Давлат ва сиёсий тузум тизимида қонун чиқарувчи ҳокимиятнинг ролини кучайтириш, унинг назорат қилишга оид функцияларини кенгайтириш, шунингдек парламентнинг иқтисодиётни ислоҳ қилиш, давлат ҳокимияти ва бошқаруви тизимини демократлаштириш ва эркинлаштириш, суд ҳокимиятининг мустақиллигини, сўз ва ахборот эркинлигини, сайлов эркинлигини ҳамда сайлов тизимини ривожлантириш, фуқаролик жамиятини ривожлантиришга доир кенг миқёсли дастурларни рўёбга чиқаришдаги фаол иштирокини таъминлаш мақсадида Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастури тасдиқлансин.

2. Ўзбекистон Республикаси Олий Мажлиси Қонунчилик палатасининг қўмиталари:

Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастурига киритилган ҳар бир тадбир (қонун лойиҳаси) бўйича махсус иш режалари ишлаб чиқилишини таъминласин;

парламент назоратини амалга оширишнинг қонун ҳужжатларида назарда тутилган шаклларидан ҳамда ўзига берилган ваколатлардан фаол ва самарали фойдалансин;

жойларда қонунлар лойиҳаларининг манфаатдор давлат органлари, фуқароларнинг ўзини ўзи бошқариш органлари ҳамда бошқа ташкилотлар вакилларини, олимлар ва мутахассисларни жалб этган ҳолда жамоатчилик муҳокамаларини ташкил этишга алоҳида эътибор қаратсин, келиб тушган таклифлар ва мулоҳазалар кўриб чиқилиши ҳамда ҳисобга олинишини таъминласин;

ўз иши тўғрисида ҳар чораклик ҳисоботлар, шунингдек Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастурида назарда тутилган тадбирлар бажарилишининг бориши тўғрисида ахборот тайёрланишини таъминласин;

Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастурида назарда тутилган тадбирлар ўтказиладиган муддатлар ўзгариши эҳтимоли тўғрисида Ўзбекистон Республикаси Олий Мажлиси Қонунчилик палатасининг Кенгашини ўз вақтида хабардор этсин;

Ўзбекистон Республикаси Олий Мажлиси Қонунчилик палатасининг Ахборот хизмати билан биргаликда Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастурида назарда тутилган тадбирларнинг тайёрланиши, амалга оширилиши ва якунлар чиқарилиши жараёни оммавий ахборот воситаларида кенг ёритилишини таъминласин.

3. Ўзбекистон Республикаси Олий Мажлиси Қонунчилик палатаси Спикерининг ўринбосарлари Ўзбекистон Республикаси Олий Мажлиси Қонунчилик палатасининг ўзлари мутасадди бўлган қўмиталарнинг Ўзбекистон Республикаси Олий Мажлиси Қонунчилик палатасининг 2014 йилга мўлжалланган фаолиятининг асосий йўналишлари дастурида назарда тутилган тадбирларни амалга ошириш борасидаги фаолияти самарали мувофиқлаштирилишини таъминласин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.