Уставга мувофиқ бошқа фаолиятни амалга оширади.

26. Академия ректори ўзининг айрим ваколатларини Академиянинг проректорига ва бошқа мансабдор шахсларига бериш ҳуқуқига эгадир.

27. Ўзбекистон банклар уюшмаси ажратган маблағлар, бюджетдан ажратилган маблағлар, турли давлат ва хусусий банклар, корхоналар, шу жумладан хорижий корхоналар билан тузилган шартномалар, шунингдек грантлар, техник ёрдам ва халқаро молия институтлари за хорижий банкларнинг ҳомийлик бадаллари Академия молия-хўжалик фаолиятининг асоси ҳисобланади.

28. Академияга қуйидаги ҳуқуқлар берилади:

белгиланган тартибда ноширлик фаолиятини амалга ошириш, йилига 4 марта чиқадиган банк-молия журналини нашр этади;

Академияга ажратилган маблағлар ёки ўз даромади ҳисобига давлат ёки тижорат корхоналаридан зарур асбоб-ускуналарни ва бошқа моддий ресурсларни сотиб олиш, ижарага олиш, уларга буюртма бериш;

Академияга тегишли бўлган мулкка, хўжалик ва бошқа хил фаолиятдан олинган маҳсулотга, даромадларга, шунингдек амалдаги қонунчилик йўл қўядиган бошқа асослар бўйича сотиб олинган мол-мулкка эгалик қилиш, ундан фойдаланиш ва уни тасарруф этиш;

илмий, ахборот-таҳлилий маҳсулотларни ишлаб чиқариш ва сотиш;

Академия томонидан ишлаб чиқариладиган маҳсулотларга ва кўрсатиладиган хизматларга тарифлар, нархлар ва баҳоларни мустақил равишда белгилаш;

моддий-техник базани ривожлантириш, Академия ходимларига ва таклиф этилган мутахассисларга меҳнат ҳақи тўлаш, уларни моддий рағбатлантириш, уй-жой-турмуш шароитларини яхшилаш, шунингдек мазкур Уставда назарда тутилган ижтимоий ва бошқа вазифаларни ҳал қилиш учун бюджетдан ажратиладиган маблағлар билан бир қаторда ишлаб топилган ва бошқа шахслар ҳамда ташкилотлардан олинган маблағларни ўз ихтиёрига кўра сарфлаш.

Ўзбекистон Республикаси қонун ҳужжатлари билан тақиқланмаган ва мазкур Уставга зид бўлмаган бошқа фаолиятни амалга ошириш.

29. Академия банк кредитидан фойдаланади ва кредит шартномаларининг бажарилиши ва ҳисоб-китоб интизомига риоя қилиниши учун жавоб беради. Пул маблағларини сақлаш ва ҳисоб-китоб, кредит ҳамда касса операцияларининг барча турларини амалга ошириш учун банк муассасаларида ўзининг счётлари (шу жумладан, валюта счётлари)га эга бўлади.

30. Академияда ўз маблағлари ва ўзига қарашли муассасаларнинг хўжалик фаолиятидан олинган даромадлар, шунингдек жалб қилинган бошқа маблағлар ҳисобига Академияни ривожлантириш жамғармаси ташкил этилади.

31. Академия талабалар (тингловчилар)ни тайёрлаш, қайта тайёрлаш, уларнинг малакасини ошириш ва уларни аттестациядан ўтказиш соҳасида халқаро ҳамкорлик қилиш, кадрлар тайёрлаш соҳасида хорижий ташкилотлар билан контрактлар тузиш, шунингдек Ўзбекистон Республикаси қонун ҳужжатларига мувофиқ ташқи иқтисодий фаолиятни амалга ошириш ҳуқуқига эгадир.

Академия талабалар (тингловчилар) учун ўқув жараёнининг зарур қисмини ва ходимларнинг тажриба орттиришини етакчи хорижий илмий ва ўқув марказларида, банкларда, халқаро молия ташкилотларида ва шу кабиларда мустақил равишда ташкил этади.

32. Академияда хорижий давлатлар фуқаролари малакасини ошириш ва қайта тайёрлаш, Академия профессор-ўқитувчилар таркиби ва талаба (тингловчи)ларининг чет эллардаги педагогик, илмий-тадқиқот ишлари ва тажриба орттириши тегишли битимлар ва контрактлар асосида амалга оширилади.

33. Академияни тугатиш ёки қайта ташкил этиш Ўзбекистон Республикаси Президентининг Фармонига мувофиқ ёки Ўзбекистон Республикаси Вазирлар Маҳкамасининг қарорига биноан амалга оширилади.