Ўзбекистон Республикаси Олий Мажлисининг Қонунчилик палатаси қарор қилади:

1. 2009 йил 15-16 июнь кунлари Екатеринбург шаҳрида (Россия Федерацияси) бўлиб ўтган Шанхай ҳамкорлик ташкилотига (ШҲТ) аъзо давлатлар раҳбарлари кенгашининг мажлиси якунлари маълумот учун қабул қилинсин, шунингдек Ўзбекистон Республикаси Президенти И.А. Каримовнинг мазкур саммитдаги нутқида илгари сурилган ташаббуслар қўллаб-қувватлансин.

2. Ўзбекистон Республикаси Олий Мажлисининг Қонунчилик палатаси қўмиталари:

ШҲТга аъзо давлатлар томонидан жаҳон молиявий-иқтисодий инқирозини бартараф этиш юзасидан амалга оширилаётган тадбирларни амалга оширишда, ишлаб чиқариш соҳасида талабни ўстириш ва иқтисодий фаолликни кучайтиришга доир инқирозга қарши минтақавий ва миллий дастурларни рўёбга чиқаришда фаол иштирок этсин;

Давлат раҳбарлари кенгашининг мажлисида Ўзбекистон Республикаси Президенти томонидан баён қилинган ташаббуслар:

ШҲТ доирасидаги ҳамкорликнинг иқтисодий, энг аввало инвестициявий таркибини сифат жиҳатидан яхшилаш ва кучайтириш;

БМТ шафелигида Афғонистон билан бевосита чегарадош давлатларнинг мухтор вакиллари, шунингдек Россия, АҚШ ва НАТО вакилларидан иборат таркибда, афғон муаммосини ҳал этишдан манфаатдор бўлган тарафларнинг ўзаро самарали ҳамкорлик қилишини таъминлайдиган муҳим маслаҳат-дипломатик орган сифатида «6+3» мулоқот гуруҳини тузиш;

2009 йил 21 мартда кучга кирган Марказий Осиёда ядро қуролидан ҳоли зона тўғрисидаги шартномани амалда рўёбга чиқариш механизмларини янада ривожлантириш;

ШҲТда Ўзбекистон Республикасининг раислик қилиши муносабати билан ҳокимиятнинг ижро этувчи органлари ишига ҳар томонлама кўмаклашиш масалаларига алоҳида эътибор қаратган ҳолда кенг тушунтирилишини ташкил этсин.

3. Ўзбекистон Республикаси Олий Мажлисининг Қонунчилик палатасидаги сиёсий партиялар фракцияларига ШҲТнинг Екатеринбургдаги саммити якунларининг мазмун-моҳиятини, шунингдек Ўзбекистон Республикаси Президенти И.А. Каримов томонидан илгари сурилган ташаббусларни аҳоли ўртасида кенг тушунтириш ишларини ташкил этиш тавсия қилинсин.

4. Ушбу қарор қабул қилинган кундан эътиборан кучга киради.