«Ўзбекистон ҳаво йўллари» Миллий авиакомпаниясининг ҳаво кемаларига техник хизмат кўрсатиш ва аэропортлардан фойдаланиш бўйича муҳандисларга бўлган эҳтиёжидан келиб чиқиб, Кадрлар тайёрлаш миллий дастурининг мақсад ва вазифаларига мувофиқ ва олий таълим сифатига қўйиладиган умумеътироф этилган халқаро талабларга мувофиқ Вазирлар Маҳкамаси қарор қилади:

1. Ўзбекистон Республикаси Олий ва ўрта махсус таълим вазирлиги, Иқтисодиёт вазирлиги ва «Ўзбекистон ҳаво йўллари» Миллий авиакомпаниясининг Тошкент шаҳридаги Турин политехника университетида «Авиакосмик муҳандислиги» таълим йўналиши бўйича мутахассисларни мақсадли тайёрлаш тўғрисидаги таклифига розилик берилсин.

2. Тошкент шаҳридаги Турин политехника университетига:

Олий ва ўрта махсус таълим вазирлиги ҳамда Турин политехника университети (Италия Республикаси) билан 2017/2018-ўқув йилининг иккинчи семестридан «Машинасозлик технологияси» таълим йўналишининг учинчи курси негизида «Авиакосмик муҳандислиги» таълим йўналиши бўйича талабаларнинг 25 кишидан иборат дастлабки академик гуруҳни тайёрлашни бошлаш учун бакалавриатнинг тегишли ўқув дастурига ўзгартиришлар киритиш масаласини келишиш;

ўқув дастурига ўзгартиришлар киритишда биринчи навбатда «Ўзбекистон ҳаво йўллари» Миллий авиакомпаниясининг ушбу таълим йўналиши битирувчиларига қўядиган талабларини инобатга олиш тавсия этилсин.

3. Қуйидагилар маълумот учун қабул қилинсин:

хорижий профессор-ўқитувчиларни жалб қилиш ва ўқув дастурини ишлаб чиқиш ишлари Тошкент шаҳридаги Турин политехника университети ҳамда Турин политехника университети (Италия Республикаси) ўртасида тузиладиган шартномалар асосида амалга оширилади;

ушбу таълим йўналиши бўйича ўқув жараёнини ташкил этиш тадбирлари Тошкент шаҳридаги Турин политехника университети Васийлик кенгаши қарорлари асосида жалб этилган маблағлар, шунингдек, ҳомийлар маблағлари ва қонун ҳужжатларида тақиқланмаган бошқа манбалар ҳисобидан амалга оширилади.

4. «Ўзбекистон ҳаво йўллари» Миллий авиакомпанияси Тошкент шаҳридаги Турин политехника университети томонидан тайёрланган мутахассислар томонидан малака амалиётини ўташ учун лаборатория базаси ва база сифатида фойдаланиш учун компания корхоналарининг моддий-техника базасини тақдим этсин.

5. Ўзбекистон Республикаси олий ва ўрта махсус таълим вазирлиги ҳар йили Тошкент шаҳридаги Турин политехника университетига қабул квотасини тасдиқлаш тўғрисидаги ҳукумат қарорлари лойиҳаларини тайёрлашда «Ўзбекистон ҳаво йўллари» Миллий авиакомпанияси мутахассисларига бўлган эҳтиёжга мувофиқ янги очилган таълим йўналишини ҳисобга олсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари К.В. Акмалов, Н.С. Отажонов, Ўзбекистон Республикаси олий ва ўрта махсус таълим вазири И.У. Мажидов ва «Ўзбекистон ҳаво йўллари» миллий авиакомпанияси бош директори У.У. Розукулов зиммасига юклансин.