Автомобиллар тўхташ жойлари фаолиятини такомиллаштириш ва автотранспортни вақтинча сақлаш хизматлари кўрсатиш (тўхташ жойи) учун тўлов ундиришни тартибга солиш мақсадида Вазирлар Маҳкамаси қарор қилади:

1. Ўзбекистон Республикаси Давлат мулки қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг автотранспорт қисқа муддат сақланадиган мавжуд автомобиллар тўхташ жойларини хусусийлаштириш тўғрисидаги таклифлари қабул қилинсин.

Ўзбекистон Республикаси Давлат мулки қўмитаси Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда 2000 йил 1 январгача автотранспорт қисқа муддат сақланадиган барча мавжуд автомобиллар тўхташ жойлари тендер асосида хусусийлаштирилишини ва тушган маблағлар белгиланган тартибда тақсимланишини таъминласин.

2. Белгилансинки:

автомобиллар тўхташ жойидаги мол-мулк хусусийлаштириш объекти ҳисобланади, ер участкалари эса капитал қурилиш қилмасдан фойдаланиш муддатларини узайтириш ҳуқуқи билан 5 йилгача муддатга фойдаланишга берилади;

автотранспорт қисқа муддат сақланадиган автомобиллар тўхташ жойлари юридик шахс шаклида ташкил этилади ва ўз фаолиятини шаҳарлар ва туманлар ҳокимликларининг автомобиллар тўхташ жойларига автотранспортни вақтинча сақлаш хизматлари кўрсатиш (тўхташ жойи) ҳуқуқини бериш тўғрисидаги тақдимномасига кўра Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг қарорлари асосида амалга оширади. Кўрсатиб ўтилган қарорлар расмийлаштирганлиги учун энг кам ойлик иш ҳақининг 20 баравари миқдоригача бир марталик йиғим ундирилади.

3. Ўзбекистон Республикаси ҳудудида автотранспорт қисқа муддат сақланадиган автомобиллар тўхташ жойларини рўйхатдан ўтказиш ва уларнинг фаолияти тўғрисидаги Низом 1-иловага мувофиқ тасдиқлансин.

4. Белгилансинки, 1999 йил 1 октябрдан бошлаб автотранспорт қисқа муддат сақланадиган хусусийлаштирилган автомобиллар тўхташ жойлари асосий фаолияти бўйича маҳаллий бюджетга амалдаги солиқлар ва йиғимлар ўрнига Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланадиган ставка бўйича қатъий белгиланган солиқ тўлайдилар.

Автотранспорт қисқа муддат сақланадиган автомобиллар тўхташ жойлари учун қатъий белгиланган солиқ ставкаларининг чекланган миқдорлари 2-иловага мувофиқ тасдиқлансин.

5. Ўзбекистон Республикаси Молия вазирлиги ва Давлат солиқ қўмитаси автомобиллар тўхташ жойларида автотранспортни вақтинча сақлаш хизматлари кўрсатиш (тўхташ жойи) ҳуқуқи учун қатъий белгиланган солиқ ва бир марталик йиғим ундириш тартибини бир ой муддатда ишлаб чиқсинлар ва белгиланган тартибда тасдиқласинлар.

6. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари бир ой муддатда:

автомобиллар тўхташ жойлари эгаллаб турган майдондан ва улар жойлашган жойдан келиб чиққан ҳолда автомобиллар тўхташ жойлари учун қатъий белгиланган солиқнинг аниқ ставкаларини белгиласинлар;

автотранспортни автомобиллар тўхташ жойларида вақтинча сақлаш хизматлари кўрсатиш (тўхташ жойи) ҳуқуқи учун бир марталик йиғим миқдорини тасдиқласинлар;

автотранспорт қисқа муддат сақланадиган автомобиллар тўхташ жойлари юридик шахс сифатида белгиланган тартибда қайта рўйхатдан ўтказилишини таъминласинлар.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов зиммасига юклансин.

1.1. Мазкур Низом Ўзбекистон Республикаси ҳудудида автотранспорт қисқа муддат сақланадиган автомобиллар тўхташ жойларини рўйхатдан ўтказиш ва уларнинг фаолияти тартибини белгилайди.

1.2. Мазкур Низомда автотранспорт қисқа муддат сақланадиган автомобиллар тўхташ жойлари деганда автотранспортни сақлаш жойлари аниқ жисмоний ёки юридик шахсларга (автомототранспорт воситалари эгаларига) бириктирилмасдан аэропортлар, вокзаллар, бозорлар, йирик савдо комплекслари, маданий-оммавий муассасалар ва бошқа объектлар яқинида ташкил этилган автотранспорт вақтинча сақланадиган жойлар тушунилади.

