Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Давлат божхона қўмитаси раиси С.Х. Носировнинг «Ўзбекистон Республикаси Божхона кодексининг божхона имтиёзларини чет эллик инвесторлар ва тадбиркорлик субъектлари учун қўллашга доир қисмининг ижро этилиши тўғрисида»ги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг қўмиталари Ўзбекистон Республикаси Вазирлар Маҳкамасининг тегишли бўлинмалари, вазирликлар ва идоралар билан биргаликда ўз саъй-ҳаракатларини мамлакатимизда 2009 — 2012 йилларга мўлжаллаб қабул қилинган Инқирозга қарши дастурни сўзсиз амалга оширишга ҳамда чет эллик инвесторлар ва республика тадбиркорлик субъектлари учун хўжалик юритишнинг қулай шарт-шароитларини таъминлаш бўйича белгиланган чораларни бажаришга йўналтирсинлар.

3. Ушбу қарор қабул қилинган кундан эътиборан кучга киради.