Ўзбекистон Республикаси Президенти Шавкат Мирзиёевнинг таклифига биноан 2018 йил 5 сентябрда Миср Араб Республикаси Президенти Абдулфаттоҳ ас-Сиси расмий ташриф билан Ўзбекистонда бўлди.

1. Давлат раҳбарлари ўзаро дўстона муҳитда бўлиб ўтган самарали музокаралар ва учрашувлар давомида икки томонлама кенг кўламли ҳамкорликнинг барча жабҳаларини муҳокама қилдилар ва долзарб халқаро муаммолар бўйича фикр алмашдилар.

Томонлар кўриб чиқилган барча масалалар юзасидан қарашлари яқин ва ўхшаш эканлигини мамнуният билан таъкидладилар.

Президентлар муқаддам эришилган келишувлар ва имзоланган икки томонлама ҳужжатларнинг амалга оширилиш жараёнини муҳокама қилдилар, сиёсий, савдо-иқтисодий, инвестициявий, инновацион ва илмий-техникавий, туризм ва маданият соҳаларида ўзаро манфаатли икки томонлама ҳамкорликни янада фаоллаштириш муҳимлигини қайд этдилар.

2. Томонлар кенг кўламли ўзаро манфаатли ҳамкорлик ва икки томонлама шартномавий-ҳуқуқий базани янада ривожлантириш ва мустаҳкамлашга интилишларидан келиб чиқиб, турли даражаларда сиёсий маслаҳатлашувлар ўтказиш ва шериклик алоқаларини мустаҳкамлашга тайёр эканликларини билдирдилар.

3. Миср Араб Республикаси Президенти Абдулфаттоҳ ас-Сиси ҳозирги кунда ҳаётга фаол татбиқ этилаётган 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар Стратегиясига, Президент Шавкат Мирзиёев раҳбарлигида Ўзбекистонда давлат ва жамият қурилиши ҳамда иқтисодиётни либераллаштиришнинг барча йўналишларида амалга оширилаётган демократик ислоҳотларга юқори баҳо берди.

Ўз навбатида, Ўзбекистон Республикаси Президенти Миср Араб Республикаси Президентининг сиёсий барқарорлик, иқтисодий ислоҳотлар, терроризм ва экстремизмга қарши курашдаги ютуқлари ҳамда ёшлар билан мамлакат келажаги ривожига қаратилган мулоқот йўлидаги саъй-ҳаракатларини юқори баҳолади.

Шу билан бирга, Мисрда муваффақият билан олиб борилаётган бунёдкорлик ишлари ва йирик лойиҳаларнинг амалга оширилиши мамнуният билан қайд этилди.

4. Президентлар минтақавий ва глобал ҳамкорларнинг қатъий қўллаб-қувватлаши билан Афғонистон Ислом Республикасида афғон халқи бошчилигида кенг қамровли тинчлик жараёнини тез фурсатда амалга ошириш муҳимлигини таъкидладилар.

Президентлар Афғонистонни барқарорлаштириш ва қайта тиклаш бўйича ўз саъй-ҳаракатлари ва ўхшаш ёндашувларини мамнуният билан қайд этиб, биргаликда ҳаракат қилиш ҳамда Афғонистон масалалари бўйича кўп томонлама форумлар доирасида ҳамкорликни кенгайтиришга чақирдилар.

Шу муносабат билан, Раҳбарлар 2018 йил 26-27 март кунлари Ўзбекистонда ўтказилган «Тинчлик жараёни, хавфсизлик соҳасида ҳамкорлик ва минтақавий шериклик» мавзусидаги Афғонистон бўйича конференцияда қабул қилинган Тошкент декларациясини амалга ошириш бўйича ҳамкорликка тайёр эканликларини таъкидладилар.

