Тошкент вилоят стандартлаштириш ва метрология бошқармаси хўжалик судига мурожаат қилиб, «4-сон кўчма механизациялашган колонна» шўъба корхонасига 78209396 сўм молиявий жарима қўллашни сўраган.

Биринчи инстанция судининг ҳал қилув қарори билан даъво рад этилган.

Апелляция инстанцияси судининг қарори билан ҳал қилув қарори ўзгаришсиз қолдирилган.

Кассация шикоятида суд қарорларини бекор қилиб, даъвони қаноатлантириш сўралган.

Судлов ҳайъати шикоят важларини муҳокама қилиб, ишдаги ҳужжатларни ўрганиб чиқиб, қуйидагиларга кўра суд қарорларини ўзгаришсиз қолдиришни лозим топади.

Ишдаги ҳужжатларга кўра, Назорат қилувчи органлар фаолиятини мувофиқлаштирувчи Республика кенгашининг 2008 йил 3 январдаги 2/1-Г-сон режа-жадвали, Тошкент вилояти стандартлаштириш ва метрология бошқармасининг 2008 йил 2 октябрдаги 108-сон, 2008 йил 24 октябрдаги 113-сон буйруқлари ва текшириш дастурига асосан «4-сон кўчма механизациялашган колонна» шуъба корхонасида Тошкент вилояти стандартлаштириш ва метрология бошқармаси томонидан текшириш ўтказилган. Текшириш тартиби ва қоидалари текширувчилар томонидан бузилмаган.

Текширишда корхона мажбурий сертификатлаштирилиши лозим бўлган 78209396 сўмлик қурилиш молларини сертификатланганлигини тасдиқловчи ҳужжатларсиз сотиб олиб, қурилишда ишлатганлиги аниқланган.

Тошкент вилояти стандартлаштириш ва метрология бошқармасининг ҳисобланган молиявий жаримани ихтиёрий тўлаш ҳақида 2008 йил 3 ноябрдаги 30-сон талабномаси жавобгар томонидан бажарилмагач, даъвогар «4-сон кўчма механизациялашган колонна» шўъба корхонасига молиявий санкция қўллашни хўжалик судидан сўраган.

Биринчи инстанция суди даъвони тўғри рад этган.

«Маҳсулотлар ва хизматларни сертификатлаштириш тўғрисида»ги Ўзбекистон Республикаси Қонуни 23-моддасининг иккинчи қисмида мажбурий сертификатлаштирилиши лозим бўлган, аммо сертификатланмаган маҳсулотни реализация қилганлик учун тайёрловчига (тадбиркорга) реализация қилинган маҳсулот қиймати миқдорида жарима солиниши назарда тутилган.

Аммо, «4-сон кўчма механизациялашган колонна» шўъба корхонаси 78209396 сўмлик қурилиш молларини ишлаб чиқармаган ва реализация қилмаган, балки сотиб олиб, ўзи қурилишда ишлатган.

Бундан ташқари, Ўзбекистон Республикаси Вазирлар Маҳкамасининг 2004 йил 6 июлдаги 318-сон қарори билан тасдиқланган «Маҳсулотларни сертификатлаштириш тартиби тўғрисида»ги Низом талабларига кўра ишлаб чиқариладиган ва четдан келтириладиган маҳсулотлар сертификатланади. «4-сон кўчма механизациялашган колонна» шўъба корхонаси қурилиш молларини ишлаб чиқармаган ва чет элдан олиб келмаган.

Апелляция инстанцияси суди ушбу ҳолатларга ҳуқуқий баҳо бериб, асосли равишда ҳал қилув қарорини ўзгаришсиз қолдирган.

Қайд этилганларга кўра суд қарорлари ўзгаришсиз қолдирилиши лозим.