Монополиядан чиқариш, рақобат ва тадбиркорликни қўллаб-қувватлаш давлат қўмитаси Жиззах вилоят ҳудудий бошқармаси хўжалик судига ариза билан мурожаат қилиб, «BAXMAL SHAROB» очиқ акциядорлик жамиятини банкрот деб эътироф этишни сўраган.

Биринчи инстанция судининг 2005 йил 13 декабрдаги ҳал қилув қарори билан «BAXMAL SHAROB» очиқ акциядорлик жамияти банкрот деб топилган, жамиятга нисбатан тугатиш ишлари очилган. Тугатиш бошқарувчиси этиб Ў.Қаршибоев тайинланган. «BAXMAL SHAROB» очиқ акциядорлик жамияти собиқ раҳбарига нисбатан Ўзбекистон Республикаси Жиноят кодекси 205-моддаси иккинчи қисмининг «а» банди, 175-моддаси иккинчи қисмининг «в» банди билан жиноят иши қўзғатилган.

Суднинг 2006 йил 4 январдаги ажрими билан Ў.Қаршибоев лавозимидан озод қилиниб, тугатиш бошқарувчиси этиб Ю.Пармонов тайинланган.

Суднинг 2007 йил 31 мартдаги ажрими билан «BAXMAL SHAROB» очиқ акциядорлик жамияти, Ташқи иқтисодий фаолият Миллий банки Жиззах вилоят филиали ва «DEROSSA PLYUS» масъулияти чекланган жамияти ўртасида тузилган келишув битими тасдиқланган. «BAXMAL SHAROB» очиқ акциядорлик жамиятини тугатиш ишлари якунланганлиги тўғрисида якуний ҳисобот тасдиқланган. Бахмал туман ҳокимлиги зиммасига «BAXMAL SHAROB» очиқ акциядорлик жамиятини ягона давлат реестридан чиқариш мажбурияти юклатилган.

Апелляция инстанцияси судининг 2008 йил 27 февралдаги қарори билан 2007 йил 31 мартдаги ажрим бекор қилиниб, «BAXMAL SHAROB» очиқ акциядорлик жамиятини тугатиш ишлари қайта тикланган. Тугатиш ишларини охирига етказиш учун иш биринчи инстанция судига юборилган.

Суднинг 2008 йил 27 февралдаги ажрими билан тугатиш бошқарувчиси этиб Ю.Пармонов тайинланган.

Суднинг 2008 йил 14 мартдаги ажрими билан Ю.Пармонов лавозимидан озод қилиниб, тугатиш бошқарувчиси этиб Қ.Абдужабборов тайинланган.

Суднинг 2008 йил 7 апрелдаги ажрими билан «DEROSSA PLYUS» масъулияти чекланган жамиятининг кассация шикояти қайтарилган.

Кассация шикоятида 2008 йил 27 февралдаги суд қарори ва 2008 йил 7 апрелдаги ажримни бекор қилиб, иш юритишни тугатиш сўралган.

Судлов ҳайъати шикоят важларини муҳокама қилиб, ишдаги ҳужжатларни ўрганиб чиқиб, қуйидагиларга кўра суд қарори ва ажримни ўзгаришсиз қолдиришни лозим топади.

Ишдаги ҳужжатларга кўра, «BAXMAL SHAROB» очиқ акциядорлик жамиятини тугатиш жараёнида тугатиш бошқаруви ва «DEROSSA PLYUS» масъулияти чекланган жамияти ўртасида 2006 йил 11 ноябрда 9-сонли олди-сотди шартномаси тузилган.

Шартнома шартига кўра, тугатиш бошқарувчиси сотувчи сифатида шартнома иловаларида кўрсатилган 323137,0 минг сўмлик мулкларни «DEROSSA PLYUS» масъулияти чекланган жамиятига топшириш, харидор эса мулкларнинг 70,0 млн сўмлик қисмини ўн кун ичида, қолган қисмини эса бир йил муддатда тўлаб бериш мажбуриятини олган.

