Ўзбекистон Республикаси Президенти И. Каримовнинг 2015 йил 22 январда Олий Мажлис Сенатининг биринчи мажлисида сўзлаган нутқида ҳамда 2015 йил 23 январда Олий Мажлис Қонунчилик палатаси ва Сенатининг қўшма мажлисидаги, шунингдек 2015 йил 16 январда Вазирлар Маҳкамасининг 2014 йилда мамлакатни ижтимоий-иқтисодий ривожлантириш якунларига ва 2015 йилги иқтисодий дастурнинг энг муҳим устувор вазифаларига бағишланган мажлисидаги маърузаларида белгилаб берилган вазифаларни бажариш мақсадида ишлаб чиқилган ва тасдиқланган Ўзбекистон Республикаси Олий Мажлиси Сенатининг 2015 йилга ва келгуси йилларга мўлжалланган Ҳаракат дастури (бундан буён матнда Ҳаракат дастури деб юритилади) тегишли бандларининг ижросини таъминлаш учун Сенат Кенгаши, қўмиталари, Сенатнинг маҳаллий ҳокимият вакиллик органлари фаолиятини кучайтиришга кўмаклашувчи комиссияси ҳамда Сенат Девони томонидан муайян ишлар амалга оширилди.

Хусусан, Ҳаракат дастурининг бажарилиш муддатлари 2015 йил деб белгиланган 1.1, 2.1, 3.1, 3.3, 3.4, 4.1-бандлари ижросини таъминлаш мақсадида «Ўзбекистон Республикаси Олий Мажлиси Сенатининг қўмиталари томонидан Ўзбекистон Республикаси Олий Мажлиси Қонунчилик палатаси қабул қилган ва Ўзбекистон Республикаси Олий Мажлиси Сенатига маъқуллаш учун келиб тушган қонунларни дастлабки тарзда кўриб чиқиш тартиби тўғрисида»ги низомга ўзгартиш ва қўшимчалар киритилди. Бунда қабул қилинган қонунлар минтақалардаги ижтимоий-сиёсий, иқтисодий жараёнларга қандай таъсир кўрсатаётганлиги ҳақидаги ахборотни жойлардан олинишини таъминлайдиган ўзаро алоқанинг ташкилий-ҳуқуқий механизмлари халқ депутатлари маҳаллий Кенгашлари билан яқин ҳамкорликда яратилишига эришилди. Шунингдек, Низомга қонунлар умумдавлат ва минтақалар манфаатларининг мутаносиблигини, бир-бирига зид келмаслигини ва тизимлилигини таъминлаш, қонунларни уларда амалга ошириш механизмлари мавжудлиги нуқтаи назаридан кўриб чиқилиши мажбурийлигини белгиловчи ўзгартиш ва қўшимчалар киритилди. Қонунларни кўриб чиқиш жараёнига етакчи мутахассислар, олимлар, амалиётчилар, фуқаролик жамияти институтларининг вакилларини кенг жалб этиш механизмлари жорий қилинди. Хусусан, Ҳаракат дастурининг 3.3-бандига мувофиқ қонунларнинг тизимли, доимий асосда муҳокама этилишини ташкил қилиш, уларни рўёбга чиқариш юзасидан назорат-таҳлил ишларини тайёрлаш ва ўтказиш мақсадида Сенат қўмиталари ҳузурида етакчи мутахассислар, олимлар, амалиётчилар, фуқаролик жамияти институтларининг вакилларидан иборат таркибдаги эксперт гуруҳлари тузилди.

Қонун ижодкорлигида қиёсий таҳлил услубларидан фойдаланиш борасидаги демократик давлатлар парламентларининг қонун ижодкорлиги фаолияти тажрибасини ўрганиш Сенатнинг асосий устувор вазифаларидан бири сифатида қаралмоқда. Ушбу вазифани тўлиқ рўёбга чиқариш мақсадида Ҳаракат дастурининг 4.2-бандига мувофиқ бу борадаги ишларнинг сифати ва самарадорлигини оширишга қаратилган тадбирлар дастури ишлаб чиқилди.

