Аҳолининг ҳуқуқий маданиятини ошириш, юридик ва жисмоний шахсларнинг меъёрий-ҳуқуқий ҳужжатлардан кенг фойдаланишини таъминлаш, жамиятни ҳуқуқий ахборотлар билан таъминлаш тизимини такомиллаштириш ва амалдаги қонун ҳужжатларини босқичма-босқич туркумлашни ташкил этиш мақсадида Вазирлар Маҳкамаси қарор қилади:

1. 2000 йил 1 сентябрдан бошлаб Ўзбекистон Республикасининг барча меъёрий-ҳуқуқий ҳужжатлари давлат ҳисоби жорий этилсин.

Ўзбекистон Республикаси меъёрий-ҳуқуқий ҳужжатларининг давлат ҳисобини юритиш функцияси Ўзбекистон Республикаси Адлия вазирлигига юклансин.

Ўзбекистон Республикаси Адлия вазирлиги икки ой муддатда Ўзбекистон Республикаси меъёрий-ҳуқуқий ҳужжатларининг давлат ҳисоби тўғрисидаги Низомни ишлаб чиқсин ва тасдиқласин.

2. Ўзбекистон Республикаси Қонунлари мажмуасини нашр этишни ташкил қилиш юзасидан таклифлар тайёрлаш бўйича 1-иловага* мувофиқ таркибда комиссия тузилсин.

Комиссия 2000 йил 1 ноябргача Вазирлар Маҳкамасига:

Ўзбекистон Республикаси Қонунлари мажмуаси схемаси, унинг материалларини шакллантиришнинг асосий принциплари ва тайёрланган бўлимларни кўриб чиқишга тақдим этиш тартиби тўғрисида таклифларни;

Ўзбекистон Республикаси Қонунлари мажмуасини тайёрлаш ва нашр этишнинг Мажмуа бўлимларини чоп этиш муддатлари назарда тутилган режасини киритсин.

Комиссияга Ўзбекистон Республикаси Қонунлари мажмуасини тайёрлаш ва нашр этишни ташкил қилиш бўйича таклифларни ишлаб чиқишда қатнашиш учун вазирликлар, давлат қўмиталари ва идораларни жалб этиш ҳуқуқи берилсин.

3. Меъёрий-ҳуқуқий ҳужжатларни тарқатиш тартиби тўғрисидаги Низом 2-иловага мувофиқ тасдиқлансин.

4. Ўзбекистон Республикаси Адлия вазирлиги:

Ўзбекистон Республикаси Давлат матбуот қўмитаси ва «Матбуот тарқатувчи» акциядорлик компанияси билан биргаликда Ўзбекистон Республикаси қонун ҳужжатлари тўпламининг ҳамда Вазирликлар, давлат қўмиталари ва идоралар меъёрий ҳужжатлари ахборотномасининг даврий равишда, ҳар ойда икки марта нашр этилишини, шунингдек уларнинг очиқ обуна йўли билан тарқатилишини таъминласин;

Қонун ҳужжатлари маълумотлари миллий базаси (Ўзбекистон Республикаси қонун ҳужжатлари маълумотларининг туркумланган ягона электрон базаси)нинг шакллантирилиши ва ишлашини таъминлаш учун Ўзбекистон Республикаси Фан ва техника давлат қўмитаси, Ўзбекистон Почта ва телекоммуникациялар агентлиги ҳамда «UzPAK» маълумотларни узатиш давлат тармоғини ривожлантириш ва ундан фойдаланиш корхонаси билан биргаликда 2000 йил 1 ноябргача Адлия вазирлиги марказий аппаратининг маҳаллий компьютер тармоғини ишга туширсин;

Ўзбекистон Республикаси Фан ва техника давлат қўмитаси билан биргаликда 2000-2001 йиллар мобайнида Қонун ҳужжатлари маълумотлари миллий базасини шакллантиришга доир ишларни амалга оширсин, шунингдек тендер асосида тегишли ахборот-қидириш тизимини ишлаб чиқсин ва жорий этсин.

