Ўзбекистон Республикаси Олий Мажлиси Қонунчилик палатасининг Ўзбекистон Республикаси Президенти И.А. Каримовнинг Олий Мажлис Сенатининг бешинчи ялпи мажлисидаги ҳамда Вазирлар Маҳкамасининг 2005 йилда ижтимоий-иқтисодий ривожлантириш якунлари ва 2006 йилда иқтисодий ислоҳотларни чуқурлаштиришнинг энг муҳим устувор йўналишларига бағишланган мажлисидаги маърузаларидан келиб чиқадиган вазифалари тўғрисидаги масалани муҳокама этиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Президенти И.А. Каримовнинг Олий Мажлис Сенатининг бешинчи ялпи мажлисидаги ва 2006 йил 10 февралда Ўзбекистон Республикаси Вазирлар Маҳкамасининг мажлисидаги маърузаларида баён этилган қоидалар ва хулосалар қўллаб-қувватлансин.

2. Таъкидлансинки, Олий Мажлис Қонунчилик палатасининг фаолияти жамиятни демократик янгилашнинг, бозор ислоҳотларини чуқурлаштириш ва мамлакат иқтисодиётини эркинлаштиришнинг ҳуқуқий асосларини яратиш борасидаги вазифаларга ҳали етарли даражада мос эмас. Қўмиталар ва сиёсий партиялар фракциялари қонун лойиҳаларини тайёрлаш, мамлакатнинг жамият ва давлат ҳаётига доир долзарб масалалари Қонунчилик палатаси томонидан кўриб чиқилишида етарлича ташаббус кўрсатмаяптилар. Халқ депутатлари маҳаллий Кенгашлари ва сайловчилар билан алоқалар лозим даражада йўлга қўйилмаган, Ўзбекистон Республикаси Олий Мажлиси Сенати билан қонун ижодкорлиги ва назорат-таҳлил фаолияти борасидаги ишларни мувофиқлаштириш янада такомиллаштиришни талаб этади.

3. Ўзбекистон Республикаси Олий Мажлиси Қонунчилик палатасининг 2006 йилга мўлжалланган фаолиятининг асосий йўналишлари ҳамда Ўзбекистон Республикаси Олий Мажлиси Қонунчилик палатасининг мамлакатни ислоҳ этиш ва модернизация қилишнинг устувор йўналишлари, мақсадли вазифалари ҳисобга олинган ҳолда 2005 йилга ва келгуси йилларга мўлжалланган қонунчилик фаолияти дастурини қайта кўриб чиқиш мақсадга мувофиқ деб ҳисоблансин. Мазкур масала бўйича таклифлар тайёрлаш Ўзбекистон Республикаси Олий Мажлиси Қонунчилик палатасининг қўмиталарига топширилсин ва сиёсий партиялар фракцияларига тавсия этилсин. Ўзбекистон Республикаси Олий Мажлиси Қонунчилик палатасининг Кенгаши ушбу таклифларни умумлаштирсин ва ҳужжатларнинг маромига етказилган лойиҳаларини Ўзбекистон Республикаси Олий Мажлисининг Қонунчилик палатаси муҳокамасига киритсин.

4. Ўзбекистон Республикаси Олий Мажлиси Қонунчилик палатасининг қўмиталари қонун ижодкорлиги ва назорат-таҳлил фаолияти самарадорлигини оширсинлар, шунингдек фуқароларнинг ҳуқуқий маданиятини юксалтириш, қабул қилинган қонунларни тушунтириш ва ижро этиш юзасидан чора-тадбирлар кўрсинлар.

5. Сиёсий партиялар фракцияларига жамият ва давлат ҳаётининг долзарб масалаларини тайёрлаш ҳамда палата муҳокамасига киритиш борасида фаолликни ошириш тавсия этилсин.

6. Ўзбекистон Республикаси Олий Мажлисининг Қонунчилик палатаси раҳбарияти Қонунчилик палатасининг Сенат билан ҳамкорликда самарали ҳаракат қилиш механизмини яхшилаш, тегишли қўмиталар ва тузилмаларнинг ўзаро муносабатларини такомиллаштириш юзасидан чора-тадбирлар кўрсин.

7. Мазкур қарорнинг ижроси устидан назорат олиб бориш Ўзбекистон Республикаси Олий Мажлиси Қонунчилик палатаси Спикерининг ўринбосарлари А.А. Каримов ва М.Б. Сафаева зиммасига юклатилсин.