Ўзбекистон Республикаси Олий Мажлиси Қонунчилик палатаси Регламентининг 65 ва 244-моддаларига мувофиқ сиёсий партиялар фракциялари Кенгаш билан ҳамкорликда ҳар йили депутатларнинг сайлов округларида сайловчилар билан ишлаши учун мўлжалланган вақтни белгилайди. Қоида тариқасида, депутатларнинг сайлов округларида сайловчилар билан ишлаши учун март, июнь, сентябрь ойларининг сўнгги ўн кунлигида, шунингдек декабрь ойининг иккинчи ўн кунлигида ўн кунгача вақт ажратилади.

Сиёсий партиялар фракцияларининг Ўзбекистон Республикаси Олий Мажлиси Қонунчилик палатаси депутатларининг сайлов округларида сайловчилар билан 2016 йил сентябрь ойига белгиланган учрашувларини кечроқ муддатга ўтказиш мақсадга мувофиқлиги тўғрисидаги мурожаатларини эътиборга олиб, шунингдек Ўзбекистон Республикаси Президенти сайлови бўйича сайлов кампанияси бошланганлигини ва мамлакатимиздаги партияларнинг мазкур кампания муносабати билан ўтказилаётган муҳим сиёсий тадбирларини ҳисобга олган ҳолда, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатасидаги сиёсий партиялар фракцияларининг Ўзбекистон Республикаси Олий Мажлиси Қонунчилик палатаси депутатларининг сайлов округларида сайловчилар билан 2016 йилнинг сентябрь ойига белгиланган учрашувларини бошқа вақтга кўчириш тўғрисидаги таклифлари маълумот учун қабул қилинсин.

2. Ўзбекистон Республикаси Олий Мажлиси Қонунчилик палатаси депутатларининг сайлов округларида сайловчилар билан 2016 йилнинг сентябрь ойига белгиланган учрашувлари кечроқ муддатларга кўчирилсин.

3. Ўзбекистон Республикаси Олий Мажлиси Қонунчилик палатаси Спикерининг ўринбосари Х. Кетмонов Қорақалпоғистон Республикаси Вазирлар Кенгашини, вилоятлар ва Тошкент шаҳар ҳокимликларини қабул қилинган қарор тўғрисида хабардор қилсин.

4. Ушбу қарор қабул қилинган кундан эътиборан кучга киради.