«DEROSSA PLYUS» МЧЖ томонидан 2007 йил 24 март ҳолатига тугатиш бошқаруви ҳисобига 124,6 млн. сўм ўтказиб берилган.

Тугатиш бошқаруви, Ташқи иқтисодий фаолият Миллий банки Жиззах вилоят филиали ва «DEROSSA PLYUS» МЧЖ ўртасида 2007 йил 28 мартда талабдан бошқа шахс фойдасига воз кечиш тўғрисида шартнома тузилган.

Унга кўра, харидор қолган 198537,0 минг сўмни қарздорнинг асосий кредитори ҳисобланган Ташқи иқтисодий фаолият Миллий банки Жиззах вилоят филиалининг ҳисоб-рақамига ўтказиши лозим бўлган.

Тугатиш бошқарувчиси ва «DEROSSA PLYUS» масъулияти чекланган жамияти ўртасида тузилган олди-сотди шартномасида харидор қарздорнинг мол-мулкларини талон-торож қилмаслик, жамиятнинг ишлаб чиқариш фаолиятини сақлаб қолган ҳолда янги ишчи ўринларини ташкил қилиш мажбуриятини олган.

Лекин, «DEROSSA PLYUS» масъулияти чекланган жамияти шартнома мажбуриятларини бажармаган. Сотиб олинган мулкларнинг ҳақи ўз вақтида тўлиқ тўланмаган. Корхонада ишлаб чиқариш ташкил қилинмаган. Ваҳоланки, қарздорга тегишли мол-мулкларни мулкий мажмуа сифатида сотишдан асосий мақсад, ишлаб чиқаришни йўлга қўйиш бўлган.

Бу эса, биринчи инстанция суди томонидан юқоридаги шартномаларни кўриб чиқиш жараёнида «DEROSSA PLYUS» МЧЖнинг молиявий аҳволи, ишлаб чиқаришни йўлга қўйиш, бизнес режа асосида ишлай олиш имкониятлари тўлиқ ўрганилмаган ва тугатиш бошқарувчисининг якуний ҳисоботини тасдиқлаш ҳақида барвақт хулосага келинган, деган хулосани беради.

Қолаверса, иш юзасидан келишув битими тузилмаган бўлса-да, суднинг 2007 йил 31 мартдаги ажримида «BAXMAL SHAROB» очиқ акциядорлик жамияти, Ташқи иқтисодий фаолият Миллий банки Жиззах вилоят филиали ва «DEROSSA PLYUS» масъулияти чекланган жамияти ўртасида тузилган келишув битими тасдиқланганлиги кўрсатилган.

Шунинг учун апелляция инстанцияси суди асосли равишда 2007 йил 31 мартдаги якуний ҳисоботни тасдиқлаш тўғрисидаги ажримни бекор қилган.

«DEROSSA PLYUS» масъулияти чекланган жамиятининг апелляция инстанцияси судининг қарори устидан берган кассация шикоятининг нусхаси Ўзбекистон Республикаси Хўжалик процессуал кодексининг 178-моддасига риоя этилмаган ҳолда «BAXMAL SHAROB» очиқ акциядорлик жамиятини тугатиш бошқарувчисига юборилмаган.

Шунинг учун суднинг 2008 йил 7 апрелдаги ажрими билан кассация шикояти тўғри қайтарилган.

Судлов ҳайъати «BAXMAL SHAROB» очиқ акциядорлик жамиятининг тугатилганлиги сабабли шикоят нусхаси тугатиш бошқарувчисига юборилмаслиги ҳақидаги кассация шикоятидаги важлар билан келиша олмайди. Чунки, апелляция инстанцияси судининг қарори билан қарздорни тугатиш ишлари қайта тикланган.

Қайд этилганларга кўра, суд қарори ва ажрим ўзгаришсиз қолдирилиши лозим.