5. Ўзбекистон Почта ва телекоммуникациялар агентлиги ҳамда «UzPAK» маълумотларни узатиш давлат тармоғини ривожлантириш ва ундан фойдаланиш корхонаси:

Ўзбекистон Республикаси Адлия вазирлиги билан биргаликда вазирлик меъёрий-ҳуқуқий ҳужжатлар матнларини электрон почта тизими орқали тегишли органлардан олишини 2000 йил 1 сентябргача ташкил этсинлар;

яратилаётган маълумотлар электрон базасидан давлат ҳокимияти республика ва маҳаллий органлари, бошқа базадан фойдаланувчиларнинг тармоқ орқали фойдалана олишларини 2000 йил 1 ноябргача таъминлашда Ўзбекистон Республикаси Адлия вазирлигига ёрдам кўрсатсинлар.

6. Ўзбекистон Республикаси Адлия вазирлигининг:

Адлия вазирлигининг Меъёрий ҳужжатларни ҳисобга олиш ва туркумлаш бўлими негизида Вазирлик марказий аппарати ходимларининг мавжуд сони доирасида Қонун ҳужжатларини туркумлаш ва ҳуқуқий ахборот бошқармасини ташкил этиш тўғрисидаги;

Адлия вазирлигининг Ахборот-юридик марказини Адлия вазирлиги ҳузуридаги хўжалик ҳисобидаги Ҳуқуқий ахборот билан таъминлаш марказига айлантириш, мавжуд штатларни Қонун ҳужжатларини туркумлаш ва ҳуқуқий ахборот бошқармасига бериш тўғрисидаги таклифларига розилик берилсин.

Ўзбекистон Республикаси Адлия вазирлиги бир ой муддатда Ҳуқуқий ахборот билан таъминлаш маркази уставини ишлаб чиқсин ва тасдиқласин, унинг фаолиятига доир ташкилий масалаларни ҳал этсин.

7. Вазирлар Маҳкамасининг Ташқи иқтисодий фаолиятни мувофиқлаштириш департаменти меъёрий-ҳуқуқий ҳужжатларни нашр этиш, Қонун ҳужжатлари миллий базасини шакллантириш ва маҳаллий ҳисоблаш тармоғини барпо этиш учун зарур материаллар ва асбоб-анжомлар сотиб олиш, Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази фаолиятини ташкил этиш учун грант маблағларини жалб қилиш тўғрисидаги масалани халқаро ташкилотлар ва хорижий давлатлар билан ишлаб чиқсин.

8. Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази олиб келинаётган асбоб-ускуналар ва материаллардан даромад (фойда) солиғи, мол-мулк солиғи ва божхона тўловлари (божхонада расмийлаштирилганлиги учун олинадиган тўловлар бундан мустасно) тўлашдан, бўшаб қолган маблағлар Марказнинг моддий-техника базасини ривожлантиришга, маҳаллий ҳисоблаш тармоғи ва Қонун ҳужжатлари миллий базасини барпо этишга йўналтирган ҳолда, истисно тариқасида уч йил муддатга озод қилинсин.

9. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.

1. Мазкур Низом Ўзбекистон Республикасининг меъёрий-ҳуқуқий ҳужжатларини Қонун ҳужжатлари маълумотлари миллий базаси (Ўзбекистон Республикаси қонун ҳужжатлари маълумотларининг туркумланган давлат ягона электрон базаси) орқали Ўзбекистон Республикаси Қонун ҳужжатлари тўпламида, Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномасида, шунингдек норасмий тартибда тарқатишнинг асосий шартларини белгилайди.

Меъёрий-ҳуқуқий ҳужжатлар расмий ва норасмий нашрларда, шу жумладан, электрон маълумотлар базаси орқали уларни эълон қилиш йўли билан тарқатилади, махфий тусга эга бўлган ёки эълон қилинмайдиган ҳужжатлар матнлари бундан мустасно.

