Ҳўл мева-сабзавотлар ва бошқа қишлоқ хўжалиги маҳсулотларининг нобуд бўлишини камайтириш, «Ўзмевасабзавотузумсаноат» уюшмаси тизимида ихтисослаштирилган юк ташишларни ташкил этиш мақсадида Вазирлар Маҳкамаси қарор қилади:

1. «Ўзмевасабзавотузумсаноат» уюшмаси ва «Ўзавтотранс» корпорацияси корхоналарининг 1-иловага* мувофиқ «Ўзмевасабзавотузумсаноат» уюшмаси таркибида «Ўзагротранс» акционерлик-транспорт компаниясини тузиш тўғрисидаги таклифларига розилик берилсин.

2. Қуйидагилар маълумот учун қабул қилинсин:

автотранспорт корхоналари томонидан «Ўзмевасабзавотузумсаноат» уюшмаси билан биргаликда «Ўзагротранс» акционерлик-транспорт компаниясининг таъсис ҳужжатлари ишлаб чиқилган ва таъсис йиғилиши ўтказилган:

«Ўзагротранс» акционерлик-транспорт компанияси юридик шахс ҳисобланади ва очиқ турдаги акционерлик жамияти шаклида ташкил этилади;

компания таркибига кирувчи барча транспорт корхоналари юридик шахс мақомини сақлаб қоладилар;

компания таркибига ихтиёрийлик асосида, мулкчилик шаклларидан қатъи назар, юридик ва жисмоний шахслар, шу жумладан, хорижий юридик ва жисмоний шахслар киришлари мумкин;

компаниянинг устав фонди унга кирувчи корхоналарнинг пай бадаллари, шунингдек, бошқа юридик ва жисмоний шахслар ўртасида акцияларни сотиш ҳисобига ташкил топади.

3. Ўзбекистон Республикаси Давлат мулки қўмитаси:

«Ўзмевасабзавотузумсаноат» уюшмасига акцияларнинг давлат улушларини, шунингдек, компания таркибига кирган автотранспорт корхоналарининг эркин сотиш учун мўлжалланган акцияларининг бир қисмини бошқариш ҳуқуқини берсин, бу ҳуқуқни кейинчалик «Ўзагротранс» акционерлик-транспорт компаниясига беришни назарда тутсин. «Ўзмевасабзавотузумсаноат» уюшмаси «Ўзагротранс» акционерлик-транспорт компанияси билан акцияларнинг кўрсатиб ўтилган пакетларини бошқариш юзасидан тегишли шартнома тузсин;

«Ўзагротранс» акционерлик-транспорт компаниясига бошқариш учун ўзига берилган улушлардан акцияларнинг 35 фоизгачасини сотиб олишига рухсат этсин. «Ўзагротранс» акционерлик-транспорт компанияси таркибига кирувчи автокорхоналарнинг 1996 йил мобайнида сотиб олинмаган акциялар улуши Ўзбекистон Республикасининг фонд бозорида сотилиши керак;

«Ўзмевасабзавотузумсаноат» уюшмаси билан биргаликда 4-ишлаб чиқариш-тижорат корхонасини, 6-ишлаб чиқариш-тижорат корхонасини, 8-ишлаб чиқариш-тижорат корхонасини ва «Тошкент» ишлаб чиқариш-тижорат фирмаси корхоналарини, акциялар пакетини қуйидагича тақсимлаган ҳолда, очиқ турдаги акционерлик жамиятларига айлантирсин:

25% — давлат улуши

26% — меҳнат жамоаси улуши

49% — эркин сотиш учун;

«Ўзавтотранс» корпорацияси билан биргаликда «Ўзагротранс» акцонерлик-транспорт компаниясига бериладиган мол-мулкни «Пешку» акционерлик жамияти ва Хатирчи юк ташиш автоколоннаси бўйича тақсимласин ва ушбу корхоналарнинг устав фондларига тегишли ўзгартиришлар киритсин.