1.3. Мазкур Низомда қуйидагилар автомобиллар тўхташ жойлари сифатида қаралмайди:

а) жамоат гаражлари — жойлардаги давлат ҳокимияти органларининг қарори ёки фармойиши билан ажратилган ерларда ташкил этиладиган, автотранспортни сақлаш жойлари ўз фаолиятини ширкатлар, кооперативлар ва бошқа ташкилий-ҳуқуқий шакллар кўринишида амалга оширадиган аниқ жисмоний шахсларга бириктирилган, фуқароларнинг транспорт воситаларини доимий сақлаш жойлари;

б) якка тартибдаги гаражлар — жойлардаги давлат ҳокимияти органларининг қарори ёки фармойиши билан транспорт воситалари эгаларига ажратилган ерларда, яшаш жойи яқинида уларнинг маблағлари ҳисобига қурилган фуқароларнинг транспорт воситаларини сақлаш иншоотлари;

в) одатда, йўллар яқинидаги бўш майдонларда ёки йўллар четида транспорт воситаларини қисқа муддат сақлаш мақсадида ташкил этиладиган вақтинча тўхташ жойлари, улар учун ер майдони махсус ажратилмайди, уларни ташкил этиш эса архитектура ва ДАН органлари билан келишган ҳолда жойлардаги давлат ҳокимияти органларининг қарорлари асосида амалга оширилади.

2.1. Автомобиллар тўхташ жойлари жойлардаги давлат ҳокимияти органлари томонидан юридик шахс сифатида рўйхатдан ўтказилади. Битта автомобиллар тўхташ жойи ҳудудий жиҳатдан алоҳида бўлган бир нечта майдонларни (автотранспортни сақлаш жойларини) таркибий бўлинмалар сифатида ўз таркибига киритиши мумкин.

Уларга автотранспортни вақтинча сақлаш хизматлари кўрсатиш (тўхташ жойи) ҳуқуқини бериш тўғрисидаги қарор жойлардаги давлат ҳокимияти органларининг автомобиллар тўхташ жойларини юридик шахс сифатида давлат рўйхатидан ўтказиш ва автомобиллар тўхташ жойларига ер участкаси ажратиш тўғрисидаги қарори мавжуд бўлган тақдирдагина шаҳарлар ва туманлар ҳокимликларининг тақдимномасига кўра Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан қабул қилинади.

2.2. Автомобиллар тўхташ жойларига автотранспортни вақтинча сақлаш хизматлари кўрсатиш (тўхташ жойи) ҳуқуқини бериш тўғрисидаги қарор расмийлаштирилганлиги учун энг кам ойлик иш ҳақининг 20 баравари миқдорида бир марталик йиғим ундирилади ва у маҳаллий бюджетга тушади.

Автотранспортни вақтинча сақлаш хизматлари кўрсатиш (тўхташ жойи) ҳуқуқи учун бир марталик йиғимнинг аниқ миқдорлари Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланади.

2.3. Мулкдор томонидан автомобиллар тўхташ жойининг ижарага берилишига Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан келишган ҳолда йўл қўйилади.

Мулкдор томонидан автомобиллар тўхташ жойи янги мулкдорга сотилганда мазкур Низомнинг 2.2-бандида кўрсатилган бир марталик йиғим ундирилган ҳолда автотранспортни вақтинча сақлаш хизматлари кўрсатиш (тўхташ жойи) ҳуқуқи қайтадан расмийлаштирилади.

3.1. Автомобиль тўхташ жойи: қаттиқ қопламага эга бўлиши, ўралган, ёритилган, ахлатларни йиғиш учун контейнерларга, ёнғинга қарши воситаларга, хизмат кўрсатувчи ходимлар учун биноларга, ёндош кўча ёки йўлларга чиқиладиган (кириш ва захира) дарвоза ёки шлагбаумга эга бўлиши керак.

4.1. Автотранспорт қисқа муддат сақланадиган автомобиллар тўхташ жойлари маҳаллий бюджетга амалдаги солиқлар ва йиғимлар ўрнига қатъий белгиланган солиқ тўлайдилар.

Автомобиллар тўхташ жойлари учун қатъий белгиланган солиқ ставкаларининг чекланган миқдорлари Ўзбекистон Республикаси Вазирлар Маҳкамаси томонидан тасдиқланади.

Автомобиллар тўхташ жойлари учун қатъий белгиланган солиқ ставкаларининг аниқ миқдорлари Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланади.

Қатъий белгиланган солиқлар автомобиллар тўхташ жойлари томонидан маҳаллий бюджетга ҳар чоракда, ҳисобот чорагидан кейинги ойнинг 15-кунигача тўланади.

Бюджетдан ташқари жамғармаларга бадаллар автомобиллар тўхташ жойлари томонидан умумий белгиланган тартибда тўланади.

