Ўзбекистон Республикаси Президентининг 2017 йил 29 декабрдаги «Ўзбекистон Республикасининг 2017 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-3454-сонли қарорларини муҳокама қилиб, Ўзбекистон Республикаси «Маҳаллий давлат ҳокимияти тўғрисида»ги Қонунининг 24-моддасига асосланиб халқ депутатлари туман Кенгаши қарор қилади:

1. Оқолтин тумани маҳаллий бюджетининг 2018 йилга асосий истиқболли кўрсаткичлари иловага мувофиқ тасдиқлансин.

2. Туман ҳокимининг иқтисодиёт ва тадбиркорлик масалалари бўйича биринчи ўринбосари О. Абдуллаев, туман Давлат солиқ инспекцияси (Б. Қодирқулов), туман молия бўлими (У. Бойқулов) ҳамда туман ҳокимлиги ҳудудларни комплекс ривожлантириш йиғма бўлими саноат ва қишлоқ хўжалиги маҳсулотларини қайта ишлаш тармоғини, кичик бизнес ва хусусий тадбиркорликни қўллаб-қувватлаш, хизмат кўрсатиш соҳасини кенгайтириш орқали маҳаллий бюджетнинг даромадлар базасини ошириш юзасидан аниқ, манзилли чора-тадбирлар режасини ишлаб чиқиш ва ижросини таъминлаш вазифаси юклатилсин.

3. Туман ҳокимлиги асосий эътиборни, биринчи даражали харажатлар — иш ҳақи, ижтимоий нафақа ва стипендиялар тўлиқ молиялаштирилишига ва ўз вақтида тўланишига қаратиб, ушбу масалаларга туман Кенгашлари депутатлари, жамоатчиликни кенг жалб этишни таъминласинлар.

4. 2018 йилда туман бюджетида ижтимоий соҳа ва аҳолини ижтимоий қўллаб-қувватлаш харажатлари етакчи ўринни эгаллаб, ушбу соҳаларга ажратилган маблағлардан самарали фойдаланиш чоралари кўрилсин.

5. Туман молия бўлими (У. Бойқулов), туман бўйича ғазначилик бўлинмаси (Ш. Сарабеков) бюджет маблағларидан мақсадли ва самарали фойдаланиш устидан назоратни кучайтирсин.

6. Туман ҳокимлиги (А. Баратбоев)га марказлашган инвестициялар учун ажратилган маблағларни инобатга олиб, манзилли дастурлар асосида ушбу маблағлардан самарали фойдаланиш юзасидан махсус ишчи гуруҳ тузиш, нархларни асоссиз ўсиб кетишига йўл қўймаган ҳолда қишлоқ аҳолисини ичимлик суви билан таъминлаш бўйича белгиланган объектларни ўз муддатларида фойдаланишга топширилишига зарур тадбирларни амалга ошириш вазифаси юклатилсин.

7. Ушбу қарор ижросини ташкиллаштириш туман ҳокимининг иқтисодиёт ва тадбиркорлик масалалари бўйича биринчи ўринбосари О. Абдуллаев зиммасига юклатилсин.

8. Қарор расмий нашрда эълон қилинган кундан бошлаб кучга киради.

9. Мазкур қарор ижросини назорат қилиш Халқ депутатлари туман Кенгашининг маҳаллий бюджетни шакллантириш ва ижро этиш, иқтисодий ислоҳотларни амалга ошириш ва тадбиркорликни ривожлантириш масалалари бўйича доимий комиссияси раиси Х. Фармоновга юклатилсин.