Автотранспорт корхоналари акцияларининг кўрсатиб ўтилган пакетларини бошқариш ва сотиб олиш схемаси 2-иловага* мувофиқ тасдиқлансин.

4. Қуйидагилар «Ўзагротранс» акционерлик-транспорт компаниясининг асосий вазифалари ва фаолият йўналишлари этиб белгилансин:

қишлоқ хўжалиги корхоналари, деҳқон (фермер) хўжаликлари билан ҳўл мева-сабзавотлар ва бошқа қишлоқ хўжалиги маҳсулотларини ташиш юзасидан қисқа муддатли ва узоқ муддатли контрактлар тузиш;

транспорт хизматлари бозорларини ва уларнинг ривожланиш истиқболларини комплекс ўрганиш;

республика аҳолиси ва халқ хўжалигининг автотранспортда самарали юк ташишларга бўлган эҳтиёжларини қондириш;

хорижий инвестицияларни жалб этишга кўмаклашувчи ўзаро фойдали ташқи иқтисодий алоқаларни йўлга қўйиш ва ривожлантириш ҳамда республика ташқарисида автотранспортда юк ташишларни амалга ошириш.

5. Қўйилган вазифаларни бажариш учун «Ўзагротранс» акционерлик-транспорт компанияси Хоразм автомобиль ишлаб чиқариш бирлашмаси томонидан ишлаб чиқарилган «Мерседес-Бенц» автопоездлари билан 3-иловага* мувофиқ таъминлансин ва унинг ихтисослаштирилган ҳаракатдаги состав билан ҳар йили тўлдириб борилиши назарда тутилсин.

«Ўзагротранс» акционерлик-транспорт компанияси 3-иловага мувофиқ корхоналар билан ажратиладиган автопоездларнинг қийматини тўлаш юзасидан компаниянинг Ўзбекистон Республикаси Молия вазирлиги ва Хоразм АИБ билан кўрсатиб ўтилган автопоездлар учун ҳисоб-китобларини ўз вақтида амалга оширишни таъминлайдиган миқдорларда шартномалар тузсин.

6. «Ўзагротранс» акционерлик-транспорт компанияси ва унга кирувчи автокорхоналар қўшилган қиймат, ер, мол-мулк, транспорт солиқларидан, божхона пошлиналари ва тадбирлари бўйича тўловлардан, шунингдек, Республика йўл жамғармасига йиғимлардан 5 йил муддатга озод қилинсин.

«Ўзагротранс» акционерлик-транспорт компанияси таркибига кирувчи автокорхоналар солиқлар ва тўловлар бўйича имтиёзлар муносабати билан бўшайдиган маблағларнинг камида 50 фоизини юк ташишлар бўйича кўрсатиладиган хизматлар қийматини пасайтиришга йўналтирсинлар.

7. «Ўздавнефтмаҳсулот» давлат-акционерлик бирлашмаси:

«Ўзавтотранс» корпорацияси ва «Ўзмевасабзавотузумсаноат» уюшмаси билан биргаликда ташкил этилаётган «Ўзагротранс» компаниясининг ёнилғи-мойлаш материалларига бўлган эҳтиёжини аниқласин;

«Ўзагротранс» акционерлик-транспорт компаниясини ёнилғи-мойлаш материалларига тегишли лимитлар билан таъминласин, бунда уларнинг қайта тақсимланишини, шунингдек, компаниянинг «Мерседес-Бенц» автопоездлари билан қўшимча равишда таъминланишини ҳисобга олсин.

8. Ўзбекистон Республикаси Адлия вазирлиги «Ўзагротранс» акционерлик-транспорт компаниясининг таъсис ҳужжатларини белгиланган тартибда рўйхатдан ўтказсин.

9. Ўзбекистон Республикаси Ташқи иқтисодий алоқалар вазирлиги «Ўзагротранс» акционерлик-транспорт компаниясининг халқаро юк ташишларни амалга ошириши учун лицензияни белгиланган тартибда расмийлаштирсин.

10. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.