Ўзбекистон Республикасининг «Ўзбекистон Республикасида маъмурий-ҳудудий тузилиш масалаларини ҳал этиш тартиби тўғрисида»ги Қонуни (Ўзбекистон Республикаси Олий Мажлисининг Ахборотномаси 1996 й., 9-сон, 139-модда, Ўзбекистон Республикаси қонун ҳужжатлари тўплами 2011 й., 41-сон, 449-модда) ва Ўзбекистон Республикаси Вазирлар Маҳкамасининг 2014 йил 4 мартдаги 48-сонли билан тасдиқланган «Шаҳарлар, посёлкалар, қишлоқлар ва овулларнинг маҳаллаларини тузиш, бирлаштириш, бўлиш ва тугатиш, шунингдек уларнинг чегараларини белгилаш ва ўзгартириш, уларга ном бериш ва уларнинг номини ўзгартириш тартиби тўғрисида»ги низом (Ўзбекистон Республикаси қонун ҳужжатлари тўплами, 2014 й., 10-сон, 107-модда) ижросини таъминлаш ҳамда Ғаллаорол тумани Маданият қишлоқ фуқаролар йиғини Кенгашининг 2016 йил 15 февралдаги 02/01-сонли баёнини, ҳудуддаги аҳоли пунктларида яшаётган аҳолининг талаб ва истакларини инобатга олиб, Ўзбекистон Республикасининг «Маҳаллий давлат ҳокимияти тўғрисида»ги Қонуни 6-моддасига мувофиқ халқ депутатлари туман Кенгаши қарор қилади:

1. Маданият қишлоқ фуқаролар йиғини таркибидан чиқарилиб — маркази Кўкгумбаз аҳоли пункти бўлган Кўкгумбаз маҳалла фуқаролар йиғини тузилсин.

Маданият қишлоқ фуқаролар йиғини маркази — Қанглиобод шаҳарчаси;

Кўкгумбаз маҳалла фуқаролар йиғини маркази — Кўкгумбаз аҳоли пункти ҳисоблансин.

2. Янги тузилаётган Кўкгумбаз маҳалла фуқаролар йиғини таркибига Кўкгумбаз, Заргар, Қоронғул ва Бахмалсой аҳоли пунктлари берилсин;

Маданият қишлоқ фуқаролар йиғини таркибида Маданият, Тутли, Қангли қишлоқлари ва Қанглиобод шаҳарчаси аҳоли пунктлари қолдирилсин.

3. Туман молия бўлими (М. Турдимуратов) Кўкгумбаз маҳалла фуқаролар йиғинини белгиланган тартибда штат бирликлари билан таъминлаш бўйича тегишли таклифлар ишлаб чиқсин.

4. Маданият қишлоқ ва Кўкгумбаз маҳалла фуқаролар йиғинлари:

манфаатдор ташкилотлар билан биргаликда аҳоли пунктлари тоифаларининг ўзгартирилиши билан боғлиқ ижтимоий, иқтисодий ва ҳуқуқий тадбирларнинг амалга оширилишини таъминласинлар;

маҳалла тоифасига киритилган аҳоли пунктлари номларини «Ўзбекистон Республикасида маъмурий-ҳудудий тузилиш масалаларини ҳал этиш тартиби тўғрисида»ги Қонун талабларига мувофиқлаштириш бўйича бир ой муддатда чора-тадбирлар белгиласинлар.

5. Туман статистика бўлими (О. Ўролов) ушбу қарорга мувофиқ аҳоли пунктларининг статистик кўрсаткичларига икки ҳафта муддатда зарур ўзгартиришлар киритсин.

6. Туман ҳокимлиги «Ягона дарча» марказига (И. Қаршибоев) янги ташкил этилаётган Кўкгумбаз маҳалла фуқаролар йиғинини белгиланган тартибда ҳисобга олиш ҳамда маҳалланинг муҳр ва штамп эскизларини тасдиқлаш вазифаси топширилсин.

7. Ушбу қарордан нусха географик объектларга ном бериш ва уларнинг номларини ўзгартириш масалалари бўйича вилоят комиссиясига маълумот учун юборилсин.

8. Мазкур қарорнинг ижросини назорат қилиш географик объектларга ном бериш ва уларнинг номларини ўзгартириш масалалари бўйича туман комиссияси зиммасига юклатилсин.

9. Ушбу қарорнинг расмий эълон қилинган кундан эътиборан кучга киради.