4.2. 1.3-банднинг «а» кичик бандида кўрсатиб ўтилган жамоат гаражлари солиқ ва йиғимларни қонун ҳужжатларига мувофиқ тўлайдилар.

4.3. 1.3-банднинг «б» кичик бандида кўрсатиб ўтилган якка тартибдаги гаражларнинг автотранспорт воситалари эгалари гаражлари учун банд қилинган ер участкалари учун ер солиғи ва амалдаги қонун ҳужжатларига мувофиқ мулк солиғи тўлайдилар.

4.4. 1.3-банднинг «в» кичик бандида кўрсатиб ўтилган автотранспорт тўхташ жойидан фойдаланганлик учун автотранспорт эгаларидан автотранспорт тўхташ жойидан фойдаланганлик учун йиғим ундирилади, у Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланадиган тартибда тегишли маҳаллий бюджетлар даромадига ўтказилади.

Автотранспорт тўхташ жойидан фойдаланганлик учун йиғим ставкасининг чекланган миқдори Ўзбекистон Республикаси Вазирлар Маҳкамаси томонидан тасдиқланади.

Автотранспорт тўхташ жойидан фойдаланганлик учун йиғим ставкасининг аниқ миқдори Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланади.

5.1. Автомобиллар тўхташ жойларида автотранспортни сақлаганлик учун белгиланган намунадаги квитанция расмийлаштирилган, квитанция корешоги берилган ҳолда автомобиллар тўхташ жойлари томонидан белгиланадиган тарифлар бўйича ҳақ ундирилади.

5.2. Автотранспорт сақлаш учун мўлжалланган автомобиллар тўхташ жойларида автотранспорт эгаларига транспорт воситаларига техника хизмати кўрсатиш ва уларга қараб туриш билан боғлиқ, миқдори белгиланган тартибда тасдиқланадиган алоҳида ҳақ учун хизматлар кўрсатилиши мумкин.

Бундай хизматлар кўрсатишдан олинган даромадларга умумий белгиланган тартибда солиқ солинади.

5.3. Автомобиллар тўхташ жойлари томонидан автотранспортни сақлаш бўйича хизматлар кўрсатиш нақд пулга амалга оширилади. Кўрсатилган хизматлардан тушган тушум автомобиллар тўхташ жойлари томонидан (жамоат гаражлари бундан мустасно) ҳар куни белгиланган тартибда, гаражлар бўйича эса — хизматлар учун шартномада назарда тутилган ҳақ олинадиган муддатда инкассация қилинади.

6.1. Автомобиллар тўхташ жойлари санитария ва ёнғинга қарши қоидаларга риоя қилиниши учун, автотранспортнинг сақланиши (мол-мулкнинг муҳофаза қилиниши) учун, шу жумладан, автотранспортнинг автомобиль тўхташ жойида сақлаш пайтида ўғирланиши, қисмларининг ечиб олиниши ва шикастланиши ҳоллари учун жавоб беради.

6.2. Автомобиллар тўхташ жойлари ногиронлар учун махсус жиҳозланган камида икки жойни таъминлашлари шарт.

6.3. Автомобиллар тўхташ жойлари:

вақтинча сақлаш хизматлари кўрсатиш (тўхташ жойи) ҳуқуқи учун йиғимни ва қатъий белгиланган солиқни тўламаганлиги ёки ўз вақтида тўланмаганлиги;

автотранспорт сақланишини таъминламаганлиги;

автомобиллар тўхташ жойининг тегишлича санитария ва ёнғинга қарши ҳолатини, мазкур Низомнинг 3.1-бандида белгиланган бошқа талабларни таъминламаганлиги;

автомобиллар тўхташ жойларидан мақсадли фойдаланилмаганлиги учун автотранспортни вақтинча сақлаш хизматлари кўрсатиш (тўхташ жойи) ҳуқуқидан маҳрум этилиши мумкин.

6.4. Автотранспортни вақтинча сақлаш бўйича хизматлар кўрсатиш (тўхташ жойи) ҳуқуқи учун бюджетга солиқлар ва йиғимларни тўламаганлиги ва ўз вақтида тўланмаганлиги учун автомобиллар тўхташ жойлари қонун ҳужжатларига мувофиқ жавоб берадилар.

6.5. Автомобиллар тўхташ жойи:

табиий офатлар (зилзила, довул, сув тошқини ва бошқалар)да автотранспортга шикаст етказилганлиги учун;

автомобиль салонида турган ва унинг бутловчи қисмига кирмайдиган шахсий буюмларнинг сақланиши учун;

автомобиллар тўхташ жойи ҳудудидан чиққандан кейин у автотранспортнинг сақланиши бўйича даъво қилинган эътирозлар учун жавоб бермайди.