Ўзбекистон Республикаси Ҳукумати ва Тожикистон Республикаси Ҳукумати, кейинги ўринларда «Томонлар» деб аталувчилар,

аҳил қўшничилик ва дўстлик принципларига амал қилган ҳолда,

Томонлар давлатларида геодезия, картография, ер тузиш, кадастр ва ерни масофадан зондлаш ривожланиши муҳимлигини инобатга олиб,

геодезия, картография, ер тузиш, кадастр ва ерни масофадан зондлаш соҳасида, шунингдек, унга яқин фан соҳаларида ҳамда техника ва технологияларни қўллашда икки томонлама ҳамкорликнинг самарали шаклларини ривожлантиришга интилишни билдирган ҳолда,

ўз мамлакатларининг ижтимоий ва иқтисодий ривожланиши учун бундай турдаги ҳамкорлик натижаларини татбиқ этишга ёрдам берадиган геодезия, картография, ер тузиш, кадастр ва ерни масофадан зондлаш соҳаларида ҳамкорлик учун ҳуқуқий асосни яратишни истаган ҳолда,

қуйидагилар тўғрисида келишиб олдилар:

Томонлар икки давлат ўртасидаги геодезия, картография, ер тузиш, кадастр ва ерни масофадан зондлаш соҳаларидаги ҳамкорликка ўз давлатларининг қонунчилигига ва халқаро ҳуқуқнинг умумэътироф этилган принцип ва қоидаларига мувофиқ кўмаклашадилар.

Мазкур Битимни самарали амалга ошириш мақсадида Томонлар ҳамкорликни қуйидаги шаклларда амалга оширадилар:

қўшма дастур ва лойиҳаларни ишлаб чиқиш ва амалга ошириш;

йиғилишлар, конференциялар, симпозиумлар, семинарлар ва консультациялар ўтказиш;

биргаликдаги маърузалар, мақолалар ва монографияларни чоп этиш;

геодезия, картография, ер тузиш, кадастр ва ерни масофадан зондлаш соҳаларидаги қонунчилик ва бошқа норматив-ҳуқуқий ҳужжатлар, методик, илмий-техникавий адабиётлар билан алмашиш;

геодезия, картография ва аэрокосмик тасвирга олишлар бўйича биргаликдаги илмий-тадқиқот ишларини ўтказиш ва қўшма ахборот тизимларини яратиш;

Томонлар ёки уларнинг давлат органлари ва субъектлари тарафидан имзоланадиган фуқаролик-ҳуқуқий шартномалар ва контрактлар асосида ишларни олиб бориш, маслаҳат хизматларини кўрсатиш;

биргаликда аэрокосмик тасвирга олишларни Томонлар давлатларининг қонунчилигига мувофиқ равишда олиб бориш;

топография-геодезия, картографик, ер тузиш ва кадастр ишларини бажариш;

хариталар, атласлар ва бошқа чоп этиладиган маҳсулотларни нашр этиш бўйича полиграфик хизматлар;

геодезия, картография, ер тузиш, кадастр ва ерни масофадан зондлаш масалалари бўйича ўзаро қизиқиш уйғотадиган маълумотларни оммавий ахборот воситаларида чоп этиш, шунингдек, биргаликдаги маърузалар; мақолалар ва монографияларни эълон қилиш;

илмий-тадқиқот, экспериментал ва ишлаб чиқариш ишларини биргаликда амалга ошириш;

геодезия, картография, ер тузиш, кадастр ва ерни масофадан зондлаш ишларини бажариш бўйича ходимлар малакасини ошириш мақсадида мутахассисларни тайёрлаш, қайта тайёрлаш ва стажировка ўтказиш;

икки томонлама битимлар асосида ҳудудий мансублик бўйича бошланғич геодезик, картографик материаллар ва аэрокосмик тасвирга олиш материаллари билан алмашиш, Томонлар давлатларининг сири бўлган маълумотлар бундан мустасно;

топография-геодезия маҳсулотларини ишлаб чиқариш самарадорлигини ва ишончлилигини ошириш мақсадида геодезик ва фотограмметрик асбоб-ускуналарни сертификатлаш ва метрологик таъминлаш учун биргаликда стандартларни ишлаб чиқиш;

ҳамкорликнинг ўзаро келишилган бошқа шакллари.

Мазкур Битим қоидаларини мувофиқлаштириш ва амалга ошириш учун Томонлар ўзларининг қуйидаги ваколатли органларини тайинлайдилар:

Тожикистон тарафидан — Тожикистон Республикаси Ер бошқаруви ва геодезия давлат қўмитаси;

Ўзбекистон тарафидан — Ўзбекистон Республикаси Ер ресурслари, геодезия, картография ва давлат кадастри давлат қўмитаси.

Зарурият бўлганда, Томонларнинг ваколатли органлари мазкур Битим ижросини бажариш билан боғлиқ масалаларни муҳокама қилиш учун учрашув ўтказадилар.

Бошқа ваколатли орган тайинланган тақдирда, Томонлар қисқа муддатларда ёзма шаклда дипломатик каналлар орқали бир- бирларини хабардор этадилар.

Томонлардан бири мазкур Битим доирасида амалга оширилган тадбирлар натижасида олинган маълумотлардан иккинчи Томоннинг манфаатларига зарар етказиладиган тарзда фойдаланмайди.

Томонлар ўз давлатларининг қонунчилигига мувофиқ мазкур Битим доирасида ёки биргаликдаги фаолиятдан олинган маълумотларни, ҳужжатларни, материалларни ва асбоб-ускуналарни ҳимоя қиладилар.

