Тадбиркорлар ва ишбилармонлар ҳаракати – Ўзбекистон Либерал-демократик партияси фракциясининг ташаббусига кўра Ўзбекистон алоқа ва ахборотлаштириш агентлиги Бош директори Ҳ. Муҳитдиновнинг «Ўзбекистонда дастурий таъминот индустриясини ривожлантиришни давлат томонидан қўллаб-қувватлаш чора-тадбирлари тўғрисида»ги ахборотини эшитиб, Ўзбекистон Республикаси Олий Мажлисининг Қонунчилик палатаси таъкидлайдики, Ўзбекистон Республикаси Президенти И. Каримов илгари сурган Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепциясига мувофиқ, дастурий таъминот индустриясининг ривожлантирилишини давлат томонидан қўллаб-қувватлаш чора-тадбирлари амалга оширилиши натижасида ахборот-коммуникация технологиялари соҳаси мамлакатимиз иқтисодий салоҳиятини оширишда барқарор ўсиш суръатларини намойиш этмоқда. Ахборот соҳаси корхоналарининг ишлаб чиқариш қувватлари ошмоқда, жамият ҳаётининг турли соҳаларига энг янги ахборот тизимлари ва технологиялари жорий этилмоқда, ахборот ресурслари бозори ва дастурий маҳсулотлар ишлаб чиқариш ривожланмоқда.

Шу билан бирга мазкур соҳани ривожлантириш бўйича фойдаланилмаган ресурслар мавжуд. Интеллектуал имкониятлар ва кадрлар имкониятлари мавжуд бўлган бир пайтда бир қанча муаммоларнинг ечилмаганлиги, соҳа фаолияти етарли даражада аниқ тартибга солинмаганлиги уни янада ривожлантиришга ҳалақит қилмоқда.

Буларнинг барчаси дастурий таъминот индустрияси, унинг экспорт салоҳиятини ривожлантиришни давлат томонидан қўллаб-қувватлашнинг, миллий дастурий маҳсулотлар ишлаб чиқарувчиларга қўшимча шароитлар яратишнинг мақсадли дастури ишлаб чиқилиши ва рўёбга чиқарилишини, дастурлаш соҳаси учун мутахассислар тайёрлаш бўйича комплекс чора-тадбирлар амалга оширилишини, шунингдек ахборот соҳасига доир қонун ҳужжатлари такомиллаштирилишини талаб қилади.

Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон алоқа ва ахборотлаштириш агентлиги Бош директори Ҳ. Муҳитдиновнинг «Ўзбекистонда дастурий таъминот индустриясини ривожлантиришни давлат томонидан қўллаб-қувватлаш чора-тадбирлари тўғрисида»ги ахбороти маълумот учун қабул қилинсин.

2. Ўзбекистон Республикаси Вазирлар Маҳкамаси:

дастурий таъминот ишлаб чиқариш индустриясини қўллаб-қувватлаш бўйича комплекс чора-тадбирларнинг ишлаб чиқилиши ва қабул қилинишини жадаллаштирсин;

саъй-ҳаракатларини миллий дастурий маҳсулотлар ишлаб чиқарувчиларни қўллаб-қувватлашга йўналтирсин;

дастурий маҳсулотлар экспортини рағбатлантириш, шунингдек уларнинг рақобатбардошлилигини ошириш бўйича чора-тадбирларни амалга оширсин;

дастурчилар тайёрлаш тизими кенгайтирилиши ва унинг сифати оширилишини таъминласин.

3. Ўзбекистон алоқа ва ахборотлаштириш агентлиги эркин ва очиқ кодли дастурий таъминотдан фойдаланишни ривожлантириш ва мамлакатимизда ишлаб чиқарилган дастурий маҳсулотларнинг ҳамда дастурий таъминотни ишлаб чиқувчи компанияларнинг йиғма электрон каталогини яратиш юзасидан чора-тадбирларни амалга оширсин.

4. Ўзбекистон Республикаси Олий Мажлиси Қонунчилик палатасининг Ахборот ва коммуникация технологиялари масалалари қўмитаси тегишли қонунларга дастурий таъминот индустриясини янада ривожлантиришга кўмаклашадиган ўзгартиш ва қўшимчалар киритиш бўйича таклифларни ишлаб чиқиш мақсадида қонун ҳужжатлари таҳлилини амалга оширсин.

5. Ушбу қарор қабул қилинган кундан эътиборан кучга киради.