Давлат ҳокимияти ва бошқаруви органлари томонидан қонун ҳужжатларида белгиланадиган расмий матбуот нашрларида меъёрий-ҳуқуқий ҳужжатларнинг нашр этилиши меъёрий-ҳуқуқий ҳужжатларнинг расмий нашрлари ҳисобланади.

2. Ўзбекистон Республикаси Қонун ҳужжатлари тўплами ва Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномаси Ўзбекистон Республикаси амалдаги қонун ҳужжатларининг расмий даврий нашрлари ҳисобланади.

3. Ўзбекистон Республикаси Қонун ҳужжатлари тўпламига янгидан қабул қилинадиган:

Ўзбекистон Республикаси қонунлари;

Олий Мажлис қарорлари;

Конституциявий суд қарорлари;

Ўзбекистон Республикаси Президентининг фармонлари ва фармойишлари;

Ўзбекистон Республикаси Вазирлар Маҳкамаси қарорларининг меъёрий тусдаги барча матнлари киритилади.

4. Ўзбекистон Республикаси Қонун ҳужжатлари тўпламида эълон қилинадиган ҳужжатлар тегишли тартиб рақамлари бўлган моддаларга жойлаштирилади. Ҳужжатларга иловалар ҳам ҳужжатлар жойлаштирилган моддаларга жойлаштирилади.

5. Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномасига Ўзбекистон Республикаси Адлия вазирлиги томонидан рўйхатдан ўтказилган умумий мажбурий тусдаги идоравий меъёрий ҳужжатлар киритилади.

6. Меъёрий ҳужжатлар матнлари Ахборотномада уларнинг тартиб рақамлари ва Адлия вазирлигида давлат рўйхатидан ўтказилган санасига мувофиқ изчил тадрижий тартибда жойлаштирилади.

7. Катта ҳажмдаги меъёрий ҳужжатлар матнлари Ахборотномага киритилмаслиги мумкин. Бунда матнлар уларни қабул қилган органлар томонидан алоҳида нашр ҳолида эълон қилиниши керак.

8. Ўзбекистон Республикаси Қонун ҳужжатлари тўплами ва Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномаси ҳар ойда икки марта, ўзбек ва рус тилларида чиқади ҳамда очиқ обуна йўли билан тарқатилади.

9. Қонун ҳужжатлари маълумотлари миллий базасига меъёрий тусдаги қуйидаги ҳужжатлар матнлари киритилади:

Ўзбекистон Республикаси Конституцияси ва қонунлари;

Ўзбекистон Республикасининг халқаро шартномалари;

Олий Мажлис қарорлари;

Конституциявий суд қарорлари;

Ўзбекистон Республикаси Президентининг фармонлари ва фармойишлари;

Ўзбекистон Республикаси Вазирлар Маҳкамасининг қарорлари;

идоравий меъёрий ҳужжатлар.

Қонун ҳужжатлари маълумотлари миллий базаси шаклланишига қараб унга жойлардаги давлат ҳокимияти органларининг меъёрий-ҳуқуқий ҳужжатлари босқичма-босқич киритиб борилади.

10. Ташкил этилаётган маълумотлар электрон базасидан давлат бюджетидан маблағ билан таъминланадиган давлат ҳокимияти ва бошқарувининг республика ва маҳаллий органлари текин фойдаланадилар, бошқа фойдаланувчилар маълумотларни узатиш идоралараро тармоғи, Интернет глобал тармоғи, шунингдек бошқа каналлар орқали белгиланган тартибда фойдаланадилар.

11. Қонун ҳужжатлари маълумотлари миллий базаси Вазирлар Маҳкамасининг 1998 йил 27 октябрдаги 454-сон қарори билан тасдиқланган Ўзбекистон Республикаси Қонунчилик тармоқлари умумҳуқуқий классификатори асосида шакллантирилади.

