Ўзбекистон Республикаси Олий Мажлисининг Қонунчилик палатаси Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг ва давлат мақсадли жамғармалари бюджетларининг 2016 йил биринчи чорагидаги ижроси тўғрисидаги ҳисоботни Ўзбекистон Республикаси Бюджет кодексининг 169-моддасига ва Ўзбекистон Республикаси Олий Мажлиси Қонунчилик палатаси Регламентининг 211-моддасига мувофиқ кўриб чиқди.

Ўзбекистон Республикаси Президенти И.Каримов томонидан белгилаб берилган 2016 йилги иқтисодий дастурнинг энг муҳим вазифаларини амалга ошириш, шунингдек мамлакат иқтисодиётини диверсификация ва модернизация қилиш бўйича чора-тадбирлар комплексини амалга оширишни давом эттириш 2016 йилнинг биринчи чорагида асосий макроиқтисодий кўрсаткичларнинг ижобий ўсиш суръатлари сақланиб қолишини ҳамда иітисодиёт янада мутаносиб ривожланишини таъминлади.

Жорий йилнинг биринчи чорагида ялпи ички маҳсулотнинг ўсиши 7,5 фоизни ташкил этди, хусусан саноат маҳсулотини ишлаб чиқариш ҳажмлари 7,0 фоиз, қишлоқ хўжалиги маҳсулоти ишлаб чиқариш 6,7 фоиз, чакана товар айланиши 12,8 фоиз ўсди ҳамда бу Давлат бюджети даромадлари ва харажатлари Ўзбекистон Республикаси Олий Мажлиси томонидан тасдиқланган параметрларга мувофиқ ижро этилишини таъминлаш имконини берди.

Йил бошидан буён илгари ўз маҳсулотини экспорт қилмаган 583 та корхона экспорт фаолиятига жалб этилди, шунингдек 95 турдаги янги маҳсулотни экспорт қилиш амалга оширилди.

Жорий йилнинг биринчи чорагида 8,4 мингта ёки 2015 йилнинг шу давридагидан 5,5 фоиз кўп янги кичик бизнес субъекти ташкил этилди. Йил бошидан буён кичик бизнес субъектларига 3,6 трлн сўмлик банк кредитлари берилиб, ўсиш 2015 йилнинг биринчи чорагидагига нисбатан 1,3 бараварни ташкил этди.

2016 йилда иш ўринлари ташкил этиш ва аҳоли бандлигини таъминлаш дастури доирасида 167,4 мингта янги иш ўрни яратилиб, бундан 57,7 фоизи қишлоқ жойларда ташкил этилди.

«Соғлом она ва бола йили» давлат дастурининг оила, оналик ҳамда болаликни муҳофаза қилиш тизимини янада мустаҳкамлашга, оналар ва болаларни тиббий парваришлаш даражаси ҳамда сифатини оширишга қаратилган тадбирларини амалга ошириш доирасида жорий йилнинг биринчи чорагида барча манбалар ҳисобидан салкам 1,3 трлн сўм миқдорида маблағ ажратилди.

Шуни ҳам таъкидлаш зарурки, ҳисобот даврида фойда олиш ҳажмлари нефть-газ, автомобиль, ҳаво йўллари ва кимё саноатининг айрим корхоналарида пасайганлиги кузатилди.

2016 йилнинг ўтган даврида 38 та корхона 141,8 млрд сўм миқдорида зарар кўрилишига йўл қўйди.

Мазкур ҳисобот сиёсий партиялар фракцияларида, Ўзбекистон экологик ҳаракати депутатлар гуруҳида, парламент қуйи палатаси қўмиталарида дастлабки тарзда муҳокама этилганлигини ҳисобга олиб Ўзбекистон Республикаси Олий Мажлисининг Қонунчилик палатаси қарор қилади :

1. Ўзбекистон Республикаси Давлат бюджетининг ва давлат мақсадли жамғармалари бюджетларининг 2016 йил биринчи чорагидаги ижроси тўғрисидаги ҳисобот тасдиқлансин.

Таъкидлаб ўтилсинки, 2016 йилнинг биринчи чорагида Ўзбекистон Республикаси Давлат бюджетининг даромадлари 8643,9 млрд сўмни, харажатлари эса 8614,7 млрд сўмни ташкил этди. Давлат бюджети 29,2 млрд сўм миқдорида ёки ялпи ички маҳсулотга нисбатан 0,1 фоиз миқдорида профицит билан ижро этилди.

2. Ўзбекистон Республикаси Вазирлар Маҳкамаси Ўзбекистон Республикаси Президенти Ислом Каримов томонидан Ўзбекистон Республикаси Вазирлар Маҳкамасининг 2015 йилда мамлакатни ижтимоий-иқтисодий ривожлантириш якунлари ва иқтисодий дастурнинг 2016 йилга мўлжалланган энг муҳим устувор йўналишларига бағишланган мажлисида белгилаб берилган 2016 йилги иқтисодий дастурнинг энг муҳим устуворликларини амалга ошириш учун мавжуд захиралар ва имкониятларни жалб этиш бўйича зарур чора-тадбирларни кўрсин.

3. Сиёсий партиялар фракцияларига, Ўзбекистон экологик ҳаракати депутатлар гуруҳига Ўзбекистон Республикаси Давлат бюджетининг ва давлат мақсадли жамғармалари бюджетларининг тегишли ҳисобот давридаги ижроси масалаларини кўриб чиқиш чоғида бюджет маблағларининг мақсадли ҳамда самарали фойдаланилишига доир аниқ таклифлар киритиш тавсия этилсин.

4. Ўзбекистон Республикаси Олий Мажлиси Қонунчилик палатасининг қўмиталари ўзларининг назорат-таҳлил фаолиятида, хусусан Ўзбекистон Республикаси Давлат бюджетининг ва давлат мақсадли жамғармалари бюджетларининг ижро этилиши билан боғлиқ масалаларни кўриб чиқиш чоғида қонун ҳужжатларини такомиллаштириш бўйича таклифлар ҳамда бюджет маблағларидан самарали фойдаланишга доир тавсиялар киритсин.

5. Ушбу қарор қабул қилинган кундан эътиборан кучга киради.