Ҳаракат дастурининг 6.2-банди ижросини таъминлаш мақсадида Олий Мажлис Қонунчилик палатаси ва Сенати Кенгашларининг 2015 йил 26 майдаги Қўшма Қарори билан Ўзбекистон Республикаси Олий Мажлиси палаталарининг ўзаро ҳамкорлигини ташкил этиш бўйича Мувофиқлаштирувчи кенгаш таркиби тасдиқланди. Олий Мажлис палаталари ўртасидаги ўзаро ҳамкорлик самарадорлигини янада ошириш учун «Ўзбекистон Республикаси Олий Мажлиси палаталарининг ўзаро ҳамкорлигини ташкил этиш бўйича мувофиқлаштирувчи кенгаш тўғрисида»ги низом қабул қилинди.

Сенат қўмиталарининг халқ депутатлари маҳаллий Кенгашлари доимий комиссиялари билан ўзаро ҳамкорлигининг аниқ механизмларини, янги ижтимоий-сиёсий шароитларда халқ депутатлари маҳаллий Кенгашлари фаолиятининг самарадорлигини ошириш мақсадида Ҳаракат дастурининг 7.1-бандига мувофиқ Халқ депутатлари вилоят, туман, шаҳар Кенгашининг намунавий регламентига ўзгартиш ва қўшимчалар киритилди.

Мамлакатимиз хавфсизлигини таъминлаш, ташқи сиёсатини шакллантириш ва рўёбга чиқариш соҳасида Сенат ўз конституциявий ваколатларини амалга оширишга эътиборни кучайтириб, Ҳаракат дастурининг 8.1-бандини бажариш мақсадида алоҳида чора-тадбирлар мажмуини ишлаб чиқди ва тасдиқлади.

Умуман олганда, Ҳаракат дастурининг 2015 йилнинг биринчи ярмига мўлжалланган бандлари Сенат Кенгаши, Сенат қўмиталари ва комиссияси ҳамда Сенат Девони томонидан самарали ва сифатли амалга ошириб келинмоқда.

Ҳаракат дастурида бажарилиш муддатлари 2015 йил деб белгиланган тадбирлар ижроси тизимли ва изчил кечаётганини эътиборга олган ҳолда Сенат қўмиталари ва комиссияси ҳамда Сенат Девонининг бу борадаги саъй-ҳаракатларини янада кучайтириш, амалга оширилаётган чора-тадбирлар самарадорлигини ошириш мақсадида Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенати Раисининг ўринбосари С. Артикованинг Ҳаракат дастурида белгиланган тадбирларнинг 2015 йил биринчи ярмидаги ижроси тўғрисидаги ахбороти маълумот учун қабул қилинсин.

2.Сенат қўмиталари ва комиссияси:

Ҳаракат дастурининг ижроси кейинги даврга мўлжалланган бандлари ҳамда Ҳаракат дастурига мувофиқ қабул қилинган қарорлар ва бошқа чора-тадбирлар самарали, сифатли ва ўз вақтида амалга оширилишига алоҳида эътибор қаратсин;

Сенат қўмиталари ҳузурида ташкил этилган эксперт гуруҳлари аъзоларини жалб этган ҳолда Сенатда кўриб чиқилаётган қонунлар юзасидан жойларда фаолият кўрсатувчи сенаторлар ва халқ депутатлари маҳаллий Кенгашларидан келиб тушган таклифларни кўриб чиқишга доир ишларини, шунингдек назорат-таҳлил фаолиятини кучайтирсин.

3. Ҳаракат дастури 6.5-бандининг ижроси сифатида Ўзбекистон Республикаси Олий Мажлиси палаталари ахборот хизматларининг 2015 йилга мўлжалланган ҳамкорликдаги иш режаси ишлаб чиқилгани маълумот учун қабул қилинсин. Сенат Матбуот хизмати ушбу режани амалга ошириш асносида кенг жамоатчиликни қабул қилинаётган қонунларнинг мазмун-моҳияти, назорат-таҳлил ишлари ва бошқа фаолият натижаларидан мунтазам хабардор қилиб борсин, бунда қонун ҳужжатларининг меъёрлари нотўғри талқин қилиниши каби ҳолатларга йўл қўймасликка алоҳида эътибор қаратсин.

4. Ушбу қарор Ўзбекистон Республикаси Олий Мажлиси Сенатининг навбатдаги ялпи мажлиси тасдиғига киритилсин.

5. Ушбу қарорнинг ижросини назорат қилиш Ўзбекистон Республикаси Олий Мажлиси Сенати Раисининг ўринбосари С. Артикова зиммасига юклатилсин.