Томонлар мазкур Битим доирасида олинган ёки яратилган ҳар қандай махфий маълумотларни ҳимоя қилиш учун ўзларининг махфий маълумотларини ҳимоя қилган даражада зарурий чораларни кўрадилар.

Томонлар махфий характерга эга маълумотлар, ҳужжатлар ва бошқа хабарларни учинчи шахсларга бермаслик мажбуриятини оладилар.

Ҳамкорлик дастурларини амалга ошириш учун ҳар иккала Томон ўз давлатларининг қонунчилигига ва мазкур Битим доирасида тузилган шартномаларга мувофиқ ўзаро фаолиятга кўмаклашиш, шу жумладан, зарурий жиҳозлар, анжомлар, асбоб-ускуналар, тайёр маҳсулотлар ва материалларни етказиб бериш ҳамда кўчириш юзасидан барча зарурий чораларни кўрадилар.

Томонлар мазкур Битимни амалга ошириш бўйича фаолиятни мувофиқлаштириш учун геодезия, картография, ер тузиш, ерни масофадан зондлаш соҳаларида ҳамкорлик бўйича Ўзбек-Тожик қўшма комиссиясини (кейинги ўринларда — Комиссия) тузадилар.

Мазкур Битим кучга кирганидан сўнг, Томонлар олти ой давомида бир-бирларини Комиссия ҳамраислари тайинлагани тўғрисида хабардор қиладилар. Комиссия ҳамраислари унинг таркибини тузади.

Комиссия Томонлар ўртасидаги ҳамкорлик дастурларини ишлаб чиқади ва тасдиқлайди, уларнинг бажарилишини мувофиқлаштиради ва ҳамкорликни ривожлантириш бўйича биргаликда қарорлар қабул қилади.

Ҳамкорликнинг молиявий шартлари ва қўшма лойиҳаларни амалга ошириш ҳар бир алоҳида ҳолатда Томонларнинг бюджет имкониятлари, шунингдек, бунга ваколатли бўлган давлат органлари доирасида кўриб чиқилади.

Мазкур Битим доирасида ишларни амалга ошириш мақсадида Комиссия мажлислари ва йиғилишларда иштирок этиш учун Томонлар вакиллари хизмат сафарига юборилганда, юборувчи Томон бошқа Томон давлатининг ҳудудида ўз вакилларининг сафар, овқатланиш ва яшаш харажатларини ўз зиммасига олади. Қабул қилувчи Томон ўз давлатининг ҳудудида Комиссия мажлисларини ва бошқа учрашувларни ташкил қилиш ва ўтказиш билан боғлиқ харажатларни ўз зиммасига олади.

Мазкур Битим доирасида фуқаролик-ҳуқуқий шартномалар асосида ишларни амалга оширишда молиялаштириш шартлари, ҳисоб-китоб қилиш тартиби, мажбуриятларни бажармаслик ёки лозим даражада бажармаслик учун жавобгарлик, шунингдек, мутахассисларни хизмат сафарига юбориш тартиби ушбу шартномалар билан белгиланади.

Мазкур Битим доирасида бирлашган фаолиятни амалга ошириш оқибатида олинган натижалар, башарти Томонлар ўртасида ўзгача келишувлар бўлмаса, нашр этилиши, учинчи давлатларнинг юридик ва жисмоний шахсларига берилиши ёки сотилиши мумкин эмас.

Томонлар мазкур Битим бўйича ўз зиммасига олган мажбуриятларнинг сўзсиз бажарилишида уларга боғлиқ бўлган барча чораларни кўриш ва зарурият бўлганда, Битимни амалга ошириш жараёнида юзага келадиган келишмовчиликларни биргаликда кўриб чиқиш мажбуриятини оладилар.

Мазкур Битимни талқин қилиш ва амалга оширишда юзага келадиган келишмовчиликлар Томонлар тарафидан музокаралар ва маслаҳатлашувлар ўтказиш орқали ҳал этилади.

Мазкур Битим Томонлар давлатлари иштирок этадиган халқаро шартномалардан келиб чиқадиган уларнинг ҳуқуқ ва мажбуриятларига дахл қилмайди.

Томонларнинг ўзаро келишувига мувофиқ мазкур Битимга унинг ажралмас қисми ҳисобланадиган ва алоҳида баённомалар билан расмийлаштириладиган ўзгартириш ва қўшимчалар киритилиши мумкин.

Мазкур Битим имзоланган санадан бошлаб кучга киради.

Мазкур Битим беш йил муддатга тузилади, башарти Томонлардан бири жорий беш йиллик муддат тугагунига қадар камида уч ой олдин ёзма равишда дипломатик каналлар орқали бошқа Томонни Битимнинг амал қилишини узайтирмаслик нияти тўғрисида хабардор қилмаса, у кейинги беш йиллик муддатларга ўз-ўзидан узаяверади.

Ҳар бир Томон мазкур Битим амал қилишини бу тўғрисида бошқа Томонга дипломатик каналлар орқали ёзма хабарнома юбориши орқали тугатиши мумкин. Битимнинг амал қилиши бошқа Томон тегишли маълумотни олганидан бошлаб уч ойдан сўнг тугатилади.

Мазкур Битим амал қилишининг тугатилиши унинг амал қилиши даврида бошланган дастур ва лойиҳаларни бажаришга дахл қилмайди.

Тошкент шаҳрида 2018 йил 17 августда икки асл нусхада, ҳар бири ўзбек, тожик ва рус тилларида тузилди, бунда барча матнлар бир хил кучга эга.

Мазкур Битим қоидаларини талқин қилишда келишмовчиликлар юзага келган тақдирда, Томонлар рус тилидаги матнга мурожаат қиладилар.