Ўзбекистон Республикаси Олий Мажлиси Сенати 2006 йил 25 февралда қабул қилган № 149-I-сонли Қарорнинг 3-бандини ҳамда Ўзбекистон Республикаси Президенти Ислом Каримовнинг 2005 йилда мамлакатни ижтимоий-иқтисодий ривожлантириш якунлари ва 2006 йилда иқтисодий ислоҳотларни чуқурлаштиришнинг энг муҳим устувор йўналишларига бағишланган Ўзбекистон Республикаси Вазирлар Маҳкамасининг 2006 йил 10 февралда бўлиб ўтган йиғилишидаги ва Ўзбекистон Республикаси Олий Мажлиси Сенатининг 2006 йил 24 февралда ўтказилган бешинчи ялпи мажлисидаги «Мамлакатимиз тараққиётининг қонуний асосларини мустаҳкамлаш – фаолиятимиз мезони бўлиши даркор» маърузаларининг асосий қоидаларини амалга оширишга қаратилган чора-тадбирларни бажаришга оид Ўзбекистон Республикаси Олий Мажлиси Сенатининг Ҳаракат дастури 8.5-бандини ижро этиш мақсадида, Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитасининг 2005 йил ва 2006 йилнинг биринчи ярмидаги фаолияти тўғрисидаги ҳисоботини тинглаб,

Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитасининг 2005 йил ва 2006 йилнинг биринчи ярмидаги фаолияти тўғрисидаги ҳисоботи маълумот учун қабул қилинсин.

2. Ўзбекистон Республикаси Президенти Ислом Каримовнинг 2005 йилда мамлакатни ижтимоий-иқтисодий ривожлантириш якунлари ва 2006 йилда иқтисодий ислоҳотларни чуқурлаштиришнинг энг муҳим устувор йўналишларига бағишланган Ўзбекистон Республикаси Вазирлар Маҳкамасининг 2006 йил 10 февралда бўлиб ўтган йиғилишидаги ҳамда Ўзбекистон Республикаси Олий Мажлиси Сенатининг 2006 йил 24 февралда ўтказилган бешинчи ялпи мажлисидаги «Мамлакатимиз тараққиётининг қонуний асосларини мустаҳкамлаш – фаолиятимиз мезони бўлиши даркор» маърузаларидан келиб чиқадиган вазифаларни бажариш Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси фаолиятининг устувор йўналишлари қилиб белгилансин.

Қўмитада мазкур вазифаларни амалга ошириш мақсадида:

мамлакатимизда, айниқса минтақаларда ижтимоий-иқтисодий соҳаларда амалга оширилаётган ўзгаришларнинг самарасини ошириш, шунингдек юртимиздаги мавжуд муаммолар, жумладан, ишсизлик муаммосини муҳокама қилишда фаолроқ ташаббус кўрсатилсин;

аграр сиёсат, экология ва табиатдан фойдаланиш соҳасида қонунчилик базаси такомиллаштирилсин, бунда фермерликни янада ривожлантиришга, қишлоқ хўжалигини модернизациялашни чуқурлаштириш ва кенгайтиришга, ушбу соҳага чет эл инвестицияларини бундан буён ҳам жалб этиш учун зарур шарт-шароитларни яратишга алоҳида эътибор берилсин;

назорат-таҳлил фаолиятининг самарадорлиги ва парламент назоратининг таъсирчанлиги оширилсин;

қонунлар, шунингдек Қўмита қабул қилган қарорларнинг ижросини мониторинг қилишни кучайтириб, давлат органлари ва бошқа идоралар раҳбарларининг Қўмита қарорлари бажарилиши учун жавобгарлигини ошириш масалаларига кўпроқ эътибор берилсин;

амалга ошириладиган тадбирларга пухта тайёргарлик кўрилсин, уларда иштирок этиш учун муҳокама қилинадиган масалалар юзасидан амалий таклифлар беришга қодир бўлган олим ва мутахассислар, шунингдек кенг жамоатчилик кенгроқ жалб этилсин;

ижтимоий-иқтисодий соҳада амалга оширилаётган ислоҳотларнинг энг муҳим натижаларини кенг жамоатчилик орасида янада чуқурроқ тушунтириш мақсадида Қўмита аъзоларининг, айниқса жойларда ишлаётган сенаторларнинг фаолияти кучайтирилсин;

парламент қуйи палатасининг тегишли қўмитаси билан муносабатлари такомиллаштирилсин, ўзаро ҳамкорлиги кучайтирилсин.

3. Ушбу қарорнинг ижросини назорат қилиш Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси раиси Ғ.Қ. Алиев зиммасига юклатилсин.