5. Давлат раҳбарлари турли низолар ва қарама-қаршиликларни сиёсий музокаралар, тинчлик ташаббуслари ва воситачилик саъй-ҳаракатлари орқали халқаро ҳуқуқ ва БМТ Низоми доирасида ҳал қилиш тарафдори эканликларини яна бир бор таъкидладилар.

6. Президентлар халқаро терроризм, диний экстремизм, ноқонуний миграция, гиёҳвандлик воситаларининг ноқонуний муомаласи, трансмиллий уюшган жиноятчилик ва бошқа минтақавий таҳдидларнинг кучайиб бораётганидан ташвишда эканликларини билдирдилар.

7. Томонлар савдо-иқтисодий, инвестициявий, инновацион, илмий-техникавий, туризм ва маданият соҳаларида икки томонлама ҳамкорликни ривожлантириш, шунингдек, қишлоқ хўжалиги соҳасида илғор тажриба ва илмий изланиш натижалари билан ўзаро алмашиш орқали ҳамкорлик қилиш муҳимлигини таъкидладилар.

Шу муносабат билан, Президентлар Иқтисодий ва илмий- техникавий ҳамкорлик бўйича Ўзбекистон-Миср ҳукуматлараро қўшма комиссиясининг йиғилишларини ва икки томонлама бизнес-форумларни мунтазам ва муваффақиятли ўтказишни кўллаб-қувватлашларини билдирдилар.

8. Президентлар икки мамлакат ўртасида савдо-иқтисодий алоқаларни ривожлантириш ва товар айирбошлаш ҳажмининг ўсишини таъминлашга қаратилган саъй-ҳаракатларни давом эттириш зарурлигини таъкидлаб ўтдилар. Савдо ҳажмини яқин йилларда камида ўн баробарга ошириш учун томонларда барча имконият ва захиралар мавжудлигини қайд этдилар.

Ўзбекистон томони Миср бозорида юқори талабга эга бўлган электротехника, машинасозлик, металлургия, кимё ва нефт-кимё, енгил саноат, озиқ-овқат, қишлоқ хўжалиги ва бошқа маҳсулотларни экспорт қилишга тайёрлигини билдирди.

Шунингдек, Миср томони Ўзбекистон бозорига дори-дармон, тиббиёт жиҳозлари, гиламлар, мебеллар, пардалар, нефть-кимё маҳсулотлари, рақамли хизматлар, мармар, керамика, тери ва пластик маҳсулотларини экспорт қилишга тайёр эканлигини билдирди.

Шу билан биргаликда, икки томонлама савдо айланмасига қулай шарт-шароитлар яратиш, товар айирбошлаш тузилмасини тўлиқ диверсификация қилиш ва унинг ҳажмини кенгайтириш масалаларини муҳокама қилиш мақсадида икки давлат масъул идоралари ўртасида музокаралар ўтказишга келишиб олинди.

9. Президентлар икки мамлакат ишбилармон доиралари вакилларининг делегациялар алмашинувини фаоллаштириш, Ўзбекистон ва Мисрда ўтказиладиган кўргазма-ярмаркаларда иштирок этиш, икки давлат минтақалари ўртасида ўзаро ҳамкорлик битимларини тузишни рағбатлантиришга чақирдилар.

Томонлар қишлоқ хўжалиги соҳасида илмий изланишлар натижалари ва илғор тажриба билан алмашиш борасида ишончли ҳамкорлик алоқаларини ўрнатишга келишиб олдилар.

10. Президентлар ташқи бозорларга тез ва самарали чиқишни таъминловчи транспорт ва транзит йўлакларини ривожлантириш соҳасида ҳамкорликни чуқурлаштириш мамлакатлар ўртасида

Халқаро савдо ҳажмини кенгайтиришда муҳим аҳамият касб этишини таъкидладилар.

Шу ўринда, Томонлар Халқаро сув йўлаги сифатида Сувайш канали аҳамиятини таъкидладилар. Сувайш каналидаги иқтисодий зона Ўзбекистон маҳсулотларини ишлаб чиқариш ва уни жаҳон бозорига чиқишини енгиллаштириш учун қулай муҳит яратади.

