Ўзбекистон Республикаси Марказий банкининг 5000 (беш минг) сўмлик банкнотлар чиқариш тўғрисидаги таклифини кўриб чиқиб ҳамда «Ўзбекистон Республикасининг Марказий банки тўғрисида»ги Ўзбекистон Республикаси Қонунининг 33-моддасига мувофиқ, Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Марказий банки томонидан тақдим этилган 5000 (беш минг) сўмлик банкнотнинг намунаси ҳамда дизайни маъқуллансин.

2. Ўзбекистон Республикаси Марказий банки 5000 (беш минг) сўмлик банкнотларнинг муомалага чиқарилиши тўғрисидаги ахборотни, шунингдек банкнот тавсифини оммавий ахборот воситаларида эълон қилсин.

5000 сўм қийматдаги банкнотнинг босма лойиҳаси таркибида кўк ва оч яшил рангдаги кўринмас толаларнинг тартибсиз сингдирилиши орқали ҳимояланган қоғозда тайёрланган бўлиб, ультрабинафша нур берилганда кўринади. Банкнот ўлчами 144 х 78 мм.

Банкнотнинг ўнг томонидаги кенг оқ рангли сатҳда Ўзбекистон Республикаси Герби ва 5000 баҳонинг рақамли ишораси кўринишидаги локал сув белгиси мавжуд.

Оқ рангли сатҳнинг чап тарафидан қоғоз қатламида эни 2 мм бўлган, банкнот юзасида йўл-йўл тасма кўринишини ҳосил қилувчи, юзага чиқиб, ичкарига ботувчи, маҳкамланган кумушсимон ип ўтказилган бўлиб, ёруғлик берилганда худди яхлит ҳимоя ипидек кўринади.

Олд ва орқа томонларида оч яшил, кўк ва жигар ранглар устунликни ташкил қилади.

Банкнот олд томонининг юқори қисмида қора тасма фонида оч тусдаги «OʼZBEKISTON RESPUBLIKASI MARKAZIY BANKI» матни мавжуд. Гильоширланган безак марказида кўк рангда ишланган Ўзбекистон Республикаси Герби жойлашган. Рангли остки фонда банкнотнинг ўнг тарафидан ва пастки қисми бўйлаб жигар рангдаги, ўз композицияси бўйича яхлит бир бутунликни ташкил этувчи нақшинкор расмлар жойлаштирилган.

Купюранинг остки фони ва Герб атрофини ҳошиялаган гильоширланган безаклар ранги ўз рангини бир рангдан бошқасига (оч яшил рангдан сарғиш рангга) оҳиста ўзгартиради, яъни «ирисли силлиқлик» усулида бажарилган.

Нақшинкор рамканинг пастки қисмида қорамтир жигар ранг фонда «OʼZBEKISTON SOʼMI RESPUBLIKA НUDUDIDA НAMMA TOʼLOVLAR UCНUN OʼZ QIYMATI BOʼYICНA QABUL QILINISНI SНART» матни жойлашган.

Банкнотнинг жигар ранг нақшинкор рамкаси, «OʼZBEKISTON RESPUBLIKASI MARKAZIY BANKI» ёзуви, Герб, ўнг ва чап томонлардаги 5000 рақамлари, шунингдек банкнот оқ рангли сатҳининг юқори қисмида жойлашган нақш металлографик босма усулида бажарилган бўлиб, бармоқ учлари билан ушлаб кўрилганида, бўёқнинг бўртиб турганлиги сезилади.

Нақшинкор рамканинг чап қисмида банкнот ёруғлик манбаига нисбатан муайян қиялик бурчагида қаралганда кўринадиган «UZB» қисқартма сўз шаклидаги «латент» (яширин) тасвир туширилган.

Махсус белги – банкнотнинг юқори чап бурчагида жойлашган бўлиб, тасвирнинг бир қисми олд томонда, бошқа қисми орқа томонда тушилган, бир-бирига тўлалигича мос тушади. Ёруғликда бу қисмлар биргаликда умумий нақшли тасвирни ҳосил қилиб, бир-бирининг устига тўлиқ мос тушиши лозим.

Банкнотнинг ўнг томони, яъни кенг оқ рангли сатҳ марказида Ўзбекистон Республикаси Герби ва 5000 рақами тасвиридаги локал сув белгиси мавжуд бўлиб, ёруғликда яққол кўринади.

Оқ рангли сатҳнинг юқори қисмида рангли бўёқда ишланган банкнот чиқарилган йил жойлашган бўлиб, унинг тагида рангини ўзгартирувчи (OVI) бўёқда ишланган тилла-бронза рангли ва кўриш бурчаги ҳолатига қараб рангини ўзгартирувчи нақш мавжуд.

Банкнотнинг лотин алифбосидаги икки ҳарфли серияси ва еттита рақамдан иборат номери қора рангда икки жойда босилган бўлиб, пастки ўнг қисмидаги ферромагнит хусусиятга, чап тарафдаги рангли майдон бўйича люминесценцияланиш хусусиятига эга.

Ультрабинафша нурлари таъсир эттирилганда банкнотнинг олд томонида қоғозда тартибсиз жойлаштирилган яшил ва кўк рангли туксимон кўринишдаги толалар, Ўзбекистон Республикаси Гербидан ўнг томондаги «5000» рақамидан иборат кўринмас тасвир ва гильоширланган безаклар кўринади.

Банкнот чап томонида локал сув белгиларни кўриш имкониятига эга бўлган оқ рангли сатҳ мавжуд. Оқ рангдаги сатҳнинг юқори ва пастки қисмида турли шаклдаги бинафша ва яшил рангли нақшинкор безаклар жойлашган. Пастки нақшли безак фонида жигар рангда «5000» рақами туширилган.

Банкнот ўртасида жигар рангда ишланган «OLIY MAJLIS» меъморий биносининг тасвири жойлашган. Остки фон турли қалинликдаги ва қиялик бурчагидаги нафис чизиқларни қўллаш орқали ишланган нақшинкор расмларни ўз ичига олади. Банкнот ўнг томонининг фони турли баландликдаги кўп маротаба такрорланадиган «5000» рақамларидан ташкил топган.

Банкнот пастки чеккаси бўйлаб ҳошияланган қорамтир фонда «OʼZBEKISTON SOʼMINI QALBAKILASНTIRISН QONUNGA MUVOFIQ TAQIB QILINADI» матни жойлашган.

Фон сеткасида бир-бирини кесиб ўтувчи «5000» ва «SOʼM» ёзувлари мавжуд. Ёзувлар ва фон сеткаси «ирисли силлиқлик» усулида тайёрланган бўлиб, бир рангдан бошқасига оҳиста ўзгариш хусусиятига эга.

Ультрабинафша нурлари таъсир эттирилганда банкнотнинг орқа томонида ҳам қоғозда тартибсиз жойлаштирилган яшил ва кўк рангли туксимон кўринишдаги толалар кўринади.