Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Президентининг 2013 йил 15 июлда қабул қилинган «Қонунларнинг ҳавола қилувчи нормаларини татбиқ этишга қаратилган норматив-ҳуқуқий ва бошқа ҳужжатларни ишлаб чиқиш режаларини тасдиқлаш тўғрисида»ги ПҚ–2003-сонли Қарорида:

қуйидаги соҳаларда: давлат ва жамият қурилиши соҳасида; суд-ҳуқуқ соҳасида; иқтисодий ривожлантириш соҳасида; ижтимоий ва гуманитар ривожлантириш соҳасида қонунларнинг ҳавола қилувчи нормаларини татбиқ этишга қаратилган норматив-ҳуқуқий ва бошқа ҳужжатларни ишлаб чиқиш;

тегишли норматив-ҳуқуқий ҳужжатлар лойиҳаларини Ўзбекистон Республикаси Олий Мажлисининг Қонунчилик палатасига юбориш назарда тутилганлиги маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг қуйидаги қўмиталари ушбу Қарор бажарилишининг боришини мувофиқлаштириш учун масъул этиб белгилансин:

2-илованинг 5-банди учун – Мудофаа ва хавфсизлик масалалари қўмитаси;

3-илованинг 8-банди учун – Бюджет ва иқтисодий ислоҳотлар қўмитаси;

4-илованинг 14-банди учун – Меҳнат ва ижтимоий масалалар қўмитаси;

4-илованинг 29-банди учун – Меҳнат ва ижтимоий масалалар қўмитаси Қонунчилик ва суд-ҳуқуқ масалалари қўмитаси билан биргаликда.

3. Ўзбекистон Республикаси Олий Мажлиси Қонунчилик палатаси қўмиталари:

Ўзбекистон Республикаси Олий Мажлисининг Қонунчилик палатасига келиб тушаётган қонун лойиҳаларини дастлабки тарзда кўриб чиқиш давомида ҳавола қилувчи нормаларни қисқартириш имкониятини аниқлаш ҳамда қонун лойиҳалари матнларини тегишли нормалар билан тўлдириш мақсадида ҳавола қилувчи нормаларнинг маромига етказилишини таъминласин;

назорат-таҳлил тадбирларини ўтказиш чоғида ҳавола қилувчи нормаларнинг ҳуқуқни қўллаш амалиётида қўлланилиши билан боғлиқ масалаларни ўрганишга алоҳида эътибор қаратсин;

қонун лойиҳалари устида иш олиб бориш амалиётига қонун ҳужжатларининг ҳолатини ўрганишга, қонун лойиҳасини тартибга солиш предмети бўйича уни амалиётда қўллашга қаратилган назорат-таҳлил тадбирларини ўтказишни жорий этсин.

4. Ушбу қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.

5. Мазкур қарор қабул қилинган кундан эътиборан кучга киради.