Шу мақсадда, Томонлар авиакомпанияларининг минтақалараро ҳамкорлик, эркин тадбиркорлик, туризм ва маданий алоқаларнинг ривожланишига кулай шарт-шароит яратишига асос бўладиган икки мамлакат ўртасида ҳаво қатновларини йўлга қўйишга қаратилган саъй-ҳаракатларини олкишладилар.

11. Давлат раҳбарлари Ўзбекистон Республикаси Жисмоний тарбия ва спорт ишлари вазирлиги, Ўзбекистон Ёшлар иттифоқи билан Миср Ёшлар ва спорт ишлари вазирлиги ўртасида ҳамкорлик ўрнатишни ва мазкур соҳада икки давлат ўртасида алоқаларни ривожлантиришни қўллаб-қувватлаш муҳим аҳамиятга эга эканлигини таъкидладилар.

12. Томонлар Ўзбекистон ва Миср халқлари ўртасидаги тарихий, маданий ва маънавий умумийликни ҳисобга олиб, гуманитар соҳада, ислом маданий ва илмий меросини ўрганиш ва муҳофаза қилиш бўйича ҳамкорликни ривожлантириш муҳим эканлигини таъкидладилар. Ўзбекистон ва Мисрнинг улкан тарихий-маданий ва маънавий мероси, уларнинг мусулмон дунёсидаги ўрни, ислом цивилизацияси ривожига қўшган ҳиссасини инобатга олиб, Томонлар бағрикенг исломни тарғиб қилишда ҳамкорликни давом эттириш зарур деб ҳисоблайдилар ва «Ал-Азҳар» мажмуасининг маърифатпарвар ислом ғояларини қўллаб-қувватлаш ва мустаҳкамлашдаги ўрнини эътироф этадилар.

13. Президентлар минтақавий ва глобал даражада хавфсизлик, тинчлик ва барқарорликни мустаҳкамлашга интилишларини яна бир бор таъкидладилар ҳамда Бирлашган Миллатлар Ташкилоти, Ислом ҳамкорлик ташкилоти ҳамда бошқа халқаро ва минтақавий тузилмалар доирасида ҳамкорликни янада кенгайтиришга қатъий тайёр эканликларини тасдиқладилар.

Миср томони Ўзбекистон томонининг БМТ Бош Ассамблеясининг «Марказий Осиё минтақасида тинчлик, барқарорлик ва изчил тараққиётни таъминлаш бўйича минтақавий ва халқаро ҳамкорликни мустаҳкамлаш» ва «Маърифат ва диний бағрикенглик» резолюцияларини тайёрлаш ва қабул қилиш, БМТнинг Ёшлар ҳуқуқлари тўғрисидаги Конвенциясини ишлаб чиқиш, шунингдек, Ислом ҳамкорлик ташкилотининг Фан ва технологиялар бўйича иккинчи саммитини 2020 йилда Ўзбекистонда ўтказиш бўйича ташаббусларини қуллаб-қувватлади.

Ўзбекистон томони Қоҳира шаҳрида Ислом ҳамкорлик ташкилоти ҳузурида Хотин-қизлар фаолиятини ривожлантириш ташкилотини ташкил этиш бўйича Миср Араб Республикасининг ташаббусини қўллаб-қувватлади.

14. Миср Араб Республикаси Президенти Абдулфаттоҳ ас-Сиси Ўзбекистон Республикаси Президенти Шавкат Мирзиёевга Миср делегацияси аъзоларига кўрсатилган меҳмондўстлик ва илиқ қабул учун самимий миннатдорлик билдириб, Ўзбекистон Республикаси Президентини ўзи учун қулай бўлган вақтда Миср Араб Республикасида расмий ташриф билан бўлишга таклиф қилди. Ташриф муддатлари дипломатик каналлар орқали келишилади.