Ўзбекистон Республикаси Вазирлар Маҳкамасининг «Эстрада қўшиқчилик санъатини янада ривожлантириш тўғрисида» 2001 йил 26 июндаги 272-сон қарорига мувофиқ ҳамда гастроль-концерт фаолиятига солиқ солишни, шунингдек грампластинкалар, аудио ва видеокассеталар, лазер дисклари, бошқа аудио-видео кассеталарни ишлаб чиқариш, кўпайтириш ва сотиш билан боғлиқ фаолиятни тартибга солиш мақсадида Вазирлар Маҳкамаси қарор қилади:

1. Белгилансинки, 2001 йил 1 июлдан бошлаб:

гастроль-концерт фаолияти билан шуғулланиш ҳуқуқи учун лицензия олувчи юридик ва жисмоний шахслар «Ўзбекнаво» эстрада бирлашмаси томонидан белгиланадиган рейтинг гуруҳига кўра табақалаштирилган миқдорларда давлат божи тўлайдилар ҳамда бюджетга давлат солиқлари ва маҳаллий солиқлар тўлашдан озод этиладилар;

фаолиятини бошлаётган ижодий жамоалар ва ижрочилар томонидан гастроль-концерт фаолияти билан шуғулланиш ҳуқуқи учун лицензия олишда улар томонидан бож давлат рўйхатидан ўтказилган пайтдан бошлаб биринчи йилда бошланғич ставка бўйича тўланади;

гастроль-концерт фаолияти билан шуғулланиш ҳуқуқи учун лицензия бериш тўғрисидаги аризалар кўриб чиқилганлиги учун йиғимлар суммаси, шунингдек лицензия берилганлиги учун давлат божи тўлиқ миқдорда «Ўзбекнаво» эстрада бирлашмаси уставида назарда тутилган тадбирларни амалга ошириш учун Миллий эстрада санъатини ривожлантириш ва мувофиқлаштириш Кенгаши ҳузуридаги Эстрада санъатини ривожлантириш жамғармасига ўтказилади;

жисмоний ва юридик шахслар белгиланган тартибда берилган лицензиясиз гастроль-концерт фаолиятини амалга оширишга ҳақли эмас.

2. Қуйидагилар:

концерт-тамоша фаолияти билан шуғулланиш ҳуқуқи учун божнинг табақалаштирилган миқдорлари 2-иловага мувофиқ тасдиқлансин.

«Ўзбекнаво» эстрада бирлашмасига белгиланган тартибда, Миллий эстрада санъатини ривожлантириш ва мувофиқлаштириш Кенгаши билан келишган ҳолда ўн кун муддатда эстрада ижрочиларини тегишли рейтинг гуруҳларига киритиш бўйича мезонлар ва малака талабларини ишлаб чиқиш ва тасдиқлаш топширилсин.

5. Ўзбекистон Республикаси Маданият ишлари вазирлиги Молия вазирлиги ва Давлат солиқ қўмитаси билан биргаликда Миллий эстрада санъатини ривожлантириш ва мувофиқлаштириш Кенгашининг таклифларини ҳисобга олган ҳолда ўн кун муддатда лицензияларнинг ва уларни бериш тўғрисидаги аризаларнинг намунавий шаклларини, шунингдек:

грампластинкалар, аудио ва видеокассеталар, лазер дискларини ишлаб чиқиш, ишлаб чиқариш, кўпайтириш ва сотиш фаолиятини;

Ўзбекистон Республикасида ва унинг ташқарисида гастроль-концерт фаолиятини амалга оширишга лицензия битимларининг намунавий шаклларини белгиланган тартибда тасдиқласин.

6. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари 2001 йил 1 октябргача;

гастроль-концерт фаолиятини амалга оширувчи юридик шахсларнинг таъсис ҳужжатлари мазкур қарорга мувофиқлаштирилишини;

илгари грампластинкалар, аудио ва видеокассеталар, лазер дискларини ишлаб чиқиш, ишлаб чиқариш, кўпайтириш ва сотиш бўйича фаолият билан шуғулланиш ҳуқуқи учун лицензия олган юридик шахсларга белгиланган тартибда лицензия берилишини таъминласинлар.

7. «Ўзбекнаво» эстрада бирлашмаси, Ўзбекистон Республикаси Давлат солиқ қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, «Ўзбеккино» давлат-акциядорлик компанияси, «Ўзтелерадио» компанияси хўжалик субъектлари томонидан гастроль-концерт фаолияти билан шуғулланишнинг, шунингдек грампластинкалар, аудио ва видеокассеталар, лазер дискларини ишлаб чиқиш, ишлаб чиқариш, кўпайтириш ва сотиш бўйича фаолиятнинг белгиланган тартибига риоя этилишининг қатъий ва ҳамма жойда назорат қилинишини таъминласинлар, фаолиятнинг кўрсатиб ўтилган турлари билан тегишли лицензия олмасдан шуғулланувчи шахсларни амалдаги қонун ҳужжатларига мувофиқ жавобгарликка тортсинлар.

8. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда:

Вазирлар Маҳкамасига амалдаги қонун ҳужжатларига мазкур қарордан келиб чиқувчи ўзгартириш ва қўшимчалар киритиш тўғрисида таклифлар киритсин;

идоравий норматив ҳужжатлар мазкур қарорга мувофиқлаштирилишини таъминласин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С.Азимов ва Ҳ.С.Кароматов зиммасига юклансин.

Изоҳ. Рейтингнинг IV гуруҳига киритилган, фаолиятини бошлаётган ижодий жамоалар ва ижрочилар томонидан гастроль-концерт фаолияти билан шуғулланиш ҳуқуқи учун лицензия олишда бож улар давлат рўйхатидан ўтказилган вақтдан бошлаб биринчи йилда бошланғич ставка бўйича тўланади.

Давлат божи миқдорлари (чораклар бўйича бўлиб-бўлиб тўланганда — давлат божининг тегишли қисми) тўлов кунидаги энг кам ойлик иш ҳақи миқдоридан келиб чиққан ҳолда аниқланади.