Ўзбекистон Республикаси Олий Мажлисининг Қонунчилик палатаси томонидан қабул қилинган Ўзбекистон Республикасининг 2007 йилги Давлат бюджетини кўриб чиқиб, Ўзбекистон Республикаси Олий Мажлисининг Сенати қарор қилади:

1. Мамлакатни ривожлантиришнинг макроиқтисодий кўрсаткичларига ва солиқ-бюджет сиёсатининг асосий йўналишларига мувофиқ ишлаб чиқилган Ўзбекистон Республикасининг 2007 йилги Давлат бюджети унинг тақчиллигининг энг юқори даражаси ялпи ички маҳсулот ҳажмига нисбатан 1,0 фоиз миқдорида белгиланган ҳолда маъқуллансин.

2. Ўзбекистон Республикаси Ҳукумати:

бюджет ва солиқ ислоҳотларини янада чуқурлаштириш, иқтисодиётнинг устувор соҳаларини модернизациялаш жараёнларини кенгайтириш ва мамлакат минтақаларини янада ривожлантириш орқали макроиқтисодий ва молиявий барқарорликни, кутилаётган иқтисодий ўсиш суръатларини таъминласин, инфляция жараёнларининг қаттиқ ва самарали назорат қилинишини ташкил этсин;

хусусий сектор ва кичик бизнеснинг иқтисодиётни ривожлантиришдаги салмоғини сезиларли даражада оширишни, бизнес учун қулай муҳит яратишни, солиқ юкини камайтиришни, солиқ ҳамда молия бошқарувини янада такомиллаштириш юзасидан комплекс чора-тадбирларни изчил ва тизимли амалга оширишни давом эттирсин;

маҳсулот, иш ва хизматлар экспортининг рағбатлантирилишига, инвестициялардан, табиий, ер-сув ва моддий хом ашё ресурсларидан фойдаланишнинг самарадорлигини оширишга, иқтисодиётнинг устувор ва таянч тармоқларида, Қорақалпоғистон Республикаси, вилоятлар, шаҳар ва туманларда ишлаб чиқариш ҳажмларининг барқарорлигини ҳамда ўсишини қўллаб-қувватлашга қаратилган таркибий-инвестиция ва молиявий сиёсатни амалга оширсин;

барқарор иқтисодий ўсишни рағбатлантириш ва халқ фаровонлигини таъминлашга қарата қабул қилинган давлат дастурларини амалга оширишга алоҳида эътибор берган ҳолда бюджет маблағларининг таълимни, тиббий хизматлар кўрсатишни ва бошқа ижтимоий ҳамда бозор инфратузилмаларини ривожлантиришдаги, шу жумладан ҳудудларда бюджетдан ажратиладиган маблағларнинг қишлоқ аҳолисини ичимлик сув ва табиий газ билан таъминлашдаги ижтимоий йўналтирилганлигини янада кучайтирсин;

Давлат бюджетининг ғазна ижроси тизими жорий қилинишини ва такомиллаштирилишини, бюджет маблағларидан самарали ҳамда белгиланган мақсадларда фойдаланиш устидан қатъий назорат ўрнатишга, шунингдек бюджет маблағларини ҳар томонлама тежашга қаратилган таркибий ўзгаришларни амалга ошириш ишларини давом эттирсин;

Давлат бюджети тақчиллигини республика бюджетининг бўш, зарурий айланма-касса маблағлари ҳажмидан ортиқча қолдиқлари, шунингдек бошқа ноинфляциявий манбалар ҳисобидан молиялаштирсин.

3. Қорақалпоғистон Республикаси ва маҳаллий давлат ҳокимияти органлари бюджет даромадлари ва харажатларининг тасдиқланган кўрсаткичлари бажарилишини таъминласинлар, минтақаларнинг солиқ базасини кенгайтириш ва мақбуллаштириш, молиявий салоҳиятини ошириш юзасидан зарур чора-тадбирлар кўрсинлар, бюджет маблағларидан қонуний ва белгиланган мақсадда фойдаланилиши устидан самарали ва таъсирчан назорат ўрнатсинлар.