Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг 2007 йил биринчи ярим йиллиги якунлари бўйича ижроси тўғрисидаги ҳисоботни кўриб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат бюджетининг 2007 йил биринчи ярим йиллиги якунлари бўйича ижроси тўғрисидаги ҳисобот тасдиқлансин.

Таъкидлаб ўтилсинки, Давлат бюджети 2007 йил биринчи ярим йиллиги якунлари бўйича ялпи ички маҳсулотга нисбатан 1,9 фоиз миқдорида профицит билан ижро этилди.

2. Ўзбекистон Республикаси Вазирлар Маҳкамаси бозор ислоҳотлари ва иқтисодиётни эркинлаштириш жараёнлари янада чуқурлаштирилишини, солиқ тушумлари механизми такомиллаштирилишини, қатъий пул-кредит сиёсати ўтказилишини таъминласин, шунингдек аҳолини ижтимоий жиҳатдан муҳофаза қилиш ва қўллаб-қувватлашга, бюджет харажатларининг самарадорлиги оширилиши ва мақбуллаштирилишига, иш ҳақи, стипендиялар, нафақалар ҳамда аҳолига бошқа ижтимоий тўловлар тўлаш учун бюджет харажатларини тўлиқ ва ўз вақтида молиялаштиришга доир ишларни давом эттирсин.

3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг эътибори бюджет даромадлари кўрсаткичларининг сўзсиз бажарилиши зарурлигига, Давлат бюджетининг ғазна ижроси механизмини босқичма-босқич жорий этиш жадвалини таъминлашга, минтақаларнинг солиқ базасини ва молиявий салоҳиятини кенгайтириш юзасидан таъсирчан чоралар кўриш ҳамда шу асосда маҳаллий бюджетларнинг харажатларини тўлиқ молиялаштиришни таъминлашга қаратилсин.

4. Ушбу қарор қабул қилинган кундан эътиборан кучга киради.