Ўзбекистон Республикаси Олий Мажлисининг Қонунчилик палатаси Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг ва давлат мақсадли жамғармалари бюджетларининг 2015 йил биринчи ярим йиллигидаги ижроси тўғрисидаги ҳисоботни Ўзбекистон Республикаси Бюджет кодексининг 169-моддасига ва «Ўзбекистон Республикаси Олий Мажлиси Қонунчилик палатаси Регламенти»нинг 211-моддасига мувофиқ кўриб чиқди.

Таъкидландики, Ўзбекистон Республикаси Президенти И. Каримов томонидан белгилаб берилган 2015 йилги иқтисодий дастурнинг энг муҳим вазифалари ва устуворликларини муваффақиятли амалга ошириш жорий йилнинг биринчи ярмида иқтисодий ўсишнинг юксак суръатларини ва макроиқтисодий барқарорликни сақлаб қолиш имконини берди, бу ялпи ички маҳсулотнинг 8,1 фоизга ўсишини таъминлади.

Ўзбекистон Республикаси Вазирлар Маҳкамаси томонидан қабул қилинган таркибий ўзгартиришларни амалга ошириш ва иқтисодиётни диверсификация қилишга, ишлаб чиқаришни модернизация қилиш ва янгилашга, юқори технологик қувватларнинг ишга туширилишини жадаллаштиришга, кичик бизнес, хусусий тадбиркорлик ва хизматлар кўрсатиш соҳасини ривожлантиришга қаратилган чора-тадбирлар аҳолининг бандлиги ва даромадлари ўсишига кўмаклашди.

Аниқ мақсадга қаратилган пул-кредит ва солиқ-бюджет сиёсатини амалга ошириш Давлат бюджети даромад қисмининг 17054,8 млрд сўм этиб бажарилишини таъминлади, харажатлар қисми эса 16934,9 млрд сўмни ташкил этди.

Давлат бюджети ялпи ички маҳсулотга нисбатан 0,2 фоиз миқдорида профицит билан ижро этилди.

Бюджет сиёсатининг ижтимоий йўналтирилганлиги сақлаб қолинди.

Сиёсий партиялар фракциялари, Экологик ҳаракат депутатлар гуруҳи, шунингдек қўмиталар ўз нуқтаи назарларини билдирилдилар ва Ўзбекистон Республикаси Давлат бюджетининг ҳамда давлат мақсадли жамғармалари бюджетларининг 2015 йил биринчи ярим йиллигидаги ижроси тўғрисидаги ҳисоботни тасдиқлашни таклиф этдилар.

Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат бюджетининг ва давлат мақсадли жамғармалари бюджетларининг 2015 йил биринчи ярим йиллигидаги ижроси тўғрисидаги ҳисобот тасдиқлансин.

2. Ўзбекистон Республикаси Вазирлар Маҳкамаси Давлат бюджетининг 2015 йил учун тасдиқланган кўрсаткичлари бажарилишини таъминлаган ҳолда ижтимоий соҳа ва аҳолини ижтимоий қўллаб-қувватлаш учун харажатларни ўз вақтида молиялаштиришга, «Кексаларни эъзозлаш йили» Давлат дастурининг амалга оширилишини таъминлашга, шунингдек 2015 йилда иш ўринлари ташкил этиш ва аҳоли бандлигини таъминлаш дастурини бажаришга алоҳида эътибор қаратсин.

3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг эътибори иқтисодий ўсиш суръатларининг барқарорлигини таъминлашга ҳамда шу асосда тегишли бюджетларга солиқлар ва бошқа мажбурий тўловларнинг тўлиқ тушишига эришилишига, минтақаларнинг молиявий салоҳиятидан юқори даражада фойдаланиш бўйича амалий чора-тадбирлар кўрилишига, бюджет маблағларидан Ўзбекистон Республикаси Бюджет кодексининг қоидаларига мувофиқ мақсадли ва самарали фойдаланилиши ҳамда бюджет интизомига риоя этилиши устидан назоратни кучайтиришга қаратилсин.

4. Ўзбекистон Республикаси Олий Мажлиси Қонунчилик палатасининг қўмиталари назорат-таҳлил фаолиятини амалга ошириш чоғида Давлат бюджети ва давлат мақсадли жамғармалари бюджетларини тўғри ҳамда самарали ижро этилиши масалаларига ҳам алоҳида эътибор қаратсин, бюджет тўғрисидаги қонун ҳужжатларини янада такомиллаштириш бўйича таклифлар киритсин.

5. Сиёсий партиялар фракцияларига, Ўзбекистон экологик ҳаракати депутатлар гуруҳига Ўзбекистон Республикаси Давлат бюджети ва давлат мақсадли жамғармалари бюджетларининг тегишли ҳисобот давридаги ижроси масалаларини кўриб чиқиш чоғида Ўзбекистон Республикаси Давлат бюджети ва давлат мақсадли жамғармаларининг ижроси устидан парламент назоратини такомиллаштириш бўйича аниқ таклифлар киритиш тавсия этилсин.

6. Ушбу қарор қабул қилинган кундан эътиборан кучга киради.