12. Қонун ҳужжатлари маълумотлари миллий базасида қўлланган қонунчилик классификацияси Ўзбекистон Республикаси давлат ва хўжалик бошқаруви органларида қонун ҳужжатларини туркумлашда, шунингдек Ўзбекистон Республикаси Қонунчилик тармоқлари умумҳуқуқий классификаторини тижорат мақсадлари учун маълумотларнинг туркумланган базасида қўллашда эталон ҳисобланади.

13. Ўзбекистон Республикаси Қонун ҳужжатлари тўпламининг ўз вақтида нашр этилишини таъминлаш ва Қонун ҳужжатлари маълумотлари миллий базасини тўлдириш учун Ўзбекистон Республикаси Олий Мажлиси Котибияти, Ўзбекистон Республикаси Президенти Девони ва Ўзбекистон Республикаси Вазирлар Маҳкамаси Аппарати тегишли меъёрий-ҳуқуқий ҳужжатлар қабул қилинган кундан бошлаб бир кун мобайнида уларнинг матнларини қоғоз ва электрон матнларда Ўзбекистон Республикаси Адлия вазирлигига жўнатадилар. Бунда меъёрий-ҳуқуқий ҳужжатларнинг электрон матнлари электрон почта тизими орқали Адлия вазирлигига жўнатилади.

Меъёрий-ҳуқуқий ҳужжатларнинг келиб тушган матнларидан уларнинг давлат ҳисобини юритиш ва Ўзбекистон Республикаси Қонунлари мажмуасини шакллантириш учун ҳам фойдаланилади.

14. Ўзбекистон Республикаси вазирликлари, давлат қўмиталари ва идораларнинг меъёрий ҳужжатлари ахборотномаси ўз вақтида нашр этилишини таъминлаш, шунингдек Қонун ҳужжатлари маълумотлари миллий базасини тўлдириш учун тегишли органлар ўз меъёрий ҳужжатларини Адлия вазирлигида давлат рўйхатидан ўтказишда вазирликка ушбу ҳужжатларнинг электрон матнларини электрон матнларда ёки электрон почта тизими орқали тақдим этадилар.

15. Меъёрий-ҳуқуқий ҳужжатларни норасмий нашр этиш, шунингдек яратилаётган қонун ҳужжатлари маълумотлари электрон базаси давлат ва хўжалик бошқаруви барча органлари, юридик ва жисмоний шахслар томонидан амалга оширилиши мумкин ва уларда меъёрий-ҳуқуқий ҳужжатларнинг барча реквизитлари, шунингдек улар эълон қилинган расмий манбалар ва кучга кириш санаси кўрсатилган бўлиши керак.

16. Меъёрий-ҳуқуқий ҳужжатларни эълон қилишнинг расмий манбаларидан давлат ва хўжалик бошқаруви органлари ўзларига юкланган вазифаларни бажариш мақсадида уларни қўллашда мажбурий равишда фойдаланадилар. Бунда давлат ва хўжалик бошқаруви органлари меъёрий-ҳуқуқий ҳужжатларнинг ўз марказий аппаратларига, таркибий ва ҳудудий бўлинмаларига ўз вақтида келиб тушишини, шунингдек меъёрий-ҳуқуқий ҳужжатларнинг туркумлаштирилган ҳисоби юритилишини таъминлашга мажбурдирлар.

17. Ўзбекистон Республикаси Қонунлар тўпламини ва Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномасини нашр этишни ташкил этиш, Ўзбекистон Республикаси Қонун ҳужжатлари маълумотлари миллий базасини ташкил этиш ва унинг ишлашига умумий раҳбарлик Ўзбекистон Республикаси Адлия вазирлигининг Қонун ҳужжатларини туркумлаш ва ҳуқуқий ахборот бошқармаси томонидан амалга оширилади.

Ўзбекистон Республикаси Қонун ҳужжатлари маълумотлари миллий базасини шакллантириш ва доимий равишда янгилаб бориш, маълумотлар базасини сақлаш, маълумотлар электрон базасидан белгиланган тартибда фойдаланишни таъминлаш Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази томонидан амалга оширилади.