Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Кенгашининг 2015 йил 27 ноябрдаги 318–III-сонли Қарори билан тасдиқланган «Ўзбекистон Республикаси Олий Мажлисининг Қонунчилик палатасида жисмоний ва юридик шахсларнинг мурожаатлари билан ишлаш тартиби тўғрисидаги низом»га (Ўзбекистон Республикаси Олий Мажлиси палаталарининг Ахборотномаси, 2015 йил, № 11, 444-модда) қуйидаги ўзгартишлар киритилсин.

1) 3-банднинг биринчи қисми ўзбекча матнидаги «Қонуннинг» деган сўз «Низомнинг» деган сўз билан алмаштирилсин;

2) 15-банд қуйидаги таҳрирда баён этилсин:

«15. Рўйхатдан ўтказилган мурожаатлар, 12-банднинг учинчи қисмида ва 13-банднинг тўртинчи қисмида белгиланган мурожаатлар бундан мустасно, келиб тушган пайтдан эътиборан бир иш кунидан кечиктирмай Сектор томонидан Қонунчилик палатаси Спикерига ёки унинг ўринбосарларига киритилиб, улар мурожаатни кўриб чиқиш юзасидан масъул қўмитага, унда тегишли жисмоний ёки юридик шахс мурожаат этган сайлов округи депутати аъзо эканлигидан келиб чиққан ҳолда, тақсимлаб кўрсатма (топшириқ) чиқаради ёхуд мурожаат этаётган жисмоний ёки юридик шахснинг сайлов округидан келиб чиққан ҳолда Қонунчилик палатаси депутатини бевосита кўрсатиб кўрсатма (топшириқ) чиқаради.

Мурожаатларни кўрсатма (топшириқ) чиқариш учун Қонунчилик палатаси Спикери ўринбосарларига киритиш чоғида Сектор томонидан мурожаат этаётган жисмоний ёки юридик шахснинг сайлов округидан сайланган Қонунчилик палатаси депутати аъзо бўлган қўмита Қонунчилик палатаси Спикерининг тегишли ўринбосари томонидан назорат қилиниши инобатга олиниши керак»;

3) 18-банднинг биринчи ва иккинчи қисмлари қуйидаги таҳрирда баён этилсин:

«18. Мавжуд масалаларни ҳал қилиш ўзининг ваколатига кирмайдиган Қонунчилик палатасига келиб тушган мурожаатлар, 12-банднинг учинчи қисмида ва 13-банднинг тўртинчи қисмида белгиланган мурожаатлар бундан мустасно, тегишли органларга мурожаатни кўриб чиқиш учун масъул қўмита раиси ёки қўмита раиси ўринбосари ёхуд депутат томонидан имзоланган хат билан алоқадорлиги бўйича беш кунлик муддатдан кечиктирмай юборилиб, бу ҳақда мурожаат этувчига ёзма ёхуд электрон шаклда хабар қилинади.

Мавжуд масалаларни ҳал этиш ўзининг ваколатига кирмайдиган қўмита ёки депутат номига йўлланган мурожаатлар тегишли органларга қўмита раиси ёки қўмита раиси ўринбосари ёхуд номига мурожаат келиб тушган депутат томонидан имзоланган хат билан алоқадорлиги бўйича беш кунлик муддатдан кечиктирмай юборилиб, бу ҳақда мурожаат этувчига ёзма ёхуд электрон шаклда хабар қилинади».

2. Умумий бўлим (М. Соипов) Ўзбекистон Республикаси Олий Мажлиси Қонунчилик палатаси депутатлари ҳамда Девони ходимларини ушбу қарор билан таништирсин.

3. Ушбу қарор қабул қилинган кундан эътиборан кучга киради.